20-7-2014:蝴蝶灣炎夏嬉水樂

七月中嘅炎炎夏日,星期日午後,家姐忽然提議去沙灘﹗反正空閒,坐言起行咯,馬上返屋企換衫出發﹗屯門人講到去沙灘,通常反射動作就係等於去黃金泳灘,早一兩年嘅夏天黃金都超多人,加上報紙講啲沙流失得好犀利,反而細個時成日去燒嘢食嘅蝴蝶灣就話近年水質有改善,我哋早排過開嗰邊踩單車都見到蝴蝶灣靚咗好多,好啦,今日試下去蝴蝶灣啦﹗

消暑第一、運動(少少啦)第二,其實仲有第三個目標,就係試新相機﹗﹗之前帶過去旅行嗰部Sony潛水相機已經壽終正寢,我哋嚟緊去夏威夷旅行嘛,我都想有番部去上山下海都一樣掂嘅防水相機~買相機時見而家啲防水相機冇以前嗰啲咁靚仔,我都有少少失望,兩三千嗰啲仲醜樣啲,而且比較笨重,反正我哋都有部大啲嘅靚相機,呢個不如平平地輕巧啲,外型可愛啲啦(呢個其實幾緊要﹗:p ->又再一次展現我嘅膚淺了⋯)~我哋嗰部係Nikon S5200~大家睇下下面啲相睇下感覺如何啦~

去到第一件事,家姐對於蝴蝶灣最滿意嘅就係有好多泊車位﹗家姐姐夫帶咗個有頂嘅沙灘蓆,我就帶咗張野餐地蓆,二合為一,我哋嘅架步就set好了﹗姐夫prefer係沙灘上休息下,我哋兩姐妹就落下水咯~DSCN0007

落水涼浸浸就喜孜孜了~

水質不過不失啦,除咗有少量垃圾之外都唔算太污糟,游深少少就ok了,水底能見度嘛,陣間自己睇﹗DSCN0009

已經踏入暑假嘅星期日下午,天氣又咁好,居然人唔太多呢~DSCN0015

哇,我後面有鯊魚呀﹗﹗

家姐話蝴蝶灣可惜嘅係冇浮台,有的話佢會有啲目標游出去~人生之中我都未游過出浮台呀,細個時游唔到咁遠,到我游得ok遠喇,膽小如鼠ta又唔敢游出去腳唔到地又冇扶手or池邊嘅地方,帶住個水泡,即使唔靠佢嚟浮,游遠啲都放心啲﹗我記得以前媽咪有個上咗年紀嘅朋友,當時佢日日去沙灘游水,安全措施就係有條繩子縛住個水泡係泳衣帶,游水就自己游,個水泡係用嚟拖住㗎啫,但有需要又可以休息下,有事起上嚟又安全少少~都係好idea~DSCN0017

新相機ok呀,影大頭都幾靚bor~DSCN0020

又唔會好似我哋部大機咁懶醒咁前清後矇,傻瓜機萬歲~DSCN0023

呢張相嘅主角係--姐夫﹗請圈出答案~DSCN0024

新相機仲有相框功能呢,可以扮影貼紙相﹗DSCN0025

之前一直影嘅都係水面,都要挑戰下佢嘅水底功能嘅,景就冇喇,影下手指啦~DSCN0028

游夠了,係史廸仔帳篷下歎下先~曬一曬太陽,要曬走我上次行山之後嘅兩截色丫﹗(請參閱:28-6-2014:美麗香港@熱辣辣的浪茄灣)DSCN0029

家姐話,住係屯門真好,要行山又有山,要游水又有沙灘,我都係時時都咁樣覺得呢~下次再一齊去沙灘啦,預謀or即興嘅都冇問題㗎~DSCN0030

懶洋洋又悠閒嘅下午真好~

Comments

comments

在《20-7-2014:蝴蝶灣炎夏嬉水樂》中有 2 則留言

  1. 最滿意真係好多泊車位,無位泊車真係好無奈,咩MOOD都無晒~
    咁樣即興去沙灘真係唔錯,通常一早約定晒都會落雨…

    • 帶得多東西又真的有車方便d,不過輕裝上陣的話,屯門碼頭站走過來又不是太遠ge~
      是呀!下次我們可以即興去別的沙灘!

Catherine 發表迴響 取消回覆

你的電子郵件位址並不會被公開。 必要欄位標記為 *