19-7-2014:香港書展2014

一年一度嘅盛事--香港書展每年都係七月舉行,年年day都不太情願去,因為佢怕人太多,不過我個好老公最終都會陪我嘅(笑咪咪),今年出動得嚟有少少急,事關本來諗住今日再去抱石,但呢幾日左邊膝頭蹲下時有少少痛,都係好番晒先再做呢啲high impact嘅運動啦,呢排都係淨係游水穩陣啲﹗所以我就提議去書展喇﹗

我哋係咁多日之中,相信係數一數二人多嘅日子嚟到,預咗會好多人,我哋食個late lunch之後就加入排隊入場嘅隊伍,跟住人潮管制左邊轉轉右邊轉轉,轉到好似行咗成個灣仔一半咁,終於入到場,我諗都真係排咗一個鐘頭以上﹗買飛入場之後都compulsory去行咗相對冇咁受歡迎,位於三樓兩個展館嘅嘅兒童天地同埋宗教書藉先呢,都好丫,輕鬆選購咗day心目中想買嘅東東先~其實我反而冇乜特別target,只係想買啲厚小說嚟緊去旅行時睇,day就一心相買佈道魔術套裝~IMG_4585以上就係我哋今日嘅戰利品喇﹗其實我哋行咗唔夠10分鐘就買咗第一樣超大件嘅東東,並冇係呢張相入面,好滿意的買到朋友嘅結婚禮物,對於點樣捧去美國都有少少煩惱,不過佢應該會喜歡吧?

其他就係我哋自己嘅東東啦,見到day嘅佈道魔術套裝啦,佢而家已經係度試玩緊了﹗其餘嘅書大家估唔估到邊本係day嘅邊本係我嘅呢?哈,其實正式係佢話要買嘅只係咖啡嗰本,其他都係我買嘅﹗:p

訪問下day先,佢揀咗「以科學解讀咖啡的秘密」,佢話佢俾科學二字吸引,哦,原來入面講咖啡嘅種植,苦味酸味嘅來源等等~

小說「小星星」叫做我哋兩個一齊揀啦,貪佢夠厚+密密麻麻文字,睇落內容簡介都吸引,等我睇完睇下有冇心機寫寫讀後感啦~同一間順便買多本小說「時空旅行社」,希望呢兩本翻譯小說都會有趣啦~

「一整年不用錢」都係外國嘅自身實驗紀錄,講一個經濟學學者試試一年完全唔用錢去生活,唔,吸引我嘅估計係我expect佢會同我之前睇過嘅兩本書有啲相似同埋有相同嘅吸引力,之前睇過一本係一家人回到1900年前生活,另一本係講盡量target零碳生活,兩本都好有趣同埋有啟發性﹗

「企鵝怎麼開咖啡店」其實係講企劃嘅書,不過以企鵝第一人稱嘅寫法,應該會幾有趣味,而且開咖啡店都係我夢想哦~

「法醫、屍體、解剖室」我一早係書店就見過,睇落都有趣,之前見貴貴地屋企又一大堆書冇買到,趁書展,yeah,係買書唔需要理由嘅日子,買吧~

「明日蛙3--種下幸福的種子呱」,認識我嘅人好明顯知道我點解會買,就係單純嘅鍾意青蛙嘛,本書用膠紙封實晒,原價要$83,我十五十六,day話唔係賣$10咩?咦,真係有個$10價錢貼係其中一本上面,同職員confirm咗,即買﹗﹗我係搭巴士時就已經睇完啦,好感動,自己對號入座尤其覺得有安慰、鼓舞嘅作用呢~小蝌蚪,加油﹗

啲書大家如果有興趣我都可以借你睇呀~

====================

今日嘅小插曲,話說我哋兩餐飯都係外面食,都要搭枱,兩餐旁邊都坐咗對夫妻,兩對夫妻講嘢都好大聲,令我自然聽到佢哋講咩+自己唔想講嘢⋯搞到想寫篇主題「兩對夫妻」嘅blog,唉,唔好太多事了,briefly講少少啦:

午飯係一對係茶餐廳吵緊架嘅中年夫妻,丈夫怪妻子強逼佢一定要食晒帶返公司嘅飯盒,妻子怪丈夫浪費食物同大聲吵鬧⋯丈夫聲量係足以令我想出聲叫佢細聲少少嗰種⋯

晚飯係一對三十幾歲有兩個年幼小朋友嘅夫妻,妻子向丈夫傾訴孩子暑期作業太淺易,朋友女兒怎想補習中英數普通話,擔心女兒升小學會課程艱深,如臨大敵⋯

我嘅感想係:

1. 夫妻吵架唔應該以贏對方為目標,應該係兩者分岐之中搵出solution。

2. 唔好係公眾地方吵架,唔好睇⋯>.<”

3. 珍惜你的soul mate另一半,唔係所有配偶都係天生一對~

4. 如果將來有小朋友的話,要時時警惕自己、提醒自己唔好變成現今普遍嘅家長,要堅持自己嘅信念去好好培育開心成長嘅小朋友。

Comments

comments

4 關於 “19-7-2014:香港書展2014” 的評論

  1. 諗起書展咁多人都唔想去,以前我都會去書展買翻譯小說,依家改左去台灣買。
    我都唔明D人點解鐘意係街個度嗌交…

    • 係好多人㗎,暫時都仲可接受,再大多幾歲可能就頂唔順~
      去台灣買書係開心嘅,而家香港有誠品,台灣書多咗好多,不過我諗價錢應該及唔上台灣平了﹗
      佢哋一定唔知道自己嗌交好失禮⋯

  2. 太多太多太多人!最好睇是木偶和買了康的禮物!
    下次迫其他野!~
    書不用等書展都可以買:)

    • ok啦,今次難得冇多人到meng~
      我都唔記得咗記低睇咗好好睇嘅木偶戲添﹗﹗嗰個可以用手拎起酒壺、拔劍+將劍還鞘嘅木偶令人拍案叫絕﹗要鞎苦嘅練習先得呢~
      下次逼咩好?
      書展買得盡興啲嘛﹗

發表迴響

你的電子郵件位址並不會被公開。 必要欄位標記為 *