28-6-2014:美麗香港@熱辣辣的浪茄灣

難得有星期六放假,一早約好day一齊去行山,我哋都好耐冇去過行得長啲嘅山,平時星期六、日都好多其他事情,有時得閒又撞正天氣唔好,所以今次叫day搵條長少少嘅路線,佢就揀咗由西貢西灣亭出發,倒轉行麥理浩徑第二段至第一段,跨過西灣山落去浪茄灣,再兜番過萬宜水庫東壩完成﹗想行長少少可以沿住東壩條路出返去北潭涌,但我哋已經熱到攰到郁唔到,結果係東壩上咗的士出番西貢咯~其實出發前我都唔係好知佢講嘅係邊條路線,到咗時描述得仔細啲至知,哦,咪我同爸媽幾年前行過嗰條路倒轉囉,嗰次仲有打過blog添~請參閱:30-10-2006:重陽登高之北潭涌、萬宜水庫、浪茄、西灣亭,原來已經係八年前嘅事呢~

a087c789d533a9515703e31e985121aa

我哋行嘅就係最最最東邊最尾尾嗰截喇﹗我哋係西貢市中心搭咗小巴入去西灣亭,途中好多彎路,單程行車,遇到對頭車都要互相禮讓禮讓,行唔慣呢啲山路嘅司機恐怕都會有啲緊張吧~落車,出發﹗開頭一段路都算多平路,行咗大概大半個鐘就開始上西灣山啦,好多上上落落嘅梯級,如果同一條路係16-20度天氣嚟行的話應該一啲都唔辛苦,但我哋返到嚟至知原來今日係酷熱天氣警告,不過講真,有冇警告我哋都feel到超酷熱,我估最熱最熱嗰陣都有34-35度﹗而且仲要太陽超猛、萬里無雲,仲要一滴風都冇﹗﹗我哋都有啲擔心帶嘅水唔知夠唔夠,口渴都只敢飲一啖咋~一有小小樹蔭就要抖一抖~

我最近咪開始戴Fitbit Flex嘅(請參閱:7-6-2014:Fitbit Flex之我要fit fit),戴咗先發覺自己嘅lifestyle真係超sedentary,如果正常咁返一日工,到瞓覺時只係行咗四千幾步,比起一般所講嘅active lifestyle嘅一萬步連一半都唔夠﹗今次去行山就發現行山嘅威力﹗﹗我哋去到西貢晏晏地,開始行時已經十點幾十一點,但十二點幾我個Fitbix Flex就震震我了,即是已經有一萬步﹗所以由六月頭至而家,我步數最犀利就係呢日行山咯~

假日都幾多人行山,發現鬼佬嘅比例都真係好高,可能西貢多鬼住吧?另一方面我諗佢哋都比較著重workout,香港人好多時都冇將運動成為生活必然嘅一部份,平時問病人有冇運動呀,好多都會答「平時仲唔夠運動呀?﹗」,當然explore下之後佢講嘅係工作、係勞動啦,其實講到尾,人人收工都好攰㗎啦,但有啲人真係堅持到返工前or放工後定時去運動,時間係自己bit出嚟的,決心係自己立定的,大家加油吧~

我哋慢慢的、辛苦的攀登到西灣山嘅頂,好啊,有個涼亭又有啲風,就係呢度休息,食埋午餐啦~我哋由便利店買咗三文治、飯糰同埋麥精,好在經過熱熱嘅山咁耐都未變壞啫,麥精都仲有少少涼添~

IMG_4433

過咗山頂就見到浪茄灣啦~雖然熱、雖然辛苦,但美景當前,人就精神為之一振﹗﹗

落山嘅路就好行好多了,過咗十二點鐘越耐,對於太陽曬得冇咁正嘅盼望就越大,雖然落山嘅路比較爛,要小心奕奕,總算冇咁費勁吧~迎面不斷有一組組上山嘅人,佢哋都問,差唔多到了吧?我哋只能夠微笑同佢哋講一聲加油﹗加油﹗IMG_4434

終於到咗浪茄了,打個咭先~IMG_4435

而家要嚟浪茄唔一定要好辛苦咁翻山越嶺了,有$$的話租架遊艇都得,但辛苦嚟到應該對個海灘嘅美更珍惜吧~IMG_4437

個海真係好靚、沙好幼、水好清,見到呢啲天然靚沙灘時就會反問,點解要花咁多錢maintain黃金泳灘呢啲人造沙灘呢?﹗之前睇報紙講過原來黃金泳灘啲人造沙不斷流失,唔同嘅工程都成效不大,印象中幾年前去游水時其實啲幼沙都只係鋪係沙灘上面,你落咗水就發現突然好深水同埋個水底都係粗粗的感覺,所以話勉強都真係冇幸福,大家著力好好保護僅餘嘅天然沙灘更有益吧~

原來浪茄都係指定營地,如果入嚟露營,都係由東壩嗰邊過來吧,行西灣山落嚟未免太辛苦了~露營嘛,要plan得好啲,因為浪茄營地只有一個水喉一個旱廁,冇士多冇補給﹗入到嚟就要靠自己咯~比起上次我哋去貝澳露營,挑戰性應該會大少少,下次試下嚟下啦,可以盡情享受個靚靚海灘~

出返去東壩條路都比較短同易行,我哋剩番嘅水唔多,都夠用去到東壩﹗IMG_4439

水塘啲水嘅顏色咁靚嘅?我哋遠遠望到東壩,最醒目嘅就係排成一列嘅的士了﹗當時我哋已經決定唔行了,就呢度搭番的士出去西貢啦,呵呵~day問我要唔要影相,我二話不說,走咯走咯就上的士,原來佢叫我影嗰啲六角柱柱,哎吔,我想影呀,噢,下次啦~:pIMG_4440出到西貢,又餓餓地又渴渴地,要畫上完美句點,點少得滿記呀~

Comments

comments

在《28-6-2014:美麗香港@熱辣辣的浪茄灣》中有 4 則留言

    • 計埋休息食嘢,我哋應該行咗三個幾鐘左右~
      哈,嗰次印象最深刻係行到天黑⋯去到西灣亭時都幾乎黑齊~海鮮嗰幕我都唔知印象係來自張相or篇blog定真係嚟自腦海~

  1. 現在都是太熱~露營搞不掂
    行1+2段會太辛苦,希望那個肥仔爬那條難路沒事啦

    • 考慮下九月去露營?
      你時時都記住個肥仔(佬)呢~佢啲friend好似好勁咁,有friend support佢應該好啲~

發表迴響

你的電子郵件位址並不會被公開。 必要欄位標記為 *