上返架的士時冇好好同司機講價錢，車程一直lor lor luen，落車先只好問佢幾多錢⋯RM50係咪已經算獅子開大口？雖然車程真係遠遠地，好似未至於有咁貴bor，尤其相比呢度其他嘢嘅物價⋯我已經覺得自己成為咗水魚，唯有之後醒目啲啦～

入到去City One，我覺得佢嘅規劃冇The Spring咁好，好似啲商鋪鍾意賣乜就賣乜，比例上唔係好balance，好多賣衫賣精品，賣鞋又少啲，電器好似得一間，手機配件就勁多間，好多賣外帶咖啡茶smoothie，食肆比例上又少，anyway，都夠我娛樂嘅～最令我驚喜嘅在後頭呢～

呢啲收費按摩椅係按摩椅公司提供的，行商場行到累累地，relax下再搏殺，都係唔錯嘅idea～我心裡面想坐，但又覺得對住大街大巷，俾張按摩椅整到姿勢奇奇怪怪都係唔係幾好，所以就放棄了～我嚟到古晉時機場都有見過，到時搭飛機如果有時間可以坐下，係機場好似冇咁怪～

G/F、 1/F、2/F都係商店，上到3/F有電影院，有機鋪，有laser嘅槍戰game⋯呢啲都冇話特別吸引到我，但呢個⋯

我覺得真係要係香港引入囉，點解冇人開一間嘅？我做先驅好唔好？一定有得賺﹗除咗開頭set up嘅成本之外，之後consumables真係好少，最貴都係鋪租同人工，最重要係好好玩﹗﹗

玩咩？射箭呀﹗﹗

我揀咗最平嘅package，RM13有15支箭，價錢已經包括其他基本裝備同埋教練嘅費用了﹗多啲箭嘅package仲抵，但我都係試下先，好玩先再追加啦～領取啲箭之前職員幫我哋戴上護手嘅皮套，之後就帶住一筒箭過去射箭場了﹗

好型吧？呵呵﹗支箭有個凹位可以卡住條線，箭尾同色嗰兩塊葉向右，單一隻色嗰塊葉向左，拉弓，發射﹗day以前讀UST時參加過箭soc，佢問我有冇瞄準器，吓？咩嚟㗎？我話係用單眼瞄住箭頭同箭弝成一直線咋，哦，原來我今次玩呢啲係傳統方法，雖然工具都係膠製品⋯:p

距離其實只有3-4米，大家玩熟咗佢有兩條lane係遠啲的﹗我第一支箭，呼，哇，仲咗紅心﹗我以為自己係射箭天才﹗﹗第二支，oops，完全離開個弝囉～ok，我係凡人先係正常嘅，如果唔係，之前嗰29年人生咪浪費咗？白白浪費咗個射箭天才？射多幾支都多少少掌握咗技巧，冇偏離航道得太犀利～

我射箭時心裡面出現啲畫面，最近翻睇「成均館緋聞」，女主角扮男生入讀成均館，女兒身嘅佢當然從來未射過箭啦，仲要力氣都比男人細好多，但射箭比賽關乎佢可唔可以留係成均館，所以一定要贏﹗佢開始時完全拉唔開把弓，射出去嘅箭未到一半路程就跌落地下，拉弓時手都震晒⋯我完全明白佢嘅感受丫﹗因為拉開把(膠)弓都好累，都會震，而且左手唔夠力hold實的話，瞄準咗發射都會走晒位﹗所以男主角同佢練體能，練臂力，由根本做起，我相信都真係要咁～另一個畫面就係「饑餓遊戲」，女主角係射箭能手，百發百中，射箭初哥嘅我真係好佩服，企定定射都咁難，佢仲要躲避住敵人、追擊住敵人嚟射，真係好犀利﹗其實射箭真係幾好玩，點解係香港冇成為流行嘅運動呢？好似都幾有益身心丫﹗

我嘅戰(箭)績﹗

最右邊嗰個係我個弝，左邊嗰兩個係一對英國情侶的，原來個女仔好勁bor(中間個弝)～係咪啲鬼大力啲？定係我太差？

I’m sorry~其實距離就係咁短嘅啫⋯呵呵～

係咪幾好玩呢～

之後行咗大眾書局，買咗幾本書～拎得太重了，本來想食埋dinner至返去，但咁重嘢拎住磨唔得咁晏，都係返酒店休息下先啦～

我打咗啲blog先至再出動﹗原來酒店望出去古晉嘅夜景係咁嘅～

因為好累了，想快啲食完返去，我就去咗酒店旁邊嘅小食店解決～

我諗算係呢度嘅人嘅茶餐廳吧？我覺得佢哋好勁，一間餐廳只賣一款嘢食﹗呢間只賣炸雞飯一款，你啱就食唔啱就走人啦～媽咪嚟咗的話就要去隔離嗰間了⋯慘～今個trip我有三番四次覺得媽咪真係應該學習食番雞囉，好似而家咁就冇嘢食了，之後嗰日去conference有free lunch box，冇得揀款時by default就一定係雞了﹗因為呢度多回教徒，豬肉又out咗喇～

飲品就好多款揀﹗我飲咗中午時未飲到嘅菊花蜜～

正﹗又潤又冰凍～

飲品嚟咗冇耐，waitress過來同我講冇飯，要等20分鐘(即是重頭再煲一鍋飯啦)，問我等唔等，咁飲品都嚟咗咯，唔通灌咗佢然後走人咩，等啦等啦，反正而家有上網，可以有神魔之塔陪伴我～

千呼萬喚始出來﹗﹗我真係要讚嘆一聲，點解馬來西亞啲嘢咁平都咁好食㗎？﹗繼中午食嘅超平laksa之後，呢個RM5嘅飯都好好味，炸雞扒外皮鬆脆，內裡嫰滑，外面澆上甜甜酸酸嘅汁，再配上清涼爽口嘅生青瓜片，簡簡單單一碟飯已經帶來好大享受了﹗如果呢間鋪係醫院附近，雖然得一款嘢食，我哋可能一至兩個禮拜都會幫襯一次，嗰間慢吞吞嘅手撕雞都係得雞一個成名菜之嘛，我哋去到都好少食其他嘢啦～

食飽飽，好滿足～仲有一樣嘢要做至返房﹗我第一日嚟到時係酒店房周圍搵來搵去都搵唔到拖鞋，結論應該係冇的，我又唔想赤腳走，決定買一對啦～之前我講嚟講去都係話對面有靚商場The Spring，其實酒店自己楝building樓下嗰兩層都有個叫ST3嘅商場，我就去個超市睇下啦～哇，RM3.5一對，非常ok啦～

但拆開咗發現有啲問題⋯哈哈，買鞋未試過會咁⋯即刻係垃圾筒搵番啲單同招紙出嚟，要落去換呀﹗﹗大家發現對拖鞋有咩問題呢？

待續

前往其他馬來西亞旅遊blog

Comments

comments