21-5-2014:古晉學習行day 2(part 1).Waterfront小散步

聽日正式開始WONCA conference會期,我今日有一個full day可以探索下呢個陌生嘅城市,旅遊資料唔多,基本上我一本旅遊書都冇帶嚟,事關香港買到嘅古晉旅遊書通常只係一本馬來西亞旅遊書嘅其中幾頁,花一百蚊嚟買幾頁好似太貴了,所以只係上網隨便search下,心目中有啲想去嘅地方啦,但太多未知之數,今日都係要隨遇而安了﹗IMG_4104

尋晚入住酒店時天已經黑齊晒,我都唔知出面係咩環境,只見點點燈光,今朝瞓醒覺至知,哦,原來我住嘅六樓已經好高lu,四處嘅building都係平房,屋頂色彩繽紛,好靚呢~根據酒店位置同窗口嘅座向,遠處好多樹嘅應該係河嘅對岸吧?

早上我一啲都唔心急,因為有睇尋日嘅blog嘅各位就會知道我出發去逛之前有啲要事要辦咗先,一樣係唱錢,第二樣係買電話SIM咭,兩樣都要對面shopping mall十點鐘開門至做到,所以我先慢條斯理落樓下食早餐~IMG_4106

酒店包自助早餐,但印象麻麻地,食物種類少,質素只屬勉強合格(大家要知道我通常唔係腌尖嘅人嘛),食物新鮮程度仲及唔上上次去番禺住嗰間龍泉,我食時已經想explore下附近有冇咩食,有的話唔食呢個早餐都唔可惜~我食咗個腍咗嘅cornflakes,炒麵好油,煎蛋個樣見到唔想夾,最好食係炒菜,因為好似我炒嗰啲嘅味道(有冇搞錯,好食嘅只係我嘅水準⋯)⋯IMG_4107

時間尚早,所以我係酒店了解下架步先~呢個就係酒店外型喇﹗原來呢啲apartment銷售中呢~除非將來全部賣晒出去,否則俾我長住都唔想成日咁多短期住客出出入入吧?呢個位置擰個頭向右90度就係游泳池,泳池比圖片睇起嚟大,而且咁好天都冇人游,我搵日要試下先﹗泳池對住嘅落地玻璃就係gym,唔算好大,但有我喜愛嘅fitball同埋基本設施都好夠啦~SONY DSC

上房拎齊行裝就出去了﹗Citadines對面就係tHe Spring購物商場了,有行人天橋過去,安全又方便~未夠10點所以我沿住呢邊馬路行下先~SONY DSC

哦,原來行兩步馬上就有好多店鋪了﹗地鋪大多係食店呢,仲要好平﹗一碟飯都係馬幣$6左右~唔知佢哋有幾早開門呢?可唔可以之後係度食早餐?其實我都係度諗conference嘅tea break食唔食得飽人呢?多點心的話連早餐都唔駛諗lu~

行前兩步竟然有銀行添呀,仲已經開咗門添~我入到去reception話想唱錢,個staff俾份form我填跟住就有個籌,4個number啫,莫非可以比我預期嘅早辦好事情?點知排到時,唔知係咪呢啲地區銀行少做換錢,我問港幣有冇得兌,佢話要問經理,我其實話美金都ok,但佢個樣好似唔係好想做我生意咁,仲好熱烈叫我過去The Spring嘅找換店,唉,成人之美啦~可能佢真係會好煩呢⋯記起上次去韓國時係銀行換錢,啲staff要逐張銀紙同個紙幣圖鑑嚟對,都幾辛苦咁~(請參閱:9-4-2012:首爾濟州櫻花遊day 2(part 2).狎鷗亭.濟州黑豚)SONY DSC

過去The Spring,見到好醒目嘅裝飾係正中間,應該呢啲就係叫longhouse吧?longhouse係啲傳統高架屋,google一下原來真嘅要比呢啲高好多bor~SONY DSC

The Spring係個好新穎又行得舒服嘅mall,商店嘅比例好balance,比起我今日下晝去行嘅City One似乎有規劃得多~不過係呢個商場就深深體會到呢度嘅人慢吞吞⋯話說我先去找換店,佢話我聽「未有貨」,即是找換店冇錢找換住﹗﹗要十點半~ok,去DIGI電訊,職員話拎鎖匙嗰個同事未返工,所以開唔到櫃賣張SIM咭俾我﹗真係oh no no~所以我先逛咗呢個商場嘛~後來兩樣嘢都搞掂了﹗DIGI幫我放埋張咭落去,whatsapp、facebook都可以直接用,原來number唔同咗account都冇問題bor~而家啲嘢真係方便﹗SONY DSC

呀,呢張相係要回應番家姐之前講過嘅,佢話叫我睇下酒店對面個商場有冇勁美食廣場,都有好多鋪嘅,不過感覺冇「我哋不言而諭嗰個美食廣場」咁勁囉,兩姊妹連講都唔駛講出聲嘅就係呢個了:31-12-2006:馬來西亞之旅.完美的句點

辦好事情,我決定出去waterfront了,問The Spring嘅customer service邊度搭巴士,佢似乎幾建議我搭的士,因為話巴士要等30分鐘以上,但我諗,今日時間咁鬆動都唔搭,之後嗰幾日更加唔會搭,耐就耐啦~去到巴士站,啱啱有對年老夫婦都過嚟等車,咁有兩個可能性,一就係佢哋熟悉班次好快有車,二就係本地人唔理班次幾耐都等,既然呢度生活步伐係咁,我都學下啦~結果都真係等咗有接近半個鐘,上車時司機唔識英文,有個好熱心嘅乘客用啲啲英文解答我嘅疑問,confrim架車係會去waterfront嘅,同埋車費馬幣$1.5一位﹗

IMG_4111

哈,架車行行下原來會係任務進行中時去入油喎,香港小巴都有嘅,巴士好似冇啲咁嘅事⋯IMG_4115

古晉人口之中華人差唔多佔一半,所以周圍都係中文字,我如果唔拎個相機出嚟,又唔兩頭望傻乎乎嘅話,人哋都可能會以為我係本地人﹗車費$1.5,以今日rate嚟講大概就係乘2.5,所以呢程搭咗有半個鐘嘅巴士只係四蚊港紙左右咋~SONY DSC

個好friendly嘅乘客差唔多到時都提我落車,仲簡單講咗要點樣行出去河邊添,呢個係今日第一個貴人,之後嘅第二同第三個貴人更寶貴丫﹗SONY DSC

落車嘅巴士總站已經望到Kuching Mosque了,我都冇打算入去呀,二來係要著得密密實實,其實最主要係一來,我自己一個時都唔太comfortable入去呢啲唔熟悉嘅宗教建築,而且唔係古蹟,而係真係使用中嘅呢~SONY DSC

哇,唔敢飲嘅七彩繽紛飲品﹗SONY DSC

之前搭巴士時啲建築物都好疏落,嚟到waterfront附近比較熱鬧了,有少少吉隆坡嘅印象呢~SONY DSC

哇,色彩繽紛嘅屋且埋藍藍嘅天,好靚呀~SONY DSC

望到河了﹗呢條河將古晉劃分咗南北兩邊,其實係東西邊緣都有過河嘅橋,但當地人好常用嘅過河方法就係搭舢板了﹗好多網頁同啲人啲blog都話呢個係「must do」嚟㗎~SONY DSC

影呢張相係我想話呢度啲人真係好悠閒~佢哋會只係坐、or瞓下懶覺,唔會好似香港人咁硬係要搵啲嘢做~SONY DSC

對面係Astana,亦係砂勞越州嘅總督府,好似香港嘅港督府咁,一年得一兩日會開放俾公眾㗎咋~SONY DSC

我沿住河畔散步,有幾個target,一係要盤算係邊一個碼頭跳上舢板啦,二呢,我知道河畔嘅Main Bazaar盡頭有貓貓雕塑,我要去「到此一遊」一下﹗SONY DSC

自拍王﹗後面咁金光閃閃嘅以為係咩偉大建築,原來係政府office~SONY DSC

呢個Sarawak River Cruise都係網上有講嘅活動,不過我唔打算搭lu,舢板咪仲有風味~而且呢個收費都唔平﹗SONY DSC

VMY=Visit Malaysia Year 2014

唔係我亂up㗎,有官方網站㗎﹗

http://www.vmy2014.com/SONY DSC

再一次體現古晉真係好多華人﹗除咗周圍充滿長著同我哋差不多嘅面孔、周圍好多中文字之外,建築文化都滲透係入面了~IMG_4120yeah﹗搵到貓貓statue了﹗古晉呢個名馬拉話同貓一樣,所以又叫cat city,而家呢啲貓雕塑其實係全個城市都有幾個,呢個最近Main Bazaar我就同佢哋合照,到此一遊啦﹗

待續

前往其他馬來西亞旅遊blog

Comments

comments

在《21-5-2014:古晉學習行day 2(part 1).Waterfront小散步》中有 6 則留言

  1. 鍾意啲彩色屋,有啲似去咗童話世界。我覺得應該不是華人居住的地方,也不像馬來西亞人的風格吧!

    • 嗰啲係商鋪嚟㗎,樓上有冇住家我就唔知了﹗不過嗰一區好多鋪頭都係華人開,尤其係金鋪,有啲成條街都係金鋪,間間入面都係華人,個conclusion就變成,華人係古晉好有錢~呢啲彩色屋實質係點樣形成我就唔知了~

  2. 商場好靚,係咪都係國際化既舖頭?
    七彩繽紛的飲品,是用膠袋盛載的嗎?
    CAT CITY,阿高肯定唔會去古晉…

    • 有部份係啦,都有部份係local的,我係其中一間超大local時裝店做咗大豪客,你哋人人有份呀~
      唔知喎,因為我膽小如鼠,我半秒影完呢張相就飛快走咗lu~呵呵~
      個名啫,周圍都冇乜貓,唔去cat museum咪唔怕囉~

  3. d政府建築物咁似名勝古蹟嘅?
    呢度嘅華人係咪好多會講廣東話?妳遇到嘅第一個貴人是華人嗎?

    • 好大好宏偉仲要金璧輝煌﹗都唔似office~
      我今日同個司機傾開,華人最常講華語(即是普通話啦)、客家話同埋福建話﹗即使今日個司機祖藉廣東,佢都只識講以上三種~
      唔係呀,嗰個都係馬拉人,同我講超簡單英文的~

chunglanying 發表迴響 取消回覆

你的電子郵件位址並不會被公開。 必要欄位標記為 *