20-5-2014:古晉學習行day 1(part 1).一個人的旅程

今次旅程拋低老公出行,本來就打算(希望)real time發放blog blog,等係香港嘅家人可以知道我發生咩事,放心啲,但估唔到第一日都未結束我就開始打blog了,而家我仲係香港飛往吉隆坡嘅班機,進入只係第二小時嘅飛行旅程之中,就係因為「人真係返唔到轉頭」,咩事咁嚴重?冇,只係飛機上嘅電視實在太「低清」,我粒眼瘡都未完全好番,如果仲瞇住眼睇一套兩小時嘅電影應該唔太ok囉~當然我都有帶書上飛機啦,又拎咗份明報,呢啲可以留番慢慢睇,始終今次陪伴我嘅新屎坑Mac Book Air都係比較吸引﹗:p趁清閒打打blog,好過返到嚟趕功課啦﹗六日旅程希望日日清blog,除咗要real time發放之外,返嚟之後五日又出發去北京了,我想blog blog見大家時都係我所見所聞嘅原貌﹗(之前的斐濟蜜月拖咗兩年真係好唔好意思,釜山、西班牙嗰兩個trip都隔咗幾個月至完成,感覺都唔太好~)

照片 20-5-14 下午5.12

既然有Mac Book Air,就試用下佢個photo booth啦,呢張相係我今個trip第一張有我個嘜頭嘅相﹗:p

講咗咁多廢話都未開始講今次個trip,其實我都估唔到自己會去古晉呢個地方,可能大家睇到個地名都不太熟悉~其實古晉算係馬來西亞第四大城市,位於東馬,大家可以睇下個地圖:

螢幕快照 2014-05-20 下午06.58.06

香港人對東馬比較認識嘅應該係沙巴吧,我都以為自己再次踏足呢個國家應該係去沙巴、攀神山,因為呢個諗法都間中出現咗幾年,如果要排一個list列出想去嘅地方,古晉應該唔會出現係個list度,今次偶然地揀選呢個目的地,係要參加WONCA亞太區會議,WONCA係世界性嘅家庭醫生組織,定時都會有conference舉行,等世界各地嘅家庭醫生聚首一堂,share下最新嘅資訊,各個地方嘅好practice,彼此學習學習﹗早一兩年WONCA會議曾經係布拉格同埋濟州島舉行,我都有想去㗎,不過成唔成事都有少少因緣際會嘅~大家可以入去WONCA個網頁了解下:

http://www.globalfamilydoctor.com/

今次會期由5月21至24號,不過21號好似係啲workshop,我記得唔關我事所以冇報名,我會參加22至24號嘅conference~唔,20號出發,21日有個full day逛一下呢個城市,25號就返屋企咯﹗當然唔能夠丟低老公太耐啦﹗

講起一個人出遊,諗番起,成個trip由頭至尾徹徹底底係自己一個嘅,今次恐怕係第一次﹗一個人搭飛機嘛,最細個嗰次係Form 3暑假嗰年去多倫多讀summer school,爹媽姐同我一齊飛去美國東岸+加拿大多倫多遊玩,佢哋先返香港喇,留低我係嗰邊四星期,其實大多數時間都同嚟自世界各地嘅同學仔一齊,回程嘅飛機先真真正正自己一個~另一次應該係2006年去美國嗰次,呀,呢個有blog可以click番去睇了,一個人飛去New York,紐約四處去係自己去嘅,晚上就住係兩個阿姨嘅屋企,之後再一個人飛去西岸探好朋友珊珊,當然係嗰邊就孖公仔咁同佢一齊啦~比較有緊張感嘅一次應該係去印度,其實一行五人一齊去,其中有一日係我自己搭火車去市中心同另外兩個女孩子會合逛街,諗番起都算膽粗粗,嗰陣2008年邊有而家咁多印度嘅新聞爆出嚟丫~

有啲人鍾意一個人去旅行,我其實向來鍾意熱鬧的,食下嘢、各種奇奇怪怪經歷都叫有人一齊share嘛,有事發生都可以有商有量(例如miss咗飛機,or飛機上的medical emergency),今次既然如此,就試下啦﹗可能有新嘅體會呢~

決定咗去WONCA之後,首先要register咗conference先,上網click click click填好表再俾錢就ok了﹗有人問我有冇sponsor,我都冇apply到sponsorship,要填好多表又有好多限制,返來又要交待、presentation甚麼,都係唔好煩我了﹗自己錢自己大假自由自在得多~

跟住買機票當然搵菊姨幫手啦,最好嘅旅遊agent就係我阿姨喇﹗冇煩惱~

不過酒店我鍾意自己book,係網上click下click下揀下揀下都係樂趣~conference嘅網頁有「大會指定」酒店,discount就冇,不過有免費shuttle來往會場,嗰幾間之中我只鍾意Pullman,貪佢有個好靚嘅泳池⋯但因為之前太mi-mo,冇早早book好,所以到我行動時已經好full,冇房連續住五晚了~揀其他啦,就挑選咗我而家將會住嘅Citadines Uplands Kuching,呢間係酒店式apartment,長住短住都有,因為價錢比原本預算嗰間平,所以我豪氣地揀咗1 bedroom deluxe suite,楝apartment有gym又有泳池,既然今次一個人嚟唔會去夜街,希望可以運動下健康下啦~(又要怨一下老公「浪漫地」傳染咗啲菌菌俾我,病足兩個星期,飲咗一支半Phensedyl,兩個星期零運動,個腩又大咗了⋯>_<“)而酒店對面就係全古晉最大嘅shopping mall春天百貨公司,應該食嘢買嘢都方便啲﹗大家可以去下Citadines Uplands Kuching個網頁睇下:

http://www.citadines.com/en/malaysia/kuching/uplands.html

哎吔,我長氣地講背景資料都講咗成千字(冇正式統計,但我估應該有⋯:p),今日嘅事情等下一篇至講啦﹗仲有個半鐘左右就會抵達吉隆坡,我會再轉機到古晉,落機唔知咩環境,如果可以希望買張上網sim咭,換啲馬幣,同埋upload到呢篇blog啦﹗

待續

前往其他馬來西亞旅遊blog

Comments

comments

在《20-5-2014:古晉學習行day 1(part 1).一個人的旅程》中有 6 則留言

  1. 現在整個世界都強調終身學習,抽時間參加學術會議,彼此交流經驗,對新技術的掌握會更敏銳,對工作的熱誠也可以保持得更佳。欣賞你的主動參與。

    • 日日係診症室入面其實都會outdated,印象最深刻嗰啲知識,就係讀大學時學嗰啲,但隔咗五年好多嘢都唔同晒啦,要與時並進﹗

  2. 和我相比,你”一個人的旅程”的經驗比我豐富得多了~(雖然曾經有兩星期只有自己在LONDON附近的LEE GREEN,WEEKEND自己搭火車出LONDON逛和去教堂)

  3. 只有與時並進寫的BLOG才可以寫得這麼仔細。
    去了三日,有在酒店游泳和做gym嗎?要運動才成,不然只有坐(聽talk)和吃(早午晚三餐),會長肉啊!

    • 係呀,所以唔好懶惰,盡早寫多啲details,第時睇番就有趣味~嗰陣去印度七個星期夜晚冇乜嘢做都係日日清blog~所以連支汽水幾多錢都有寫﹗
      有呀﹗尋日游咗水,今日做咗gym,聽日conference完咗book咗去做spa,應該冇時間運動了~但都係放鬆休息﹗﹗

發表迴響

你的電子郵件位址並不會被公開。 必要欄位標記為 *