繼去完西班牙之後一直未有得去旅行，我已經心癢難搔，同事朋友知我要成日去下旅行至得，問我下個trip幾時去、去邊度，我好desperate咁話「下次？清明返鄉下拜山囉~」…實在太飢渴了﹗雖然話係清明掃墓之旅，但呢個兩日一夜o既短trip，我哋一家人都好好安排一下去遊玩下，係繁忙工作之中放鬆一下﹗話晒我下一個真trip要到五月底喎，呢個都可以止一止渴先~

我哋胡氏鄉下係廣東番禺石崗西村，所以由屯門出發，搭中旅o既直通巴士經深圳灣口岸過關就好方便喇~其實朝早出發時都怕成唔到行呀，唔知係咪早兩日食滯咗，出發早上勁胃痛，痛到卷起個身，心裡面盤算究竟去屯門醫院好定係去西鐵站好，做醫生o既我心裡面已經有好幾個令人怕怕o既診斷，死啦，痛到咁會唔會胃潰瘍or胰臟發炎？要做手術就弊了…好在吞咗粒胃藥之後情況慢慢紓緩，出發去西鐵站係正確o既，我到中午時已經變番生龍活虎啦~

直通巴士o既安排可以話佢flexible，亦可以話佢好混亂，話說有好多直通巴士，都係係香港各區接客人去深圳灣，過關後就轉內地大巴，但係冇規定邊個人邊張飛搭邊架香港旅遊巴，所以造成緊張局面，吓？呢班又滿咗？去到深圳灣會唔會趕唔到上車o架？好在最後都接駁得上~

果然係節假日，過關勁多人，相比起返大陸拜山o既香港人，更多內地人湧嚟香港度假~

上咗內地大巴都ok舒服，day就睇小說，家姐姐夫就running man，我就呼呼大睡一下、養精蓄銳﹗

九點三由屯門出發，去到番禺十二點都未夠，都好順利啦~落車o既地點係番禺賓館，斜對面就係我哋book咗o既龍泉大酒店，所以都好方便~

媽咪話呢個圓形行人天橋係經典位置，廿幾年前已經有係度~

時間尚早，未check in得住，我哋先去搵食~我成廿年冇返過嚟，樣樣都係跟住年年都有返嚟o既爹媽，佢哋開頭話去食過o既一間茶餐廳諗住叫餸食飯，家姐就提議去呢間薩莉亞意式餐廳~

吓？返大陸食意式餐廳？好難想像，往時經驗都不太好，加上早上個胃不太舒服，對於比較heavy o既西餐都有少少保留，但家姐話佢o既賣點係超低價，可以瘋狂怒叫，我睇一睇個menu之後都為之心動，好呀好呀，我贊成~

入座後，我哋o既旁邊就係暢飲吧，我話呢個應該係全餐廳最貴o既東西，任飲每位RMB 7，可以飲汽水、果汁、各種茶、咖啡奶茶，如果比起其他食物佢就唔算平了﹗

因為…湯只係每款RMB 9﹗餐牌入面大多數食物o既價錢都係個位數字至一字頭，二字頭已經非常罕見﹗味道嘛，唔會算係精緻o既西餐，但以嗰個價錢嚟講你會覺得物超所值了~

即使我哋有史官(我家姐)影相，但碟數太多，佢都冇一一盡錄，總之有啲湯有啲小食有啲pizza有啲pasta咁啦，埋單每人都係RMB 30左右，唔好忘記已經包括暢飲吧o既任飲價錢lu喎~

而且環境都明亮舒適，好適合一家大細去食下嘢，享受下天倫之樂~yeah~

食飽飽我哋就去酒店check in，本來去大陸就諗住去攜程book酒店，但發現我經常捧場o既agoda.com都有得book同一間酒店，而且價錢差不多，仲可以用我o既agoda積分，咁梗係用agoda book啦~揀龍泉係因為佢description話新裝修，睇啲相片好新好時尚，點知…

點解我哋被分配嗰啲未裝條o既房間o既？不過六個人之中得我一個失望，因為係得我睇過嗰啲新淨o既相囉，反而佢哋覺得$262一間o既雙人房理應係咁o既質素，哈，咁大家ok我就ok啦~不過住落覺得奇怪o既係，明明張床咁硬，但又好好瞓喎，真係犯賤乎？

大家可以click入去龍泉大酒店個官方網頁，就見到幾靚了：

http://www.lq2000.com/

都仲有樣好o既，酒店有free wifi，大家要whatsapp、check e-mail、打神魔之塔都方便啲~

我哋稍稍休息就出發今日o既行程啦~我哋今日會去長隆香江野生動物世界同埋睇長隆大馬戲~

雖然我哋酒店已經身處市橋，但行過地鐵站都有一段路，唔，路上地鐵o既指示牌唔多囉，都幾難搵，問幾次路人點行先識去~哦，原來只係搭一個站﹗下一站就係灘溪長隆啦~

待續

Comments

comments