15-12-2013:古典音樂之美

個幾月前係Facebook收到朋友Queenie o既邀請,去聽佢有份演出o既音樂會,一來捧場,二來又為香港防癌會籌款,當然要去下啦,見係善事,我又非常喜歡一家人一齊出動,所以我邀請埋爸爸媽媽家姐姐夫老公一齊去聽咯~securedownload收到Queenie寄嚟o既門票,睇睇張簡介,咦,音樂會o既主人翁原來係佢老師—-鋼琴家李喆,莫非…佢係我哋中學o既師兄?即刻問一問家姐,我哋都覺得可能係,呢個名咁特別,仲要都係彈琴o既,應該冇咁多個吧,後來到真正演出時見到真人,我哋都100%確認了,雖然唔算識佢,但肯定認得~

音樂會係香港演藝學院演奏廳舉行,坐到大約140人~翻開場刊先正正式式知道演出o既內容,原來多才多藝o既Queenie今次會彈鋼琴、拉小提琴同埋吹長笛呢~上半場全部係鋼琴演奏,下半場就係弦樂+聲樂為主~

音樂會一開始就覺得要多謝Queenie了~~~~久違了o既古典鋼琴音樂﹗﹗﹗其實我四歲就開始學鋼琴,一直學上去、考上去,學到中四左右就冇學啦,細細個時想學琴係因為見到家姐彈好羨慕,所以又想學,後來程度越來越深,我又心多多,唔願花咁多時間練琴,咁少練又點會進步得好呢,所以為咗唔想浪費媽咪啲錢(嗰陣學琴真係幾貴﹗﹗),所以考咗七級之後就冇學了,好多人覺得八級先係一個milestone,唔考埋好似好可惜咁,但我又唔覺得o既,又唔係要用嚟搵食,都冇乜所謂~後來技巧退步就真o既,但冇話荒廢,之後咁多年都有幫手聖堂彈琴,讀大學嗰段時間幫咗真係好多個婚禮司琴,多到冇數過,而家反而係day嗰邊教會彈得多啲~umum,用得著熟練o既手指,但用唔著古典音樂細膩o既技巧咯~

欣賞人哋彈琴真好~心裡面有種熾熱o既感覺:「如果我繼續學會唔會好似佢哋彈得咁好呢?」幾首曲目都係二人至四人用兩部鋼琴合奏,我哋坐靠右邊o既觀眾席,所以可以清楚睇到右邊嗰位鋼琴家o既演出~望住鋼琴家們o既手指係琴鍵上面飛舞,回想起細個時兩位鋼琴老師分別教我哋o既各種技巧呢~

今晚o既演出有幾樣我係印象特別深刻o既~曲目上,有好多對我嚟講都係陌生o既曲,但令我驚喜o既係上半場o既「Carmen Fantasy on themes from the opera by Bizet」,係入面搵到我哋熟悉o既卡門o既影子同埋某啲熟悉o既片段,但佢事實上又係一首全新o既曲,非常之複雜o既結構,有種神秘o既魅力﹗一聽就喜歡了~另外又有熟悉o既曲,上半場最尾o既係「The Nutcracker」入面o既四首曲:「March」、「Chinese Dance」、「Dance of the Sugarplum Fairy」同埋「Russian Dance」,意外地四首都好耳熟能詳wor,我明明未正式睇過胡桃夾子o架?﹗聽完就同day講,我哋下年聖誕一定要買飛去睇胡桃夾子芭蕾舞~

下半場就係比較新鮮o既體驗了,平時聽小提琴呀、管樂呀多數一係就係大o既管弦樂團,一係就係獨奏,好似呢啲小型o既合奏反而少經歷到~原來三四樣樂器都可以好調和、好豐富~

最尾部份另一高潮位就係Suite for 2 violins and piano in G minor, Op 71,曲本身係好聽,但最特別o既係佢哋安排咗有四支小提琴係觀眾席上面演奏﹗﹗嗰種環迴立體聲真係好正,睇戲時話咩杜比5.1系統,覺得好似係理所當然,但原來現場被幾支小提琴圍繞時真係唔同o架~

美好o既晚上,同家人一齊度過美好o既晚上﹗﹗多謝你呀Queenie~

Comments

comments

在《15-12-2013:古典音樂之美》中有 6 則留言

  1. Rita: 「如果我繼續學會唔會好似佢哋彈得咁好呢?」
    Catherine:「我果然是沒有天份的吧﹗怎樣練都應該不可能彈得咁好喇~」

    • 都唔會太冇天份吧,你當年只係opportunity cost o既問題啫~寧願花更多o既時間係第二啲事上面~

  2. 當年讓妳們學琴,是想培養妳們的專注力及解難能力,沒期望妳們要成為演奏家或教琴老師。而且,懂彈琴就較懂得欣賞別人的演奏,是生活情趣呀!這是我和爸的想法。阿暐能在日常生活上應用,當然更佳。阿曦不是沒天份,她只是沒有勁道再接觸鋼琴吧了。

    • 雖然冇係琴呢方面變得好出色,但我都覺得很好啦,實用的狀況夠晒用,媽咪講得啱,我哋更加識得欣賞人哋演奏了,唔單單係鋼琴,包括埋其他o既音樂~真好~

Rita 發表迴響 取消回覆

你的電子郵件位址並不會被公開。 必要欄位標記為 *