21-11-2013:第一堂手風琴課

今個星期感覺好豐富,其中一樣就係期待咗幾日o既手風琴課﹗

考完part 2(雖然未出成績),叫做自由時間多咗,好想好好充實一下自己、增值一下自己,所以一段時間之前已經打算考完試要學下嘢~本身想學韓文(西班牙文丟低晒唔走去pick up番又學樣新嘢?),因為好鍾意睇韓劇、聽k-pop,但朋友話要學最好去啲正式啲o既機構學,睇過HKU SPACE要下年春季再開課,咁遲啲先啦~

去西班牙時見到好多街頭賣藝人,除咗常見o既結他、小提琴之外,手風琴都見過好幾次,好好聽、熱鬧又活潑呢,所以「的起心肝」,不如試下學手風琴啦,反正將來都會好有用,又可以伴奏,又可以獨奏,有咩喜慶又可以用嚟賀一賀~

其實由細到大都學過唔少樂器,認真o既恐怕只有鋼琴,中學時鼓勵F.1同學仔揀樣樂器嚟學,我揀咗同上述原因一樣,即「反正將來都會好有用,又可以伴奏,又可以獨奏」,揀咗學結他,但個course完咗我亦完咗了,因為捱唔過bar chord o既痛,冇恒心去熬過B flat個chord,所以而家雖然有我名下o既結他,但都係我老公彈o架啦~F.2學校新組成中樂團,喜愛音樂o既我都加入了,咁多樣樂器,怕自己冇恒心,揀咗價錢最平o既笛子,又輕便,但吹咗幾堂都掌握唔到運氣,好不容易至吹得響,但已經暈陀陀,無法享受音樂o既美妙,所以反而後來中樂團o既表演我幫手打鼓囉,二胡同埋柳葉琴都係咁而有玩過,但唔係我屬於o既team都冇人好仔細教了~

既然今次唔駛按弦按到手指痛,唔駛吹到頭暈,應該ok啩?但同家姐提起話報咗名去學時,佢話我可能會手瓜起展…哈哈~

隨便上網search,打「手風琴 香港」就搵到我而家去學o既香港手風琴藝術團了,睇個website感覺都好有規模,又可以保送考試,佢哋個團又有好多表演,應該都好有經驗,因為唔想限時限刻,又可以學得efficient啲,所以打電話去時希望單對單咁學~

今日去到旺角女人街o既會址,大廈入口隱藏係女人街攤子之間,上到去就變得開揚光猛了~架子上面好多部手風琴,牆上又貼咗好多藝術團o既演出照片~希望我可以好好學習﹗﹗ 🙂

辦好少少手續就開始上堂啦,周老師先簡單講解手風琴o既結構同埋彈o既時候o既姿勢,右邊o既帶子要短啲啲,因為keyboard要近自己,坐係度時雙腳要平放,如果唔係會腳痺~周老師話,預咗頭幾個星期左邊膊頭一定會痠痛,我哋平時唔習慣咁intensive地用同一組肌肉,但彈手風琴要不停用左手拉風箱,所以痛就難免,佢話捱過咗第時就唔痛了~家姐o既「手瓜起展」預言開始實現了~

佢先教我冇聲地按拍子拉風箱,開-2-3-4,合-2-3-4,冇聲時都好smooth,但後來開始有音時就難好多﹗﹗因為要邊彈邊拉至會有聲,如果左邊的鍵冇按又會拉唔出~因為周老師知道我識彈鋼琴就教得快少少,好快就俾我試彈啲有時左右手o既歌,因為右手o既琴鍵我唔駛再學嘛,但真係要左右手協調,其實係同一時間要顧三樣嘢,右手o既琴鍵,左手o既chord按鈕,左手o既拉風箱,真係要周伯通o既左手互搏之術至得~左邊o既chord按鈕(恕我用啲一啲都唔專業o既用語)有個凹位o既係middle C,最初o既「瑪莉有隻小綿羊」只需要用C同埋C major,即凹位用左無名指按C,左中指按C major,彈結他同埋彈鋼琴o既會問,C唔係等於C major咩?其實就好似彈琴時「bom-cha-cha」o既「bom」同埋「cha」o既分別了(會唔會好複雜)~後來再彈多兩首,要用埋G同G major,F同F major,要跳嚟跳去唔熟啲位置所以手忙腳亂啦~

今日o既課堂就學到呢度~我都打算睇下下堂買部琴,可以返屋企練咁就事半功倍啦~呢個星期…只可以係腦海度練習﹗﹗

雖然都有啲累,尋日去咗跑步+今朝係左臂打咗流感針+用咗左臂拉咗半個鐘頭o既風箱,但都好開心丫~(笑咪咪中…)

Comments

comments

在《21-11-2013:第一堂手風琴課》中有 8 則留言

  1. 學任何樂器,起步都是困難的,不過單對單學習,會進步得很快,希望很快可以聽到妳的演奏,甚至可以聽到妳的手風琴和阿Day的結他合奏呢!

    • 我打算下一堂都買琴,我練好一點點就邀請你們上來聽我練習啦!!

  2. 好佩服你有勇氣去學一樣新的樂器,自己學過鋼琴就知道,學樂器要好有恆心才可以的。
    買一個手風琴要多少錢?聲音會好大的嗎?在家練習會否遭人投訴?

    • 希望我都有恆心啦,現在知道老師是勁勁人應該會學得更起勁!
      最便宜的三千幾,左手的鈕少一些,老師建議我買八千幾那種〜
      應該不怕吵ge,一來不是特別大聲,二來我們同層還有小提琴和鋼琴!

    • 今年趕不及!下年應該可以〜
      現在只上了一堂,聲音好像斷氣一樣!哈〜

David 發表迴響 取消回覆

你的電子郵件位址並不會被公開。 必要欄位標記為 *