睇落係普通o既西班牙trip day 7，但其實同時係我哋結婚兩週年o既大日子丫~我哋晚上揀咗間睇落靚少少o既餐廳食飯慶祝咯~

繼尋日o既Cordoba之旅之後，今日亦係day trip，去Granada睇Alhambra，路程比較遠，由Sevilla出發火車要三個鐘，巴士就三個半鐘，原本係Barcelona時有諗過搭巴士o架，因為班次比較多，時間較flexible，但上網買飛唔係太順利，所以諗住到咗Sevilla至算，我哋早兩日到Sevilla時諗住搵個巴士總站買飛，又去咗冇乜班次嗰個巴士站喎，結果都係搭火車，火車嘛，壞處係出發只能搭六點幾開車嗰班﹗﹗下一班就已經太晏﹗﹗所以我哋六點鬆啲就要酒店搭的士去火車站，仲要犧牲酒店o既自助早餐添~

所以係火車站買咗唯一熱o既早餐—-麥當勞﹗雖然話西班牙多美食，但礙於西班牙人太慢，我又太緊張，我哋後來都仲食多兩次添~西班牙o既麥當奴都幾貴，一個餐最平o既要4-5歐羅，貴貴餐要6歐羅以上添，好處係快同埋夠熱﹗其實係外地食下麥當勞都好o架，因為會有好多同香港唔同o既選擇，今次我哋都試咗兩款香港冇o既包﹗諗起印度時o既麥當勞就更新鮮了，因為印度人唔食牛唔食豬，所以衍生咗好多蔬菜包同埋薯仔包囉~(請參考：12-4-2008：初來孟買報到、17-4-2008：醫生大罷工同埋9-5-2008：展開旅程)

我今次係食咗煙肉蛋漢堡啫，但我要特別介紹我o既飲品，冇錯，係鮮榨橙汁﹗

啲微型本地橙就係咁樣碌入部機度破開榨汁，好似都要好幾個先榨出一整杯，老實講比起MinuteMaid嗰啲酸好多，勝在天然新鮮，感覺好健康啊~

沿路都係「疑似橄欖樹」~我哋食飽飽好快就呼呼大睡啦，咁早起身，要養足精神再去玩嘛~

抵埗出站，原來Granada站非常細，亦冇Tourist Information Centre，我哋手上o既旅遊書並冇全市o既地圖bor~好在行出去幾步有間私人營業o既旅客中心，有得賣地圖，俾錢就俾錢啦~我哋本身諗住按旅遊書教o既行出去大街，搭巴士到依莎貝拉廣場再轉車上去山上o既阿爾汗布拉宮，但第一步就錯咗…跟住一個唔準確o既臨時路牌行去大街，原來已經離目標o既大街越嚟越遠(…都唔知﹗)…

西班牙街道o既壞處係，你唔係咁易搵到自己係地圖上身處o既位置，因為路牌唔多，商店冇顯示門牌同街名，你要去到一個路口至有機會，所以越行越遠越錯，到我哋orientate到自己時，發覺已經離開要搭巴士o既大街非常遠，倒不如直接行路過去依莎貝拉廣場﹗但都要行唔知八個街口轉彎再行五六個街口至到嗰類…行就唔怕行，但我一直焦急地話「時間op-so」(冇時間咁解，因為睇韓劇太多，學啲人用韓文講…)，同埋day著咗對新波鞋，對襪又太短，有啲刮腳，真係屋漏兼逢夜雨…去到熱鬧少少o既地方，我提議買啲膠布，起碼唔好刮腳咁痛先啦~但係…原來膠布都勁貴﹗﹗一pack要七個幾歐羅，哇~不過都好似物有所值，day一貼上去就話好舒服，有股清涼o既感覺喎~之後嗰幾日prophylactic咁貼咗先，行路就非常暢順啦~

好在去到依莎貝拉廣場好輕易就搵到巴士，所謂巴士其實係仲細個十六座小巴o既車仔，上車後好快就兜上去彎彎曲曲o既山路啦~

之前預習太少，都冇好好研究要點樣逛阿爾汗布拉宮，原來地方好大﹗我哋先買好入場飛同租好audioguide就出發咯~

呢度o既audioguide同其他地方o既造型好唔同，係一大碌﹗

太早食早餐，西班牙時間上又未夠鐘食lunch，餓餓地我哋買包薯片邊行邊jap jap jap~

買門票時話有一部份o既皇宮要係指定時間之內入場，其餘就冇限，我哋既唔知佢講o既係邊度，亦唔知我哋自己行緊o既方向，所以都係隨便行住先…

行咗過去Generalife(軒內洛尼菲庭園)—-即是夏宮—-嗰邊，因為綠油油的比較吸引吧~

呢條通道人來人往，見到一團又一團o既旅客跟住領隊行，話時話，係西班牙見到o既旅行團呢，同平時第啲地方見o既好唔同，導遊唔會拎住大聲公講解，而係用個小小咪細細聲講，原來每個團友都有個headset，透過無線電傳輸，好處係，咁就唔會嘈到其他人啦~不過壞處就係對我哋嚟講唔可以「R聽」囉~定係其他國家都開始係咁？我哋好耐冇參加過旅行團都唔知了~

我哋見人哋影咗呢個view好靚又跟住影，部住呢個位，唔爭氣o既係有一團又一團o既旅行團係前面行過，要等啲人行晒又有新一批，有個阿叔係度望我點解咁苦惱，湊個頭過嚟，講一句：「no wonder~」哈，跟住佢又霸咗一個窿係度影咯~heehee~呢個trip後來我哋逢係見到人哋係某個位影得靚又跟住影就要高呼一句「no wonder」了~

旅遊書話，Generalife係根據可蘭經入面o既天堂而建成，確實庭園好靚，而且風格同其他西式o既、中式o既、日式o既庭園係佈局上都好唔同~

我哋行到咁上下發現係「指定入場時間」前應該逛唔完Generalife，所以未完成就掉頭行啦，又怕搵唔到「指定入場時間」嗰個入口喎，都係穩陣啲好~

行番出嚟見到呢啲類似遺址o既東西，我相信都係後來o既人再估估下整番啲遺址出來了，因為好似工整得太過份，記得之前過過啲遺址應該係更頹垣敗瓦的~

後來我哋知道了，「指定入場時間」嗰個叫做Palacios Nazaries(奈沙里耶斯皇宮)，係阿爾汗布拉宮o既重點所在，要由Generalife行番過去La Ciudad Palatina嗰邊，其間都會經過好幾個景點啊~

其中有呢個Iglesia de Santa Maria(聖瑪利教堂)~

睇番網頁先知原來中間聖母抱住耶穌個雕塑係最出名的~

我哋今個trip咪成日租audioguide o既，但有時聽聽下就會頹咗，因為太類似，太多專有名詞，而且聽得明嗰啲自己都作得出嚟，typical o既就係「係xxxx年，由xxx皇帝命令建興，花費xx時間，終於係xxxx年完成，後來xx入侵時遭到破壞，到xxx皇帝在位時再修復…blablabla~」，唉，我哋唔係歷史人都係搞唔掂…:p

呢楝好大o既building係卡洛斯五世宮殿，外觀睇唔出有啲咩，四四方方的，但內部就好宏偉了，因為係好多柱子組成o既大圓形，陣間就見到了~

好大個把手﹗有咩用呢？

無論點影都只係影到一角~都係要一掃全景至影得晒~

明明係想顯示有幾大家嘛，點解係打直影o架？

雖然天氣暖暖的，但一到陰頂就涼了，尤其係四處都係石柱子，凍冰冰的~

而家呢個宮殿上層係美術館，下層係博物館，我哋轉頭再返嚟參觀，因為要入去指定時間入場個宮殿先~另一個no wonder o既位置，由高處望落去山下，全部都係啡啡白白o既房子呢，好在有一對情侶搵我哋影，我哋順道又可以有張合照啦~

好，夠鐘入場，下一篇blog見~

待續

前住其他西班牙旅遊blog

Comments

comments