食飽飽我哋就去參觀Cordoba另一重點景點—-阿卡乍堡了—-既係一個堡壘，亦係一個皇宮，所以入面有啲硬綁綁o既軍事建築，亦有繽紛o既御花園~

入場券有晒Andalucia o既特徵喎，鬥牛、清真寺、橘子，附送一個美女~

天氣好好呀，一入場幾乎就先登上堡壘o既一個城塔，係咪好似童話故事啲城堡呢？睇到呢張相時，諗起以前去印度參觀過o既一個古堡：4-5-2008：murud水中古堡

以前要防敵人，要係度監視，但而家太平盛世，可以欣賞下猶太街區同埋花園o既景色~

呢邊可以望到羅馬橋添~

參觀西班牙o既宮殿，啲花園都係工工整整的，而且好多時都有大大小小o既水池，係咪因為夏天天氣太熱要吸一吸熱？呢度啲樹被修剪到一碌碌咁都幾搞笑，幾百年前應該唔係咁樣造型o架啩？

落番去先~

前往另一邊o既城塔~

入去裡面，展示咗啲古老o既馬賽克畫，但應該係修復過，再係白雪雪o既牆鋪番出嚟吧？

落到嚟地面，比較似宮殿，冇咁似堡壘了~開始展露溫柔o既一面~

我哋嚟呢個trip今次係第一次參觀西班牙o既皇室花園，少見多怪就覺得好靚好靚了，之後再去Granada o既阿爾汗布拉宮同埋Sevilla o既阿卡乍堡真係仲犀利添~大家要繼續留意我個blog啊~

係Andalucia範圍，所有樹木都係橙樹until proven otherwise﹗係花園入面呢啲修剪到傘形o既樹近睇原來都係橙樹﹗其實幾好丫，好似幾粗生，枝葉又茂盛好遮陰，又有啲橙食下~

噴起水來就更美了~加上兩旁o既花花都開得好燦爛呢~

靚~

非常滿意呢張玫瑰花~

去到一碌碌樹樹堆，原來除咗條剪之外，真係有鐵線箍住~

呢邊都有個水池~

點解要影城牆？大家仔細睇，見唔見到好多鴿子躲係啲洞洞度呀？好cute丫~

離開阿卡乍堡，出番去猶太街區，感受下浪漫o既白色小鎮氣氛，而且想去搵搵旅遊書有介紹o既百花巷~影出嚟好靚o架，但只係一條好細好短o既街，我哋穿嚟插去都搵咗一段時間~

途中見到呢間paella店，哇，可以雙拼、甚至四寶飯，啱晒貪心想試晒所有款o既我，可惜我哋個trip冇再食過paella啦~

呢度就係百花巷啦，大家要加多少少想像力，係春暖花開o既日子，一個個盆唔係淨係綠葉，而係開滿色彩繽紛o既花花，係咪會好靚呢？

運吉中…heehee~

之後唔知點樣入咗去一個免費o既「景點」參觀，行完一轉都不太sure要睇啲乜，而且旅遊書都冇介紹~不過整得靚靚地咁~

有各種花樣o既瓷磚拼成o既地板呢~

白色小鎮o既秘密﹗﹗莫非全個城鎮都係佢一手包辦o既？定係大家都真係咁紀律見自己唔夠白就會搵師傅執一執？

到火車站時腳累到不得了啦，又未夠鐘上火車，買咗嘢飲，點解要咁特別影相？因為呢杯雪葩飲品真係好正，用新鮮雪葩加冰打，最重要o既secret係加咗Andalucia o既鮮橙汁入去﹗﹗原來平時周圍都見o既橙係可以咁用o既~

我哋返到去Sevilla再搵食~中間有段小插曲，我哋朝早咪搭巴士去火車站好沾沾o既，咁嗰架巴士係循環線，心諗冇死啦，係同一個站跳番上車，一個loop咪可以返去我哋酒店附近囉，點知又嚇死人了，原來條循環線個圈勁大囉，分分鐘好似東京o既山手線咁大，睇住架巴士過咗河，直情離開咗我哋張旅客地圖o既範圍，oh no no，慢慢我哋先係地圖出現番…以後唔敢亂搭循環線了~第二日我哋醒啦，去火車站架巴士叫C1，原來相反方向o既循環線叫C2，我哋由Granada返嚟時超快速就返到酒店了~

係酒店附近o既餐廳食dinner，同一條街有好多間餐廳，有時聲稱2歐羅一個tapas，真係好吸引，但冇人食又唔敢入去喎，我哋揀咗呢間比較多人食又有位o既，係戶外暖爐旁o既位置坐低~旅遊書話，西班牙有好多酒值得試，之前咁多次都飲sangria，今晚不如試下sherry啦，旁邊o既可樂當然係day o架啦~sherry入口淡淡地，但吞到落去時啲酒味都濃，不過相信酒精濃度應該都低o既，因為飲咗一杯都冇乜醉意，都係奎爾公園附近小酒館個阿叔調嗰杯sangria最勁﹗﹗

呢間餐廳好多另類o既tapas，我哋叫o既之中有啲真係不敢恭維…右上係正常o既雞湯，有少少藥材味，真係好似中式老火湯，上中o既係正常o既greek salad，好穩陣，左上o既就糟糕了，之前咪食過好好味o既芝士o既，但我唔記得咩芝士咩名嘛，唔小心叫咗呢個原來係羊奶芝士，超級騷呀﹗﹗食一啖之後有啲作嘔，我唔肯再放第二啖落口了，day都要撥走啲芝士至食到塊pancake皮~右下o既煙肉薯仔冇咩特色，正常地食得過，下中o既煎蛋我都唔係好記得係點了，但左下o既又好搞笑，竟然咖喱雞飯都可以係個tapas，經過我食咗咁多印度咖喱嚟講，佢都幾正宗﹗印度咖喱飯tapas可以話係今餐最值得大啖大啖jap o既菜式~唔唔，tapas都係傳統o既好~ :p舒適o既晚上，係香港難得有咁樣露天餐廳，悠閒安靜地晚食一餐呢~

待續

前住其他西班牙旅遊blog

Comments

comments