大家久等了，隔咗咁多日，又有新blog推出，我唔自己肉緊少少，怕又會變成爛尾or隔好耐至推出o既看圖作文﹗:p大家多啲like同埋多啲留言絕對會鼓勵我繼續寫呢~

Sevilla我哋總共住三晚，其中兩個full day會day trip形式去玩附近o既Cordoba(真近，少於一個鐘頭車程)同埋Granada(其實都唔算太近…要坐三個鐘火車呢~)，所以真正係Sevilla只係頭尾兩個半日，冇辦法啦，時間有限~

因為Cordoba較近，所以我哋可以晏少少起身，輕鬆少少，Sevilla o既酒店Petit Palace Santa Cruz有包自助早餐，我哋得兩餐食咋，因為Granada嗰日要太早起冇得食，所以今日要好好享受一下~

哇，好豐富~一般世界性o既西式自助早餐o既當然有啦，麵包、果汁、cornflakes、炒蛋、水果…但最令人驚訝o既係「西式」，i mean西班牙式o既特式早餐，當中有媽媽菜式o既皇者tortilla(薯仔蛋餅)，非常多種類o既風乾火腿+腸腸，同埋非常多種類o既芝士﹗一朝早都試唔晒呢~係酒店個網網度有圖片顯示有個露天o既早餐區，但可能人唔太多冇開放呢，如果天氣暖啲坐出去應該更正~

http://en.petitpalacesantacruzhotel.com/

我哋酒店o既門口~外面係Santa Cruz o既古老外型，裡面就係非常現代化o既舒適酒店，都唔錯，推薦~

尋日係Santa Cruz打滾咗大半日之後，我哋可以好confi咁樣唔行錯路去到心目中o既巴士站，再加上我放膽用西班牙文問一問，yeah，成功搭到巴士去火車站~原來都好近咋~

輕鬆抵達火車站~因為Sevilla去Cordoba火車班次好多，而且我哋一早係巴塞隆拿時上網買好火車飛，今次我哋終於可以一齊坐啦~

沿途風景終於唔係黃黃啡啡o既一片沙土了，今程係無邊無際o既農田，雖然冇人同我哋confirm，但我一早已經斷定呢啲係橄欖樹了，西班牙盛產橄欖油喎，而且心目中o既橄欖樹好似係咁o既形態的…有冇人可以話我知係唔係？

到咗Cordoba了~旅遊書有講搭車或行路去景點區o既方法，反正行路都唔遠，又冇咁易迷路，我哋去tourist information centre拎咗免費地圖就出發去﹗睇好地圖，唔唔，要經過公園，行到尾，就入去似Santa Cruz迷宮一樣o既猶太街區同埋堆景點，到時就要打醒十二分精神了~

再次見到我喜愛o既橙樹~

點解見到咁多次都仲咁興奮呢？係Sevilla o既橙都仲係青青的，嚟到呢邊多好多轉咗金黃色o既橙了~

你睇啲街幾窄？﹗架車過去時都危危乎咁~究竟啲司機點記得啲路邊條係邊個方向，由A點去B點係點行呢？我哋用腳行就話可以隨時掉頭啫…

經過肉店，肉類除咗有我哋熟悉o既牛肉、豬肉、雞肉之外…吓，仲有兔肉？嗚嗚…可愛o既兔子…大家知道嘛，其實西班牙海鮮飯o既經典配方其實係有兔肉的，所以我哋叫海鮮飯都要好小心，記住係海鮮飯而唔係雜錦飯，如果唔想食兔肉的話~

迷人o既白色城鎮，令我諗起當年去印度都有粉紅城市(13-5-2008：粉紅城市jaipur)、藍色城市(15-5-2008：印度最佳景點‧mehrangarh fort)同埋白色城市呢~搵次真係要去下希臘o既Santorini，體驗一下浪漫o既白色山城~

去到接近景點o既街道，變得熱鬧起來，周圍都賣紀念品，知道我哋冇行錯路了~

雖然唔係Santorini，但都有少少浪漫情懷吧~到咗我哋Cordoba第一個景點—-清真寺了，因為內容太豐富了，所以決定要俾佢獨立一篇blog囉~下一篇見~

待續

前住其他西班牙旅遊blog

Comments

comments