2-11-2013:西班牙day 3(part 1).融入大自然的典雅殿堂@巴塞隆拿

幾乎嚟到巴塞羅拿,我哋先至睇啲旅遊書睇得detail啲,決定咗邊啲叫做「必去」,行程先至陸陸續續咁走出嚟,好起初時,兩大「必去」包括聽日會去o既聖家堂,同埋今日去o既Palau de la Musica Catalana﹗

出發之前,先食個早餐~我哋今次住Barcelona Princess Hotel冇包早餐,落去酒店餐廳睇睇,得自助早餐,要19歐羅一位,早餐嘛,冇必要食到咁貴,又唔係特別特別想食自助早餐,反正我哋酒店對面好多餐廳,睇下有冇啱食囉~SONY DSC

見到陽光晒落嚟啲露天枱椅就好鍾意了,就食正對面嗰間啦~combine breakfast

不過都唔平,每份早餐要9.50歐羅,嚟到西班牙o既第一個早餐,係American、British同埋Spanish早餐之中,梗係揀Spanish早餐啦,內容係一杯橙汁、一份西班牙火腿三文治、一件tortilla(薯仔蛋餅)、一杯咖啡~個包真係食到嘴到攰+損,好硬同埋好大件,果然好充實,好耐都冇肚餓~呢度個tortilla係食咁多次之中唔算特別好味,佢o既「含薯量」比較低,蛋多,但調味唔係好夠鹹,所以後來食o既好味啲~陽光中o既早餐真好﹗可惜係香港冇乜啲咁寧靜咁闊o既街度可以慢慢歎,可能平日去黃金海岸都有呢種效果o既~

食飽飽唔係出發去Palau,而係要完成尋日未做到o既嘢,我哋番去酒店上網睇睇啲火車飛~我哋拿拿林買好嚟緊長途巴塞隆拿去Sevilla(西維爾)嗰程火車飛先,雖然買到我哋想買o既班次,但都係要分開坐呢~SONY DSC

我哋由Passeig de Gracia出站,哇,即刻感受自己去咗歐洲~之前冇咁明顯o架,尋晚由機場搭火車嚟Barcelona,酒店呀、Camp Nou球場呀,都係比較現代化o既東東,直到呢一刻先見到咁多歐洲式建築﹗

我哋正躊躇點樣行,係度研究地圖之際,有個好friendly o既本地人問我哋去Palau,佢一指,哦,原來轉個彎就係,非常近,唔該晒~ 🙂SONY DSC

哇,見到條長龍,因為旅遊書講,每時段有限定參觀人數,所以如果嚟緊嗰團full咗可能要等成個鐘甚至要下晝至有得睇,希望ok啦~結果我哋join o既英文tour都好快出發~排隊時有人派啲小冊子,推介今晚係Palau進行o既西班牙結他表演,既然夜晚都冇特別plan要做咩,不妨買飛嚟睇下啦,順道真正感受下呢個表演場地o既魅力嘛~

SONY DSC

呢個就係我哋今晚睇o既結他演奏家了,佢都係叫David丫﹗後來返到嚟香港係youtube search佢,佢都有自己o既channel呢~IMG_1645

售票系統揀位時好立體,你可以直接知道自己係Palau入面o既位置~SONY DSC

好,開始guided tour了,帶我哋o既導賞員講o既英文充滿catalan口音,要好留心聽丫~我哋係呢個小練習廳先聽聽關於Palau o既基本o既資料,睇咗一段video,之後就正式邊行邊睇了~SONY DSC

Palau係1905至1908年之間建成,樓梯級都充滿古典氣息呢~SONY DSC

呢個玻璃廳係表演者係出場前預備o既地方,成個Palau都以置身大自然為建築概念,出面o既兩層柱子增加咗空間感,感覺同對面o既building冇咁近,而柱子上面o既係圖案係各式各樣o既花卉,令人好似係花園入面咁~SONY DSC

入去場館了,不由得叫人嘩一聲驚歎~~~好華麗,好色彩豐富~真係好靚~combine concert hall

各個雕塑都各有故事,details唔係好記得,但大概講,呢個音樂廳包容所有形式o既音樂,古典、現代、另類~所以你雖然睇呢度好高貴典雅咁,呢度其實都會舉行rock concert o架~而對我哋而家o既人嚟講唔算創新,但二十世紀初時,係呢度組成咗第一隊女子合唱團,係非常新穎o既一件事~

左下嗰個彩色玻璃天花,其實係代表樹林裡面o既太陽,以前啲音樂會多數日間舉行,真正o既陽光透過彩色玻璃入嚟,就真係會發光了~至於天花板o既玫瑰花,每一朵都係陶瓷製,而呢個音樂廳現代化、要安裝冷氣o既時候,啲出風口就好巧妙咁俾啲玫瑰花掩飾咗了~SONY DSC

落到去舞台前,舞台上o既雕塑係彈奏各種樂器o既女神,之前睇嗰段短片時,啲音樂家話係呢個舞台上演出時,自己同時都係欣賞緊藝術呢~SONY DSC

guided tour專登播咗一段風琴音樂俾我哋聽,感受一下係宏偉殿堂時o既莊嚴氣氛~SONY DSC

演出單位比較人少時,原來可以加多啲椅子~不過個場館其實都唔係好大,好似只係容立到千幾人o架咋~SONY DSC

舞台頂部話以前係通窿o架,音樂可以直通建築家二樓o既住家,但後來佢過世後,改裝成為office,要封番層玻璃,雖然悠揚悅耳o既音樂去到office係好啫,但office啲人o既講嘢聽落咗去音樂廳就唔得掂~SONY DSC

坐下個貴飛位先~SONY DSC

柱子都裝飾得好靚呢~SONY DSC經過少少改建,而家o既Palau外形上都好現代化了~

好啦,我哋要去搵食啦~我哋今晚會返來Palau睇表演的~

待續

前住其他西班牙旅遊blog

Comments

comments

在《2-11-2013:西班牙day 3(part 1).融入大自然的典雅殿堂@巴塞隆拿》中有 8 則留言

  1. 個早餐好貴,我個時係西班牙好鐘意食tortilla~
    我都唔知巴塞隆拿有Palau de la Musica Catalana這個地方,果然好靚~特別係個彩色玻璃天花~

    • 係呀,所以嗰日之後冇再食過咁貴O既早餐,之後嗰朝即刻買麵包食﹗
      tortilla我覺得視乎一間間啦~
      個palau旅遊書話必去嘛,我哋咪去睇囉~個guided tour好好~

  2. 巴塞隆拿我印象最深刻的是逛巿集,很多真人扮假人,扮相多樣化,而且十分專業,一動也不動,眼也不眨,無論你怎樣逗他,也不為所動。

    • 我哋之後嗰日夜晚行Las Ramblas o既最尾一段靠海嗰邊就真係有好多呢啲街頭賣藝人了,扮鬼扮馬~

  3. 這個音樂廳入選為世界文化遺產,真的不簡單,值得一遊。就像我們去北京,參觀國家大劇院也要買票,30元1 張門票,雖然賣票看表演時容許半小時前進場,也可順道參觀,但始終不及專程去細看。你們還有導賞,那就了解得更多,更深刻了。

    • 有真人導賞,佢哋會睇下你o既反應,興趣係點從而講解上有加加減減,比起租用audioguide更好,始終雙方面o既interaction總好過單方面o既資訊傳遞丫~

    • 你好Karen﹗歡迎到訪我個blog~
      我哋十一月去天氣都幾舒服呀,而且幾乎都天晴,你睇我哋啲相入面嘅裝束都好輕便,尤其近海嘅Barcelona,一件短袖tee再加外套都ok,Madrid係內陸地方而且係旅程嘅尾就凍喇,要加埋厚衛衣至得﹗我覺得十一月去都唔錯~

發表迴響

你的電子郵件位址並不會被公開。 必要欄位標記為 *