23-10-2013:QB剪髮 vs GOPD睇醫生

最近由yahoo blog搬咗過嚟自家製wufamilyblog.com之後,執咗一執啲陳年blog,少時冇大冇細,唔見得人嗰啲日常blog我已經盡量收埋咗佢哋…:p嗰陣真係乜都寫,而且原來嗰時已經開始展見咗我o既OC個性(OC=obsessive compulsive,話說好多醫學生/醫生都有呢啲特質),嗰陣真係事無大小都寫咗嚟,唔可以有啲遺漏,嗰日唔得閒寫o既都要之後嗰幾日補番,那管只係雞毛蒜皮o既平淡日常生活﹗﹗所以嗰陣人哋話我好有恒心,我當時都唔覺,但而家睇番轉頭我都好覺…哈~

講咁多做乜?因為其實近年都好少為咗平淡o既日常生活寫blog,主要都係打下啲旅遊blog,記低啲比較特別又有紀念性o既事~但今日剪完頭髮都好想記低番落嚟~

睇咗我blog好多年o既blog友+現實生活o既朋友都見證住我由醫學生變成一個醫生,而家train緊family medicine(家庭醫學),而家係HA o既GOPD(普通科門診,即往陣時叫o既「街症」)工作~有啲少見o既親戚朋友會問我「近排忙唔忙呀?」,其實我哋冇分幾時,日日都book滿晒o架啦,總之要睇完book咗自己嗰間房啲症~

為咗星期日o既考試,專登去剪咗個髮~(點解要咁大陣象?因為唔係做試卷嗰種考試,而係有examiner睇你現場對答表現的,所以外觀唔計分都有關乎印象~)而我同老公最近我諗都有四、五次左右,冇去傳統o既髮型屋,轉咗去$50、10分鐘o既日本速剪QB~

top_16

其實我最初話俾你聽都覺得有少少尷尬,因為作為女性,去呢啲「佬」o既髮型屋,好似係唔講究、隨便o既表現,但而家我越嚟越覺得呢個係好o既選擇,因為—-真係好似去GOPD睇醫生~

今日我剪完頭髮,好想同嗰位髮型師講,我下次可唔可以搵番你剪呀?心裡面即刻冒起平時啲病人同我講:「胡醫生,我下次可唔可以睇番你呀?」咁~

去GOPD睇醫生雖然平,連診症包藥只係$45,確實只係睇幾分鐘~但同QB House一樣,一樣會有好o既髮型師/醫生~

而且QB髮型師一日剪幾十個頭(我哋estimate過如果不斷剪、剪八個鐘,應該有三十幾個),剪得三個月已經好有經驗~正如唔同見啲政府醫生咁後生,其實因為patient load大,所以「見o既世面多」,後後生生已經累積唔少經驗~

冇得揀醫生/髮型師,你都會有驚喜,但要存有平常心,你未必會遇到最好o既,但總會合乎基本o既水準,好似今日我見到好o既髮型師喇~

同睇醫生一樣,都係視乎雙方o既溝通係咪efficient + effective囉,你想人哋俾到你想要o既嘢,你要簡潔、精準咁描術,兜下圈、講到離題咁就好難滿足到你啦~

當然一直睇同一個醫生梗係有好處啦,有我哋fam med好注重o既continuity of care,如果個髮型師好了解你o既脾性、喜好,當然你哋之間會配合得好好,正如家庭醫生一樣~不過我想講o既係,其實GOPD都有好醫生﹗﹗ 🙂

__ (1)__

冇乜特別?佢咪乎合到我o既要求囉~就係咁簡單﹗ 🙂

Comments

comments

在《23-10-2013:QB剪髮 vs GOPD睇醫生》中有 2 則留言

  1. 唉,有幾多人可以精準咁講清楚自己的要求呢!要判別那些是關鍵詞,那些是廢話,對一般人來說,也不是簡單的事。所以老師常批評學生文不對題,詞不達意!

    • 有啲人真係天生識講,發覺識唔識講重點,真係同年齡、學歷、職業、病o既嚴重程度…係一啲關係都冇﹗﹗有啲好老o既文盲阿婆都可以講得好清楚,但有啲好後生都會一舊舊,所以我哋話,讀書時啲說話練習可唔可以教下學生點樣同醫生講病情?﹗

發表迴響

你的電子郵件位址並不會被公開。 必要欄位標記為 *