19-8-2013:即興曼谷day 4.至高享受Oasis Spa

嚟到最後一日行程,一定要講last but not least,其實呢個係我心目中最重要o既行程,就係去做spa了﹗﹗

之前講過啦,上一次嚟泰國時考完A-level(如果咁啱有而家o既中學生入嚟睇我個blog,就唔知A-level係乜東東了,咪就係類似你哋而家考DSE咁o既公開試囉~),嗰陣用咗係惠康做咗兩個幾月part-time o既人工,一個月o既人工用嚟買咗部數碼相機,一個月o既人工去咗曼谷旅行,當年仲係趁住SARS完咗啲旅行團好平至去得到(heehee,暴露年齡﹗),我哋嗰陣去o既曼谷芭提雅6天團團費只係$899咋,當然加埋啲林林總總都要二千幾啦~講咁多唔關事o既做乜?我想講o既係,自己出錢去旅行已經好難得,其實已經冇太多extra錢可以做啲自費項目,我有花o既鉅款除咗加多一個鐘做泰式按摩之外,就係玩咗香蕉船了﹗記得嗰陣團入面有兩位女士參加咗spa o既自費項目,好羨慕﹗我不嬲都鍾意按摩,而且其他spa treatment都好喜歡﹗係香港只能夠趁住團購or其他特殊機會做一至兩項treatment,要好大陣象咁幾個鐘o既spa,真係要去泰國至捨得呢~數做過o既spa,之前都有o既,第一次係去宿霧時,嗰個係按摩+facial+pedicure,都唔係好經典o既項目(請參閱:17-12-2008:海裡水中游)~真正做過spa o既,應該係honeymoon時去Fiji,嗰次有scrub+wrap+massage+facial,個blog我就未寫,完成今個曼谷blog之後我會補寫2011年o既honeymoon trip個blog~另一次係有spa氣氛,去海南島三亞o既Renaissance酒店o既spa,但因為價錢太貴,我哋只做咗夢寐以求o既熱石按摩only(請參閱:1-10-2012:三亞悠閒遊day 2.全程hea@Renaissance)~

我同家姐講,我o既要求係要有好多item,做好多個鐘,乜都有嗰啲~我哋都冇咩特別心得,上網click click click,揀咗呢間Oasis Spa,主要睇佢啲圖片見到環境好靚,而且睇spa menu,啲package有我所期待o既四個鐘treatment樣樣有啲嗰啲,所以就book咗喇﹗﹗

大家可以入佢個website度睇下:

http://www.oasisspa.net/home.php

其實要講做spa之前都要講一講我哋前往spa時o既討厭經歷,我哋做完spa就直接去機場啦嘛,所以我哋帶埋啲喼搭的士出去,由酒店出發搵咗concierge同我哋call的士,職員已經一再交帶司機一定要用跳錶,佢司機起勢咁應承,但架車轉咗個彎,離開咗酒店門口o既視線範圍之後,司機就同我哋講價錢囉,我哋堅持要跳錶,搞到要同佢講跳車佢至肯,結果跳錶o既價錢好似係佢開價o既三分之一左右,唉,我哋見佢哋曼谷時時塞車,生活都艱難,所以俾番多少少tips佢囉,但佢咁樣監人唔用錶真係叫人生氣丫﹗CAM00594

好喇,嚟到Oasis Spa,要放低憤怒,要平靜心境,好好享受未來呢幾個鐘了,個大堂已經好寛敞舒適,有個泰國版梁烈唯職員接待我哋,好溫柔好誠懇o既服務態度~CAM00595

先奉上蘭花伴碟o既清茶毛巾,等貴客休息一下…CAM00596

慢慢睇睇spa menu~

其實我哋一早已經上網book咗package,俾埋錢添,因為我哋可以自由選擇scrub o既味道,都要係度再揀~我book咗5700 baht,做足四個鐘o既Oasis Experience,當中包括thai herbal steam、body scrub、body wrap、浸浴、四手按摩同埋facial,同朋友講起佢哋覺得係泰國做spa都要千幾蚊港紙好似好貴咁,但真係物有所值,係香港做同一樣o既應該都起碼5700,但唔係baht而係港紙囉~Oasis Spa o既檔次真係用day 1 o既centre point massage差好遠,錢肯定係值得咁樣花的~CAM00600

係靚靚環境先坐坐,等職員帶我哋過去treatment room~CAM00602

Oasis Spa本身就好似一楝mansion,入面有無數o既房間,仲有自己o既花園水池,環境清靜優美~

我哋當然係私家o既二人treatment room啦~CAM00603

附設本露天浴室﹗有圓形大浴缸同埋露天shower~

職員先安排我哋沖完涼之後做herbal steam,其實就似平時去gym時o既蒸氣浴,但飄過嚟o既steam有陣陣藥草香味,感覺身體一個個毛孔慢慢張開呢,角質層軟化後,之後o既scrub同wrap應該都更有效吧?CAM00604

仲完身之後入去房間已經預備好唔係呢個樣,而係方便scrub o既防水模式了,家姐揀咗咖啡醒神scrub,我就揀咗蜜糖香橙scrub,一樣咁清新﹗之後o既wrap我瞓著咗了,身體漿住黏黏o既body mask,裹上層層保鮮紙,暖暖咁係裡面瞓著~CAM00605

呢個就係沖身o既半露天shower,抬頭係藍天同埋樹蔭,聲音唔係音樂而係雀仔叫聲,又有私隱又貼近大自然,好good o既設計﹗

我哋沖身後就到浸浴部份啦,豐盈o既泡泡加上香味,成個人都鬆晒,華麗之處係浸浴前職員已經事先架上太陽傘,唔會曬親我哋,仲準備咗薑茶同埋水果串俾我哋邊浸浴邊享用呢~CAM00606

連洗手盆都精心佈置呢~

浸浴後再沖身就入去做四手按摩,雖然左右兩邊按摩師未算百分百合拍,但都屬於好高質素,按摩力度輕柔,唔係therapeutic type,係relaxation type,正適合成個package o既風格﹗到做facial時我又再次進入昏睡狀態了~

完成treatment了,感覺成個身體都放鬆晒,皮膚都鮮活得發出光芒呢~係咪好誇張?但如果再去曼谷,spa一定要再做啦,可能都要去番Oasis,因為唔知第二間有冇咁好~SONY DSC

我哋做完spa之後,打算食埋lunch就去機場了,問spa職員附近有咩食好,我哋話都想食泰式,佢哋安排咗自己司機載我哋去,由spa出嚟左轉轉右轉轉,好似轉到好遠咁,要咁遠至有餐廳o既咩?終於係呢度門前面落咗﹗

我哋坐低先知道間餐廳大有來頭﹗

http://www.baan-khanitha.com/

見餐廳裝飾得靚靚的好高雅,牆上貼滿咗好多獎狀,上網一search至知原來係曼谷數一數二o既餐廳,我哋無啦啦去咗名店呢﹗好在價格都ok,係曼谷嚟講係超豪餐廳,價格對比香港嚟講算係間負擔得起o既靚靚餐廳啦~SONY DSC

呢個頭盤係送俾我哋食的﹗上番佢個官方網站至知叫做meang kam,我哋對住呢個似全盒o既東東唔知點算,waiter教我哋要用葉子卷成cone狀,放啲粒粒落去包住食,見啲粒粒都係味道強烈o既辣椒呀、蒜呀、青檸呀咁,合埋一齊又出乎意料之外o既調和bor~好推介﹗SONY DSC

湯王(即是我)話要飲湯,我哋好豪氣o既叫咗一人一份椰汁海鮮湯,有超大蝦係入面呢,湯汁好鮮美,但都辣,喊住食~正~combine fried food

失策少少o既係叫咗兩個主菜都係炸嘢,分別係炸魚同埋炸軟殼蟹,如果多樣溫和少少就好啲~唔係唔好味,但太熱氣了~:p

我哋搵餐廳幫我哋call的士,今次司機老實了,真真正正的跳錶,先載我哋返spa拎行李,就去機場咯~combine airport artwork

機場見到呢個大型雕塑,係咪人類同鬼神之爭?SONY DSC廁所外面有呢個攝影機,hee,見到我哋嘛?

呢個曼谷即興relax之旅到呢度就完滿結束啦,雖然只有短短四日,但都夠豐富了,好快令我心思思想再去泰國我諗非因為spa莫屬﹗﹗可惜而家政局混亂,恐怕都要遲三幾年先再去咯~

曼谷即興之旅blog完滿結束

前往其他泰國旅遊blog

Comments

comments

在《19-8-2013:即興曼谷day 4.至高享受Oasis Spa》中有 4 則留言

  1. 我上年復活節去左清邁店,園林木料設計,環境好正,感覺好舒服。

  2. 看來比我和爸在機場富豪酒店spa房享用的spa套餐更好呢!至少在按摩時能讓妳舒服的睡著,那次那個按摩師替我按頭部的時候,差點睡著呢,不過想睡的不是我,是她。

    • 泰國真係出名spa好嘛~等遲啲局勢又好啲時再去囉~泰國都仲有好多地方未去過﹗

Rita 發表迴響 取消回覆

你的電子郵件位址並不會被公開。 必要欄位標記為 *