我哋逛完市場，跟兩位導師搭番BTS返去廚藝學校，被領到上去最頂嗰層，我哋網上預約o既group要先交學費，跟住就入去課室啦，我哋o既靚仔廚藝老師Nut已經等緊我哋啦~
課室分兩邊，一邊就係以上o既示範室，老師用o既工作枱、爐灶都一應俱全，我坐緊嗰度有成三四排椅，一班廿幾個學生就坐係度聽課﹗我哋o既上午課程有四道菜，形式上都係逐道菜先睇老師示範再過去實習，所以都來來回回兩邊走咗幾次~大家領取咗禮物包就紛紛坐低了，禮物包有咩？有好正經o既講義食譜啦，有最令人雀躍o既blue elephant logo圍裙啦(可以拎返屋企的﹗﹗)，仲有blue elephant自家出產o既餸菜調味包~每人仲有一支水添，非常體貼﹗
開始lu開始lu~Nut講的英文好顯淺易明，所以大家都好投入﹗今日o既四道菜同網上所講o既一樣：
以前泰國菜就食得多，今次先第一次自己整，佢哋用香料香草用得多就眾所周知，原來用o既方法都同我哋中國人唔係好同，為咗要令香草o既香味更加發揮出嚟，佢哋用我哋好少用o既工具—-杵去煮食，將啲香草稍稍切細，再放入個杵度督督督，壓成pat pat狀，再放落鍋度炒，好似話咁樣可以將啲香味發揮得最好﹗Nut話，娶泰國老婆要睇下佢用個杵時o既神態如何，因為用杵時可以令真性情表露無遺，究竟一個女子係溫順丫定係惡死丫，一定要入廚房望下~
哇，Nut老師o既第一、二道菜上碟啦~真係不單止要美味，擺盤都同樣重要呢，俾著我就唔識咁樣用三塊葉子去砌出層次了﹗
我哋未開始實習之前，先品嚐一下老師o既手勢﹗﹗蟹肉雞肉蒸蛋餅真係好食得無話可說，好想返嚟香港馬上再整，但…拆蟹肉出嚟我都係冇耐性o架啦，加上我都唔係好敢同隻生蟹搏鬥…而罐裝蟹肉唔知做唔做到嗰種效果呢？非常鮮美，正﹗咖喱牛肉香料好惹味，稍辣但都可以接受~
靚靚的擺盤~
炒粉絲應該係之後先煮的，但想俾大家睇睇老師o既藝術觸角同埋刀工，所以放埋一齊囉~
我哋實習時o既狀況，兩邊o既爐頭圍住圈咁煮，仲間有啲助教隨時協助一下我哋，熟未呀，大細火之類~
呢個廚藝班簡直係洗腳唔抹腳o既極至，細個時讀中學上家政堂，煮o既過程反而唔係最深刻，最記得o既係要洗洗洗洗洗抹抹抹抹抹﹗家政老師會check你隻鑊夠唔夠「令」，啲碗夠唔夠乾囉~屋企都係晾乾啲碗之嘛，但家政堂要逐隻抹乾任何一滴水﹗但係blue elephant呢，你要用o既材料已經完全按人頭分好晒，砧板、鍋子全部都已經乾乾淨淨，至於煮完一道菜我哋返過去Nut老師嗰邊聽書時，下一道菜o既材料又已重新預備好，燶咗o既鍋？唔知去咗邊lu~所以個course貴就係咁o既道理囉~大家唔好太陶醉，返到屋企煮同一味餸就唔係咁爽啦，呵呵~
到我哋o既蟹肉雞肉蒸蛋預備好，可以蒸lu~你睇啲份量預得幾啱啱好？我哋每人都有一個編號，要蒸食物時貼個label係隻碟度，助教們會幫我哋放入大蒸籠，煮熟後就可以領取番自己嗰碟啦，唔會搞錯~
好開心呀~
煮泰國菜用好多香料，其實對於我呢啲鼻敏感人嚟講都有少少困難，用個鍋一爆香，啲味攻得好緊要丫﹗大家個鼻都會忍唔住嗡下嗡下，甚至乞嚏乞嚏~
我哋學齊晒四度菜啦，而家係頒發證書o既時間﹗
yeah~畢業了﹗
之後就係享用個人成品o既時候﹗我哋坐咗兩圍枱，啲鬼佬旅行團自己一圍，我哋亞洲人一圍，其實我哋嗰圍只係三組人，我同家姐啦，四個香港嚟o既講英文女仔啦，仲有一個單身男士，嗰幾個女仔比較洋化吧，搭一搭訕，知道咗嗰位男士原來係韓國人，隻身嚟到泰國學煮嘢食，佢報咗名上一星期丫﹗難怪頭先Nut老師冇派cert俾佢啦~唔知咩情況會上一個星期呢？明明有另一種professional course o架bor，如果係專業廚師應該唔會join我哋呢種柴娃娃班吧？
我哋o既製成品都好好味呀﹗不愧係blue elephant o既recipe，但點解好似味味都冇Nut老師整得咁好食o既呢？呀，呢度仲有一樣好，就係白飯任裝﹗呀唔係，正確嚟講係黑白飯任裝，仲有黑糯米煮o既飯添~有唔同口味唔同質感，黑飯比較煙韌，更配重口味o既咖喱~
不得不提呢個令我超感動o既甜品，免費贈送o架﹗睇個樣估唔到係咩口味吧？佢係茉莉花味雪糕，真係好—-好—–食—–丫﹗清新到好似個口開咗朵花咁~正好洗淨咗口入面o既濃烈味道，10個推介~可以同佢媲美o既就只有松阪牛燒肉嗰次附送o既柚子雪葩~(請參閱：25-11-2009：大阪白浜day 2(part 3)．回味無窮松阪牛燒肉，by the way，呢篇blog好似已經俾我係其他blog quote咗好多次出嚟…:p可想而知佢係我心目中份量有幾重﹗)亦因為呢個茉莉花雪糕係咁令我傾心，返到嚟香港有次同屋企人去沙田Hyatt Regency酒店o既中菜沙田18食飯，嗰度有好多特別口味o既雪糕，我不得不再次叫一個茉莉雪糕嚟食去回味一下今次囉~我就冇寫呢餐飯o既blog喇，有興趣可以去我家姐個blog睇佢o既「沙田18 燒味最強」~
好高興o既一個早上，又學到嘢，又好玩，大家再去曼谷玩時都可以試下去blue elephant學煮嘢食丫﹗
報名可以去：
http://www.blueelephant.com/cooking-school/
待續
前往其他泰國旅遊blog