16-8-2013:即興曼谷day 1(part 1).抵達酒店周邊

究竟有冇試過淨係得我哋兩姊妹自己去旅行呢?都叫有o既,當年我F.5暑假,家姐大學時爹媽俾我哋兩個暑假去Brisbane讀一個月英文summer course,嗰陣都叫係我哋兩個去,但去到都有好多香港呀、亞洲呀其他同學仔一齊玩~後來去日本中部嗰次除咗我哋兩個,又同埋高高一齊去啦~所以真真正正我哋兩個去,今次都似係第一次﹗

個trip o既起緣其實真係幾即興,有一日我哋一齊坐車時講到我哋好多大假,但老公們(姐夫and day)都假比較少,要清下假,不如我哋結伴去清下假啦~呵呵~去邊,我話想去Bangkok做spa,就咁決定啦~家姐又真係好多年冇去過泰國了,其實佢上一次去,已經係小學時family trip時去,去過一次而已~我就多佢一次咁大把啦,F.7考完A-level,用去惠康收銀賺o既$$同同學仔去玩咗6日,嗰年啱啱SARS(暴露年齡﹗﹗哈~),啲旅行團團費極平,我仲記得新華o既6日團只係收$899,當然仲有好多其他收費啦,但平都係真o既~

所以今次呢個trip都幾難得~平時返工咁辛苦,真係要鬆一鬆至得~我哋照舊搵咗菊姨幫我哋訂package,開頭我話不如住Banyan Tree啦,平時去邊都唔捨得住,好似Bangkok o既冇咁貴住得起喎,菊姨話Banyan Tree好舊,提議我哋住新開o既Novotel Platinum,好啦試下啦,反正我對曼谷都唔熟~我哋今次坐泰航,超早機去超晚機返~天未光就出門口啦,好在家姐駕車載埋我去機場~SONY DSC

今次係Terminal 2,超少人,去到過關都路路暢通~CAM00365

因為太早起身了,早餐都要去到機場解決,家姐話不如唔好食麥當勞,又要排長龍,食物同平時差唔多又貴~我哋結果買咗隔離嗰間coffee shop,家姐當然要先充電啦,我戒咗咖啡之後變成自由人可以飲朱古力,我哋share咗個三文治,因為上機有得再食嘛~不過咁樣埋單都要成百蚊…>.<算啦算啦,都幾好味~CAM00368

指定動作﹗SONY DSC

指定動作2—-我哋今日就係搭呢架飛機喇~CAM00369

食過三文治,飛機餐有得揀中式梗係好啦,變下款嘛~不過都少少食而不知其味,我哋要趁短短o既機程睇完套戲~今次揀咗<<百星酒店>>,呢啲比較無聊o既港產片真係連買VCD返去睇都唔會,最多都係過年時電視播下可以睇下嗰類,因為泰航唔係太多片有字幕,所以呢套輕輕鬆鬆就啱啦~雖然故事冇乜咩睇頭,但吳君如同埋毛舜筠都確實做得幾好笑,幾好幾好~SONY DSC

話咁快就到咗曼谷o既機場啦~咁耐冇嚟過,嗰陣係咪同一個機場?我都唔記得了~過關拎行李都ok順利o既~離開機場之前有重要任務﹗﹗第一樣係換少少錢出咗機場先啦,大家記住係機場唔好換咁多,因為個rate真係比市區差好多o架﹗﹗而且周街都係找換店,真係夠搭的士出市區就好了~SONY DSC

仲有另一件更重要o既事…排隊買咩?SONY DSC

因為家姐睇書知道啲上網卡好抵,所以專登帶定部電話嚟hotspot俾大一齊用,4日用1GB,簡直就係無限上網啦,某程度上我覺得佢仲快過平時係香港用Smartone上﹗﹗

好啦,我哋去搵的士搭了~

SONY DSC

呢條扶手電梯咁得意o既,又平又斜又平又斜~SONY DSC

去到的士站,見到大排長龍…唔係乘客大排長龍,而係啲司機﹗﹗原來泰國啲司機真係好鍾意濫收費用,所以係咪為咗維護遊客對泰國o既形象(?),所以機場搭的士有保證,一定會收費公道,但司機要登記,遊客要俾多少少「保證費」~SONY DSC

 

我哋就係搭咗呢架的士了~

本來由機場出嚟車程都好快呀,我哋係車上已經急不及待咁試張上網卡,打下卡,非常爽,但去到曼谷市區就真係唔爽了,第一日已經充分體驗到曼谷o既討厭塞車問題~明明望到酒店好耐,塞下塞下都搞到好耐至去到~CAM00376

到酒店先有welcome drink~係香茅o既清新味道~

房間未可以拎住,我哋放低行裝,出動去也~今次節目輕鬆,下晝主要逛商場,黃昏時份約咗個按摩,係咁隨意啫~SONY DSC

酒店大堂o既可愛雕塑~SONY DSC

泰國限定sawadee麥當奴叔叔,我10年前都有影過類似o既相呢~

我哋向Siam Square方向行過去,不過原來係曼谷搵路都唔係咁容易,因為你係街上基本上搵唔到條街名,係要靠手機地圖定位嗰粒會郁o既點點先知前後左右,好在有上網卡,搵路都易啲~SONY DSC

曼谷真係四處都有好多街邊嘢食,我哋一出門口冇耐就試下先了,試下個烤香蕉先,煙煙韌韌的,香香甜甜的,幾得意~

待續

前往其他泰國旅遊blog

Comments

comments

在《16-8-2013:即興曼谷day 1(part 1).抵達酒店周邊》中有 2 則留言

    • 不像薄荷,是淡淡的、清新的、優雅的,找一次去些香薰店找給你聞一聞,想像一下!

Rita 發表迴響 取消回覆

你的電子郵件位址並不會被公開。 必要欄位標記為 *