行完現代美術館我哋經過Bexco過去Centum City~

Bexco就好似香港o既會展一樣，我哋都諗住睇下有冇啲啱睇o既展覽去八卦下，不過有啲有趣o既就要再隔個禮拜至有，有啲一般般有趣o既又要行好遠o既行人天橋先過到去另一楝building，算啦，叫做到此一遊算了~

天然採光設計…

做呢行o既人對於呢啲嘢特別敏感…幾好丫，咁方便o既位置可以俾啲市民量下血壓~等人冇嘢做量下、專登行過來量下更好，順便多啲走動~

Bexco o既斜對面就係Centum City了，話說呢度係(?全世界/?全韓國)最大o既百貨公司，最大o既商場肯定冇佢份，但咁多層樓都係百貨公司又確實係少有o既~我哋要嚟呢度有兩個原因，一樣就係我哋打算聽日嚟呢度o既Spaland，好好視察一下先，二來就係，Centum City其實有兩次係Running Man o既景點嚟o架~

一次係同李多海玩追逐戰，嗰次全人類都係spy，而李多海就要剷除全部人~場景就係商場裡面，另一次就係Spaland入面，邊一集我唔記得了，佢哋分組玩啲小遊戲，其中有係足浴池入面踢毽子，要成組人一共踢到好似10下？另外又要用拳套接水彈咁~

由地底入口入去，先嚟個仿羅馬o既水池~

呢度有睇波o既場地o架，唔係現場，不過應該係一大堆人一齊睇電視好有氣氛嗰種？

我係度揀相打呢篇blog時見到縮細咗o既呢張相，咦，day職業病發作，影咗個溫度計？？放大嚟睇，哦，唔係，係Centum City o既樓層簡圖~我哋而家位於B2層，睇下去邊度啦~

我哋間住間住咁行咗好幾層，不過普遍啲鋪頭都屬高價位，所以冇乜買到嘢，係入去CD鋪買咗啲CD囉，買咗紳士的品格o既OST，之前係香港or yesasia.com冇齊上下兩隻CD，今次買到了~另外發現咗李民浩出咗專輯﹗﹗我平時鍾意睇佢做戲，由個人取向開始就鍾意了，之後每一套劇都有睇~但我都唔知佢唱埋歌，不過買咗番嚟好似一次都未聽完…因為，佢都係做戲好睇啲~始終靠人氣出碟好似都唔係太ok~

行到攰攰地，去溜冰場睇下~

好可愛呀，啲小朋友學滑冰~

但令人驚訝o既唔係佢哋有幾細個，而係…佢哋學o既係速滑﹗﹗而唔係香港常見o既花式溜冰~~有啲技術好啲o既小朋友真係有適當地擺手，同埋個人彎低落嚟呢~香港冇呢啲係咪因為已經夠晒人多擠逼？？

我哋結尾時落咗G/F o既Spaland睇睇環境，拎咗張小冊子，知道多少少入面o既架步，聽日就可以預備得好啲啦~好期待啊~我都未去過韓國o既汗蒸幕，舊年本身想去，但結果病病豬又去唔到~

我哋決定夜晚去食嗰個旅遊書介紹o既金正民烤貝，睇落啲烤貝好多種類，好大隻咁~希望食烤貝食個飽﹗﹗話晒去釜山係食海鮮嘛~生魚片就食過，老公敏感去唔到機張食蟹，烤貝聽落都唔錯丫~

跟住旅遊書o既地圖，好容易就搵到大概o既位置，但個入口呢？入口呢？好在識韓文(點讀only)﹗見到”kim-jung-min xx”了，原來係樓上鋪，但大堂點解黑麻麻o既？係咪真係仲存在？

確實仲存在，但生意比起我哋想像中冇咁好，有大量空位，同埋與其話似食烤貝o既餐廳，不如話佢o既裝潢更加似間pub，有得飲啤酒睇波嗰種，因為有長吧枱，有大screen，不過都有烤爐o既枱o既，確實都有客人食緊烤貝，冇去錯~

而且景觀一流呀﹗大窗口(有o既只係安全問題…)之餘，仲可以望到呢度o既重點—-廣安大橋﹗夜晚o既景觀特別靚呢~

好想去韓國時試下食飯飲下燒酒，雖然老公唔係太飲得，但咁多餐之中，好似烤貝最襯了，不如叫一支細細支啦，不過佢真係不好此道，一細杯都冇飲晒，我又唔敢飲咁多，之後仲要去行同埋搵路返酒店，都係點到即止好了~如果講酒嚟講，呢啲燒酒確實冇話非常好飲，啤酒or西式o既白酒or香檳我就比較喜歡了~但總算係風味o既~反而後來我哋買番香港o既馬格利米酒就真係幾好味~

主角出場了~~果然有好多款式同埋好大隻丫~正~

不過食o既方法同我想像之中好似有少少出入，烤到咁上下，服務員會走過嚟，剪咗啲貝肉出嚟，放入去加咗牛油煮到半熟o既金菇入面，仲會剪碎啲貝…咁係容易熟得透，安全角度係好，而且亦比較入味，可能味道角度都係好，不過問題係，都唔知食咗啲咩貝打咩貝，總之都幾鮮味啦~都幾好食，但滿足感方面好似差dd咁…

我諗大概食到六成飽啦，唔餓嗰種，我哋埋單落去行下~

當然要影影廣安大橋啦~

廣安大橋唔係Running Man景點，但就係海雲台的戀人們景點，我今次book咗去釜山啲東東之後就努力係出發之前睇咗海雲台的戀人們，等對啲地方多啲熟悉感同埋親切感~女主角話廣安大橋好靚，閃閃發光好似鑽石項鍊~男主角係失咗憶o既檢察官，由工作狂變咗做純真率直o既小伙子，女主角收留佢，買咗部手機俾佢，男主角第一次試手機就係佢哋去完廣安大橋之後了~

沿住海邊散步~金光熣燦o既繁華夜景襯住都市入面o既海灘，同椰林樹影o既熱帶海灘，感覺又好唔同呢，不過係城市中心有一個俾居民休憩散步拍拖談情o既地方都幾好~

自拍王出動﹗點都要影張合照啦~

回頭望，我哋食嘢o既就係呢間餐廳了~

我哋沿住海灘行，去到差不多盡頭，出番去另一個地鐵站搭車返酒店…

頭先嗰少少唔滿足同埋仲有未填飽o既肚子開始抗議~所以落咗車就兩頭望睇下邊度食「第二輪」~

係噃，我哋附近咪有海雲台市場o既，攰攰地，不如買番酒店房食啦~當然要食下今次未有機會食o既韓國街頭小食…當中o既皇者—-炒年糕同埋魚糕湯﹗﹗yeah~中間o既係情意結—-麗水留落嚟o既情意結—-甜米露~炒年糕同埋魚糕湯我冇意見，炒年糕仲要都幾好味添，軟軟有咬勁又入味，再澆上啲魚糕湯落去，味道更好~但個甜米露呢，我哋形容為「旺角口味」，如果之前係MVL飲o既係「五星級口味」的話，就係好直率o既糖o既甜味囉，而唔係嗰種米粒滲出嚟淡淡優雅o既甜味嗰種，不過呢，食呢啲街邊嘢係旺角口味襯啲o既，而且佢霸道o既甜味啱晒用嚟「救火」，因為個炒年糕越食越辣丫~好似臨尾day仲落咗樓下便利店買咗汽水？我唔記得了~

待續

前往其他韓國旅遊blog

Comments

comments