27-5-2013:釜山麗水day 3(part 1).海雲台、地道豬肉湯飯

要離開麗水lu,去釡山繼續行程﹗我哋嚟o既時候一早買好回程o既長途巴士車票,所以只要預好時間搭的士去車站就ok啦~SONY DSC

食過酒店o既自助早餐,但未能滿足老公o既基本需求…佢要啡一啡﹗係車站o既7-11逛一逛,韓國人真係好鍾意飲咖啡,種類繁多,俾我哋第一次發現呢種「袋裝咖啡」,原來有得咁樣一包包買,店員會俾埋膠杯同埋冰塊你,你自己搞掂﹗咁樣係咪會節省啲儲存空間?不過day話啲味道甜咗啲,所以啲冰融啲之後就好啲了~SONY DSC

麗水o既長途巴士總站~

瞓醒另一個覺就到番釡山啦~係熟悉o既沙上站落車,我哋直接搭地鐵去我哋o既酒店—-海雲台~舊年去首爾嗰次買咗交通儲值咭,今次係麗水同釡山都大派用場,一早增值好,搭地鐵、巴士一嘟就ok~SONY DSC

去海雲台站都好漫長丫,有十幾個站﹗﹗好在我哋一人一本小說,又有位坐,時間都唔難過~到海雲台時廣播會非常醒目,因為有齊晒韓、英、日、中四種語言,凡係大站or同旅遊有關o既都會有四種語言廣播,所以都唔需要太擔心唔識落車~

我哋o既酒店距離地鐵站都好近,兩手fing fing應該五分鐘就到了,但拎住隻大喼就慢少少啦,仲要挽住上去長長o既樓梯… ><“(好在有我個男人係度~)落去毛毛細雨,我拎住把遮囉~SONY DSC

呢度就係我哋住o既Sunset Hotel喇﹗樓下幾層都係酒吧食肆,酒店大堂係十幾樓~今次兩間酒店都係經agoda.com,而家慣咗用agoda都覺得好方便,價錢、房型、地點、設施都一目了然,又有圖片,有之前o既客人o既評價,睇番個平均分嚟book都好叫人安心~因為呢間酒店唔算好貴,所以特別闊氣啲住咗corner suite,有海雲台海水浴場o既海景,房間又比較大~不過我哋check in時個reception男士唔知點解唔知我哋book o既係corner suite,最初俾咗普通房我哋,係佢哋掛起咗個表,顯示咩咩房號係咩咩房型,我先提早發現咋,如果上到去先知要再換又麻煩了~SONY DSC

雖然唔係無敵景,但都唔錯丫~combine hotel

有大按摩浴缸,有海灘景,大落地玻璃,我都好滿意~ 🙂

肚子餓了,出去搵嘢食~

其實因為就係旅遊區,所以附近都好多食肆,但我哋一場嚟到釡山,梗係想食啲地道食物嘛~結果揀咗食豬肉湯飯~SONY DSC

當然叫最basic o既豬肉湯飯啦,但都放到一枱都係,似乎有啲係豬肉湯飯特別要用o既東東喎,應該淨係中間嗰兩盤紅色o既係泡菜嘛~好在阿姐姐知道我哋係遊客,指手劃腳咁教我哋點樣食,要放邊啲落去個湯度咁,再加上參考下隔離枱o既人點食,總算唔會食錯咗啦~

左下o既係我哋平常食o既韮菜、左上係我哋掂都唔敢掂o既青辣椒(但隔離枱o既韓國人拎住一支嚟就咁咬囉~),中間知道係蘿蔔同埋大白菜泡菜啦,右邊中間粉紅色o既係醃得鹹鹹地o既蝦毛,上面係類似麵豉味o既醬料(即是同生菜、烤肉一齊食嗰種醬呢),最右係白麵線同埋右下o既辣椒醬(都係唔係好敢掂)~總之除咗泡菜之外,按自己口味樣樣都落啲啦~打開咗個蓋o既係鹽,原來鹽都要自己落~SONY DSC

yummy~

話說豬肉湯飯o既起源係,傳統o既韓式湯飯都係用牛肉熬煮,但戰後物資短缺,就用較平o既豬肉代替喇~SONY DSC

混合好了﹗食到人暖笠笠呢~day話,正確應該好似人哋咁逐少逐少咁加啲白飯落去,如果唔係就一次過吸晒啲湯了~哎吔,錯咗啦,就咁食啦~SONY DSC

行番出去地鐵站途中見到海雲台市場,呢個都係旅遊書景點嚟o架,反正旅遊書話,行一轉只需要十分鐘,咁我哋都俾得起呢啲時間o既~SONY DSC

只有一條街o既市場,都係食肆為主,有啲係入去食o既餐廳,但亦有啲係賣街邊嘢食,我哋之後都有幫襯呢~SONY DSC以前一向印象中韓國o既水果都好貴,舊年嚟時想食啲水果,去到超級市場都唔捨得買,原來係要睇咩品種的﹗呢啲莓類就超平了﹗咁大箱3000won咋~可惜我哋兩個人食唔到咁多~見到有鬼婆買咗一大兜邊行邊咬﹗﹗

待續

前往其他韓國旅遊blog

Comments

comments

在《27-5-2013:釜山麗水day 3(part 1).海雲台、地道豬肉湯飯》中有 4 則留言

  1. 我都知食呢類湯飯係逐少逐少飯放入湯中,但係我唔明白放左一啖飯入咁大碗湯入面,D飯咪會唔見左囉?所以最後都係全部倒晒落去…

  2. 第一張相的樣真的是剛訓醒,應影多張飲完啡後的樣 🙂
    那餐湯飯最好食好似是蘿白泡菜!

    • 是呀!那蘿蔔很清新,有種生的感覺,而且每一粒都很大很爽,我也印象深刻!

Rita 發表迴響 取消回覆

你的電子郵件位址並不會被公開。 必要欄位標記為 *