我哋食完豬肉湯飯就直接去我哋下晝o既目的地—-甘川洞文化村了，其實呢個地方我一決定去釡山，買咗旅遊書揭揭揭就決定要嚟，因為俾佢色彩繽紛o既靠山房屋吸引，嘩，咁靚o既，一定要去睇睇~

但後來都發現呢度其實都切合我哋今次個主題「跟著Running Man遊韓國」o架，因為有兩集Running Man有係呢度拍的，一集係2012年12月30日崔智友做嘉賓嗰集，佢哋係度個天台玩競猜崔智友o既經典劇集o既劇情問答，另一集我都唔記得係邊一次o既釡山特輯，總之佢哋係啲屋之間俾啲阿豬媽襲擊的~

其實旅遊書講解點樣去好清楚，我哋輕易地係正確o既地鐵站落車，再好輕易地搵到接駁o既巴士站，上咗正確o既巴士，但問題嚟喇，因為書上面寫「搭2-3分鐘，係唔記得咩小學對面落車，就係文化村洞入口」，但啲站真係好唔明顯囉，而且落住大雨，大家拎住啲雨遮都濕漉漉的，行住彎彎曲曲o既上斜路，根本企唔到起身去睇個路線圖(全韓文)，結果我哋做咗錯誤o既決定，係一間類似學校o既對面o既站落咗車…umum…唔啱，似乎未有耐到~路就得一條，唔搭巴士，咪靠雙腿行上條斜坡囉，但雨越落越大，crocs拖鞋又滑滑地，呢段時間我身體大病未復元，都有啲辛苦，行下休息下，唉，終於去到個入口~

所謂入口，其實只係遊覽路線o既開始，既冇人招呼你，亦冇咩資料攞~理論上係有資料攞的，應該係某處(according to旅遊書)，但係大雨之中我哋做唔到~

唔理了，跟住魚魚箭嘴向前行就好了~

我哋做咗一樣緊要o既事先，就係買多一把雨傘，因為一把好難遮兩個人行上上落落o既路，好在阿姐姐都冇坐地起價~

由大魚開始~

咁o既天氣我哋都不太樂觀，但都嚟咗都要繼續落去啦~

甘川洞文化村其實以前係安置難民o既地方，後來好多人搬走咗，為咗要活化呢度，搵咗啲藝術團體，有啲空置咗o既屋用嚟做gallery，展示啲藝術作品，而成個區就髹上七彩繽紛o既顏色，成為釡山內一個有特色o既區~當然，而家都仲有人住係呢度啦，所以旅遊書都提醒大家參觀還參觀，但都要保持安靜，唔好打擾人哋o既正常生活~

有啲路極度窄，把遮都要關上一半先行得過去~

有check point﹗其實應該有好多個印仔o既地方，但係惡劣天氣下我哋蓋得三幾個咋~

用舊東西加上創意o既畫作~

活化作為gallery o既房子~

呢個幾有趣呢，應該啲手指可以整到郁得好似彈琴的，不過今日冇人留守係度，亦冇switch可以俾我哋開咗佢睇下點樣運作~

嘩，睇到廣闊o既彩色屋~

呢張再開揚啲~

出到嚟都有唔同o既裝飾~

呢度算係我哋o既救援~又大雨，又凍，身、腳都濕，好辛苦呀~見到呢間cafe，即刻衝入去~

飲番杯暖暖o既熱朱古力先~不過呢杯呢，太甜咗啲，同埋唔係真係太夠熱…>_<

呢間可愛o既cafe其實有啲唔係太搭調的，裝潢可愛，但入面經營o既係兩個佬﹗﹗而且唔係韓劇入面o既花美男小伙子，而係兩個真真正正o既佬，你睇佢哋o既言行舉止都唔係太似cafe人，不過佢哋招呼我哋雖然別扭，但都好有誠意o既~

我哋留到細雨少少先繼續行~係暖暖o既cafe入面我哋睇睇書，休息一下~出到去見到呢個彈結他o既老伯，原來佢係旅韓o既日本人，佢身上發出濃烈o既酒味，難怪佢講嘢好似唔係好coherent and relevant，佢同我哋講韓文+英文+日文，樣樣啲啲咁~又好熱情咁話同我影相~

小王子呀~

最後一個景點位係「星星的階梯(中文名係我改的)」，點解？因為舊陣時啲人拎住好重嘢行上呢條超長o既樓梯，行到頭昏腦脹，眼前充滿星星…

果然名不虛傳﹗好在而家有為遊客貼心地安排咗中途休息站，哈~

我哋都唔係好知點樣出番去，結果我哋不斷向下坡路行，行啲大少少o既路，出到去見到車路，冇問題了，跳上一部的士，出發國際市場去~

待續

前往其他韓國旅遊blog

Comments

comments