26-5-2013:釜山麗水day 2(part 3).高雅又清新的韓式套餐

完成豐富o既行程我哋返去酒店休息休息,睇睇晚飯食咩好,嚟麗水其實好想試下生魚片,因為韓式食法同香港慣常o既日式sashimi好唔同嘛,魚o既品種都可能唔一樣,但我哋又有諗過去我哋酒店附近嗰間靚靚o既MVL酒店食大餐~

咁呀,先去視察MVL o既環境啦~

SONY DSC

未入酒店,先見到呢個眼睛雕塑,眼中有day呢~SONY DSC

大堂好光潔亮麗,牆上掛咗有個screen,不斷變化,有酒店o既圖片,我哋睇到哇哇聲,好似大鄉里~ :p好在係大堂亦有酒店幾間餐廳o既餐牌,係比較貴,但都唔係高不可攀o既~SONY DSC

好,未夠肚餓食飯,返去酒店休息一下先,一著電視,哇,有新一集o既Running Man呀~智孝同埋鐘國都上咗我哋個鏡﹗﹗雖然冇字幕,但都好好睇~

好啦,我哋落街食飯啦,因為已經好累,打算去樓下個間小餐館食生魚片套餐,但一落去,哇,巴閉咯,佢哋自家人請客,唔開門丫,結果我哋返上樓,因為…umum…著住拖鞋去MVL食飯唔好吧,起碼都著番對鞋啦~

我哋去咗MVL大堂嗰層o既餐廳食韓式套餐~好似每款都要兩位起,我哋就揀咗標榜清新野菜o既套餐~好多道菜,睇餐牌都唔sure究竟有咩食,都係逐道菜上時先慢慢品嚐~SONY DSC

首先嚟個沙律,係好靚…SONY DSC

但我第一個反應係,兩個人食點解portion咁細o既?anyway味道係好清新好開胃,酸酸爽爽味o既~SONY DSC

隔得太耐,我都唔係好記得個粥係咩味,同老公討論過之後,recall番好似係啲麥味o既,我就記得有啲咀嚼o既感覺的~但係…點解又係咁細o架?SONY DSC

海鮮煎餅個汁好醒胃,但,好似都係比較細喎~SONY DSC

後來我哋明白了﹗﹗啲小菜泡菜上嚟已經好澎湃~SONY DSC

中間呢五堆青菜就係套餐o既其中一個亮點,咁多種菜我哋冇一種認得添~果然醃法都係同中國人o既醃菜or鬼佬o既沙津都好唔一樣~唔好叫我describe每一種o既味道了~SONY DSC

好似湯o既其實係酸酸地o既凍湯,入面有清脆o既蘿蔔~要特別介紹左邊紅噹噹嗰碟,係我喜愛o既明太子嚟o架,但係又愛又辣呢,要搭住飯嚟食~最左邊o既生菜同麵豉醬就俾我哋用嚟包住肉嚟食(未上菜)~勁o既係,生菜都有三款唔同o架~SONY DSC

好豐富~SONY DSC

另一主角上場了,係烤o既牛肉,雖然唔算柔軟嫰滑,但肉味幾香濃~但更加勁o既係,旁邊o既配菜都有三款﹗最特別o既係最頂o既黑色蒜頭,唔知點整出嚟,軟腍腍的,蒜頭原本鮮辣o既味道同埋脆脆o既口感完全唔見咗~SONY DSC

仲有荷葉飯同埋麵豉湯~呢個麵豉湯真係令人印象深刻,因為係充滿住120%o既鮮菇味,每一啖o既菇味都極濃郁,我哋估應該有將啲菇打碎落去~SONY DSC

超豐盛,擺到一枱都係,唔怪得之之前啲「前菜」要咁微型啦~如果唔係邊度食得落呀~

好不容易完成了,以為結束了,要埋單了,點知原來有甜品,而且係好正o既添~SONY DSC

有香香脆脆o既合桃酥酥同埋呢件傳統糕點,糕點紫色部份有啲豆蓉o既質感,但有提子o既香味~兩樣都高雅感覺,食到咁飽都唔嫌佢多~SONY DSC

最尾呢個結尾之作—-甜米露,真係尤如世外桃源o既美味,好清涼,好清新~~~~~佢o既效果就好似我哋幾年前去大阪食完烤肉之後o既柚子雪葩一樣咁令人有驚喜~

我哋結果俾咗比我哋預測多o既tips,因為實在太滿意了,好滿足o既一餐~SONY DSC

就係呢間餐廳了~SONY DSC

如果大家嚟麗水,我都會推介大家嚟MVL食一個韓式套餐~

待續

前往其他韓國旅遊blog

Comments

comments

在《26-5-2013:釜山麗水day 2(part 3).高雅又清新的韓式套餐》中有 4 則留言

  1. 沒有字幕的RUNNING MAN 都好好笑! 所以坐巴士時可以偷睇人地的RUNNING MAN 🙂

    晚餐真的好好食~ 不過當天沒咩客人,如果佢有好多客,又要做咁多道菜,唔知搞唔搞得掂..~

    • 應該沒理由應付不到吧?這麼大的一間酒店!不過確實,上菜都上到傻,大大小小的很多碟!

Rita 發表迴響 取消回覆

你的電子郵件位址並不會被公開。 必要欄位標記為 *