25-5-2013:釜山麗水day 1(part 4).EDG、Sky Tower、Big-O@麗水世博

麗水世博距離我哋參觀時已經閉幕接近一年,同上海世博一樣,絕大多數o既展館都已經close咗甚至拆埋,剩低幾個俾人參觀,除咗上兩篇blog o既Aqua Planet水族館之外,仲有EDG(Expo Digital Gallery)、Sky Tower同埋Big-O~嚟到EDG,見到仿照沙丁魚群造型o既手推車,後來睇番啲世博相片展先知,原來世博期間,呢啲車係啲演藝人員推住嚟巡遊o架,充滿歡樂氣氛~

仲有一家大細o既夏日雕塑~

所謂EDG,就係一個超超超超超大屏幕係building o既天花,呢度影到都係一半左右咋,係一個數碼海底世界,啲色彩繽紛o既熱帶魚真係游嚟游去o架~

有部相機可以影你個大嘜頭,跟住個Rita bubble就會係呢個海洋世界度漂浮啦~不過都係啲小朋友bubble可愛啲~EDG地下有極少量食肆同埋鋪頭,但就冇乜有趣o既紀念品賣,可惜可惜~我哋繼續行去下一個景點Sky Tower~

有麗水世博o既吉祥物噃~不過發現佢哋個名係冇新意o既Suny同埋Yeony…umum,只係拆開咗Yeosu兩隻字咋喎~

不過外型都幾cute o既~Sky Tower呢,直至俾錢入場其實我哋都唔係好知入去做乜,我之前上網睇亦不太了解所以然來,但見入場費只係2000won就諗,冇嘢睇都唔會太蝕o既~

入到大堂,先係一啲展覽,原來Sky Tower係設計作淡化海水用途的,個展覽講咗食水點樣珍貴,未來人類會點樣缺少淡水等等題材~

之後就搭玻璃外牆o既電梯上到塔頂,哦,原來頂樓係用作觀景台~入到去有間小小o既小賣部,有咖啡飲品小食等等賣,四邊o既落地玻璃前就放咗啲椅俾大家坐下睇下景咁~

有一小格glass floor~記得人生第一次體驗glass floor就係係Toronto o既CN Tower~

可以睇到梧桐島~

我哋都買咗少少嘢飲,睇下景之餘又休息一下~

Sky Tower樓下就係火車站了,係呢度可以搭到KTX去首爾~

Sky Tower o既外型係個豎琴~我哋買咗Big-O o既門票,八點半o既show,七點半可以入場,而家仲咁早,有咩做好?不如去火車站睇下啦,睇下會唔會有啲鋪頭行下、食下嘢之類~

麗水expo站原來個火車站超級細﹗只有一間便利店附設書店,5分鐘就行晒了~好啦,我哋去搵地方食個dinner就去Big-O入場啦~呢個時候我哋真係有少少迷途小羔羊,事關周圍都比較荒蕪,有諗過搭的士過去我哋酒店嗰邊搵嘢食,但嗰個距離搭車又好似太近,行又好似太遠…哎吔吔~見到遠處嗰度好似有啲住宅+商場咁喎,應該有嘢食啩?

好遠好細o既建築物群…行咗15分鐘左右變成眼前景物,oops,原來係未入伙o既屋院,所以商場都未開始運作,只有啲地產公司…行咗入嚟都要出番去o架啦,自遊行就係咁樣一回事囉~出番去大路,旺少少o既地方,出現一間又一間冇中文冇英文冇圖畫o既餐館,我哋已經好累了,發現時間又變得唔係好多,決定番去EDG嗰度嗰間唔太吸引o既烏冬店解決晚餐算了,雖然少少可惜,但真係冇力了~我哋咁攰其實都幾個因素啦,基本上之前嗰晚都冇瞓好,只係飛機上面兩個幾鐘+釡山過嚟長途車嗰兩個幾鐘,成日行行行咁多路,我之前嗰排身體狀況又麻麻地,所以已經頂唔順,頂唔順到食飯時冇影到相添,我就叫咗個雜錦湯烏冬,好似有啲油豆腐皮、有隻蝦,都唔係好記得仲有咩餸了,味道就中規中矩啦,day食咗個炸豬扒飯,我o既印象係豬扒勁多,但好薄,但飯就超少,仲有少少調劑下o既椰菜絲沙律~冇影到相都冇乜損失o既~好,入場Big-O~

入場時派咗一人一件便利雨衣,會濕身乎?

所謂o既Big-O就係呢個好大o既「O」了,日頭時係一個灰色o既巨圈,夜晚就著咗藍色燈光~

都坐咗唔少觀眾呢~

準備就緒~就我所知,Big-O就係水幕,有啲畫面會投射係上面,但詳情就唔知道了~一開場…

我哋都輕輕地不斷咁哇哇聲~

變化萬端o既水+光+影像+音響,好震撼~主角係一隻卡通八爪魚,佢要show off佢o既本領,叫大家眼前一亮~雖然佢講韓文,但因為神態生動,好似知道佢講乜咁~

而且個水幕並唔係limit係個圈圈入場,可以向外伸展,好大好犀利,而且激光o既運用亦超過我心目中幻彩詠香江o既水平~
BO6AK3Z7h1fPJ24hubBbGw
噴火嗰下將節目推至高潮,離咁遠都感受到熱力呢~雖然個show只有大約20分鐘,但我都好推薦~你會充分感受到製作人員o既用心呢,每一下噴水、畫面、音樂都配合得天衣無縫~

結果我哋都冇濕,可能係預備大風時啲水會吹咗過來吧,呢個show絕對唔係有心整濕你嗰類~

1TRmb90lUvZsdH3MhG0lmQ
完場時搵咗對情侶幫我哋影,好嘢,有張靚靚合照~待續

前往其他韓國旅遊blog

Comments

comments

2 關於 “25-5-2013:釜山麗水day 1(part 4).EDG、Sky Tower、Big-O@麗水世博” 的評論

  1. 麗水這個世博場地,似乎是個為搞世博剛開發的地方,要旺場還得等好些年。跟上海世博找造船廠和舊廠房的地皮來拓建不大一樣。

    • 恐怕都係,因為其他勁勁的景點唔係真係太多~不過近海,有海鮮食,發展成為旅遊城市都有條件o既~

發表迴響

你的電子郵件位址並不會被公開。 必要欄位標記為 *