25-5-2013:釜山麗水day 1(part 2).豐盛蟹醬、麗水世博之特殊美術館

去到麗水市外巴士總站,首先睇下有冇旅遊資料先,好在有地圖拎,不過只有韓文咋~我哋順道買埋回程返釡山o既巴士車票,咁就穩陣啲啦~睇下睇下張地圖,似乎可以搭巴士返我哋酒店喎,因為地圖上面有顯示啲巴士路線~我哋問好車站o既人就知道巴士站o既方向,但…行車方向邊面至啱呢?唯有等一架巴士嚟到時問下司機啦~成功上咗巴士了﹗請注意右邊紅衫o既婆婆~我哋上車後司機同佢不斷交談~落車時,司機指指婆婆同我哋兩個,打手勢將我哋圈埋一齊,哦,跟住佢走~

婆婆非常熱情好客,一落車就拖住我隻手行,佢似乎要帶我哋行去酒店咁﹗﹗﹗行到一個街口,佢指手劃腳地指示我哋點樣過馬路再過對面再直行再靠右,我哋表示明白了之後就行啦~點知…行咗幾分鐘之後回頭,原來婆婆仲遙遙觀察住我哋,嚇我哋一跳添~再繼續向前行,咦?﹗點解佢追咗上嚟?﹗哎吔吔,老人家唔好跑丫,我哋行錯路?明明對好地圖好似啱架?我用盡我係韓劇度學o既韓文單字再加上指下地圖指下附近building,想話佢知我哋應該ok了,婆婆都唔放心,拉住我哋行入第二間酒店度問路,佢真係非常非常照顧我哋呢~婆婆同酒店職員交談之後就知道正確o既路了,原來嗰個位置可以望到我哋間酒店啦,多謝你哋丫~~~去到酒店,真係express check in,點解連填表同睇下passport都唔駛o既?

入到房,發現酒店職員搞錯了,我哋訂o既係韓式房,應該係打地鋪,但佢俾咗雙床房我哋,哎吔算啦,要解釋一番仲麻煩,而家都好丫,張單人床劃做「污糟區」,沖涼前可以瞓,雙人床就係「乾淨區」~雖然肚子餓,但最鍾意按遙控器o既男人都要睇下電視先,哈,又有發現喎~

見到電視播緊「天與地」﹗林保怡講o既係普通話,有韓文字幕,原來香港o既電視劇都嚟到呢度呢~後來同家姐睇相時,佢記起之前係越南仲搞笑,香港o既古裝片有配咗越南話,但由頭到尾都係一個男人配音,即使係女人講嘢時都係佢o既聲音,如果唔望住個畫面都唔知發生咩事﹗

轉個台就見到劉在石﹗佢著住女裝跳緊藝術體操~~~~又一搞笑之作~佢真係搏盡冇底線呢~

好,出去搵食﹗其實我哋酒店附近有好多食店,但今次我哋出師不利呢,間間餐廳都冇圖畫餐牌or英文餐牌or中文餐牌,啲店員又冇話好熱烈咁幫我哋兩隻迷途小孤燕,甚至有一間有中文招牌o既餐館,佢哋忙碌招呼緊團客,唔招呼我哋呢啲散客…我哋肚子又越嚟越餓…最後決定…返酒店食﹗都不失為一個好決定,今次又塞翁失馬,焉之非福噃~其實酒店餐牌一樣只得韓文,我哋本身想叫第一同第二項share嚟食,個侍應大嬸好落力咁同我哋表達一樣嘢,呀,舊記憶回來了…要兩個人叫同一種食物﹗(請參閱:9-4-2012:首爾濟州櫻花遊day 2(part 2).狎鷗亭.濟州黑豚)~嗰次都係咁丫~

結果叫咗兩份第一項,我哋都唔知叫咗啲咩呀,不過擺到成枱都係,好高興~

無論係香港食韓國餐館定係去到韓國都一樣o架啦,你叫咩嘢都會附送泡菜呀小食呀咁,但好多時都係兩至三碟,最多都係五六碟,但今次有十一碟﹗﹗上面個frame有限格數所以我先冇post晒出嚟~不過重點要推介o既係兩款蟹醬,呢啲係麗水特產嚟o架,右邊係醬油味,左邊係辣味,會張一隻隻蟹中間分半,蟹蚶再分開,蟹蓋部份有濃濃o既蟹糕~一咬落去,原來係生蟹﹗﹗咁大個女都係第一次食生蟹,應該唔會肚痛啩?軟軟黏黏鮮鮮o既生蟹肉蟹糕加上調味料,撈埋白飯一齊食,正到不得了~~~~~~不過只限醬油味,個辣味我食唔到呀,太辣,食一舊啲辣持續得超耐~day對蟹糕敏感嘛,我哋商討咗一輪佢食唔食得,結果決定食少少,睇下餐飯到尾時有冇反應,事關可能未來幾餐都好有幾會遇到喎~除咗特別介紹o既兩款蟹醬,仲有相對常見o既腐皮、菇菇、海帶、小魚乾,冇出場o既白菜泡菜、拌菠菜、大豆芽菜之外,仲有居然會出現o既午餐肉﹗同埋要介紹一下右下角呢款泡菜,旅遊資料介紹佢叫做雪菜泡菜,但去到時見到事實上係用芥菜做的,係麗水o既特產,係街上總見到大梱大梱o既新鮮芥菜放係度,又有醃好o既雪菜泡菜有得賣~我哋臨走時都買咗啲返香港做手信丫~

呢個烤魚用另一款碟放著,我哋估計佢就係主菜了~味道其實ok,但驚喜度就不及蟹醬了~

連麵豉湯都用蟹肉嚟熬~正﹗充滿體力之後我哋可以出去行下啦~今日o既行程係去參觀2012年麗水世博現今仲剩落嚟o既幾個展館~就好似上海世博咁,展期結束之後都仲可以去參觀中國館咁~(請參閱:25-4-2011:上海pre-wedding+杭州day 1.重遊世博@中國國家館)我哋住o既HS Tourist Hotel就正正望住世博園區,所以行過馬路就可以入場啦~

原來麗水市政府有啲單車可以借俾大家,不過好似要啲身份登記,例如當地手機號碼之類,冇我哋份lu~上次去杭州時都想租下單車踩,又係手續問題冇借到~

哇,遠眺就望到Big-O同埋主題館了~我遲少少再介紹Big-O是甚麼~

我哋順住位置參觀吧,首先係Aqua Planet水族館~

同一個位置可以望到MVL Hotel,其實本身都有考慮過book呢間勁好多o既MVL Hotel,但見佢價錢雖然冇話貴非常之多,但冇包早餐,所以先揀番我哋而家住嗰間~但我哋第二日去咗MVL食dinner,嗰個真係超超超正o既經驗,大家之後要繼續收看啊~

有個太陽能電話充電站~雖然話係入去Aqua Planet水族館,但我哋發現有二合一套票,加多少少錢可以參觀埋位於同一building o既特殊美術館噃,一場嚟到就參觀埋啦~day話,點解韓國度度都有呢啲美術館﹗﹗哈,咁又係,我哋舊年係坡州o既Heyri Art Valley都有參觀過一個(請參閱:12-4-2012:首爾濟洲櫻花遊day 5.Heyri Artvalley.Nanta),而韓劇入面o既主人公都好多時會去呢啲地方玩,家姐睇相時就話容和係「你為我著迷」有同朴信惠去過喇,感覺仲好似我哋去呢個添~

有活動版o既蒙羅麗莎,佢哋吹氣時中間條絲巾真係會郁o架~

女人對腳,一邊睇就好短,另一邊睇即刻變成修長美腿~

吹笛人,有郁動又有聲音~

誰分開了我的身體?

睇人哋影相一樣有趣,一般嚟講呢啲背景配上美女冇乜大不了,但配上大嬸就變得有趣了~

呢張相背後有個慈愛o既爸爸係度支撐住呢~不過佢冇出鏡,只係暗地裡保護小B~

噢,day變成收藏品?

Help~~~~~~~~~~~~~

雖然類似o既美術館有去過,但每一個都會帶俾人新o既驚喜~
待續
前往其他韓國旅遊blog

Comments

comments

2 關於 “25-5-2013:釜山麗水day 1(part 2).豐盛蟹醬、麗水世博之特殊美術館” 的評論

  1. Hi. 你好. 我已訂機票月尾去麗水加順天,請問你住酒店名稱及好正午餐價錢.
    [版主回覆06/02/2013 21:58:49]你好!
    我們住的是HS Tourist Hotel,在agoda.com預訂〜
    午餐好像是6500一位,不過如果去麗水真的要試試對面MVL酒店的韓式套餐,那個雖然是38000一位,但更物超所值!我未打到那篇blog,希望你出發前可以給你參考一下!

  2. 越南看到的不是古裝片,而是野蠻奶奶,所以越南男人是幫胡杏兒黃淙澤配音…
    [版主回覆06/08/2013 11:35:28]哦,記錯咗你講o既嘢添~

發表迴響

你的電子郵件位址並不會被公開。 必要欄位標記為 *