24-5-2013:釜山麗水day 0.跟著Running Man遊韓國

其實我明明未完成個斯里蘭卡blog,真係唔應該開始呢個住,但而家返到嚟仲有幾日假期,趁記憶尤新,都係打咗個新blog blog先~冇錯,大家睇到title,知道我哋啱啱由韓國返嚟,今次去咗釡山同埋麗水~「乜你嚟唔係去完韓國冇幾耐咋咩?」你冇記錯,我哋確實舊年四月時去過首爾同濟州,點解咁快又去韓國唔去下第二度,事關我哋呢段時間好迷Running Man,我老公對於去邊度旅行不嬲都冇咩特別preference,通常都係我想去邊而佢樂於奉陪,但今次我問佢,下次去旅行你想去邊,佢話不如我哋「跟著Running Man遊韓國」啦~因為Running Man o既拍攝會去晒全韓國好多唔同o既地方,而去到又會大大咁展示當地o既特產呀、名勝風景呀咁,睇到都覺得好吸引﹗﹗講多少少俾唔知Running Man係乜o既人知道先,其實Running Man係韓國o既一個綜藝節目,佢哋七個固定成員+/-嘉賓會玩好多唔同o既遊戲,而當中好多時都要跑or捉迷藏~超級好睇,如果你開始睇就會上癮o架啦~Running Man都有嚟過香港拍過o架~呢個節目由2010年尾做到而家,個個星期播出,都冇話佢哋唔犀利~其實我哋點樣跟著Running Man遊韓國都冇話特別想點,反正好多地方都想去~不過當時睇去麗水嗰集我哋的確印象難忘,最主要係麗水o既第二集(2012年1月8日)係美食race,running man們加上嘉賓四人,即池珍熙、金聖洙、朱相昱、李天熙、IU,分成三組,要去九個美食check point度做任務,做完任務就可以享用嗰個check point o既特產美食,最快達到九格bingo o既直、橫、斜就勝出,因為嗰啲海鮮實在太吸引了,所以今次麗水就成為我哋o既target,麗水呢個地方曾經係2012年搞過世博反而係其次~咁要去麗水的話,經釡山去確實係一個比較快同埋方便o既選擇,而且我哋都未去過釡山,而釡山有更多「跟著Running Man遊韓國」o既check point~所以今次我就prep一下有咩running man check point,等預備行程時可以參考一下~heehee~所以我事先睇咗Running Man係wikipedia o既page,睇睇佢哋邊啲集數有去過釡山同埋麗水…http://zh.wikipedia.org/zh-hk/Running_Man

再快速睇一次嗰幾集睇下佢哋確實去咗咩地方(好似好變態咁…)~

釡山:城市觀光車、松島海水浴場、甘川文化村、釡山慶南馬主題公園、Centum City、Spaland、札嘎其市場、寶水洞二手書店街、海雲台海水浴場、世峰樓、國際市場、廣安D遊樂園、棒球場、40階梯、國立海洋博物館

麗水:喬洞水產市場、梧桐島、麗水市政廳、下花島

麗水美食:蟹醬、烤生蠔、涼拌菜餐、生魚片、小豆粥

我咁樣做好似好瘋狂fans咁,但再對比一下旅遊書,其實咪就係旅遊書有介紹o既地方之嘛~唔變態唔變態~ :p

ok,講完啲背景資料,我哋可以出發了~

照舊搵咗我嗰位係旅行社工作o既阿姨為我訂機票,暫時嚟講,去釡山無論咩航空公司都係凌晨機喇,因為回程日子o既機位問題,今次我哋搭釡山航空,起飛時間係2:05am~~~~~~~~~~~~~幾年前更年輕o既我會因為搭凌晨機可以多啲時間玩同埋節省啲旅費而高興,但而家年紀大了,其實更加想舒服o既行程…heehee~不過冇辦法啦,如果飛首爾再轉過去咪仲浪費時間~所以為咗去到可以休息多一啲先開始行程,我哋會先去麗水,咁到埗釡山後都可以係長途巴士上面瞓多三個鐘嘛~

出發日我哋都要返工,反正咁「早」機,我哋都可以悠閒地食個晚飯,係屋企沖埋涼至去機場~

夜裡o既機場人煙稀少~

明明食咗晚飯,但都好肚餓,我哋買多個麥當勞餐share嚟食,嗰個新o既米飯wrap,味道都ok丫~


指定動作﹗﹗機程大概三個鐘,但起咗飛冇耐就熄晒燈了,因為係深夜時分,大家要瞓覺,同埋好在食咗麥當勞,完來冇飛機餐食的﹗﹗只係臨落機派咗飲品同埋一人一個小蛋糕咋~發覺釡山航空搭o既主要係韓國人,唔知遲我哋15分鐘起飛o既港龍會唔會多啲香港人呢?
待續
前往其他韓國旅遊blog

Comments

comments

1 關於 “24-5-2013:釜山麗水day 0.跟著Running Man遊韓國” 的評論

  1. 我都想跟著RUNNING MAN遊韓國,不過我睇得唔夠多,努力睇多D先~
    夜機真的很辛苦~
    [版主回覆06/01/2013 11:19:44]我有充足o既路線可以俾你選擇﹗﹗

發表迴響

你的電子郵件位址並不會被公開。 必要欄位標記為 *