14-12-2012:斯里蘭卡day 7(part 3).Cantaloupe海灘酒店@Talpe

接住落嚟o既行程我同爹媽姐就分道揚鑣啦,爹媽會係新加坡探美姨一家遊覽幾日,家姐假期結束咯,返去陪下姐夫,好似趕住返去睇演唱會添﹗至於我同day呢,我哋會留係斯里蘭卡多幾日,去埋南部o既部份地方﹗當初話點解會有意思去斯里蘭卡呢,除咗睇過旅遊書入面大象孤兒院o既象象係河邊沖涼嗰一幕好深刻之外,另一樣就係佢o既多樣化了,其實我不嬲都好鍾意去陽光與海灘o既地方,今次既可以睇下文化古蹟,又有靚海灘,之後仲有得睇動物添,一次過滿足晒幾個願望啦~map colombo to talpe

大家可以睇睇地圖,我哋之前係可倫坡(即國際機場o既位置),包車坐咗大概兩個鐘頭車到達我哋住兩晚o既Talpe,其實Colombo以北同以南o既西海岸線都係沙灘,所以沿海都有唔少beach house、resort咁,大大小小豐儉由人都有,落到去西南部左下角o既城市Galle係斯里蘭卡第四大城市,繼Colombo、Kandy同Jaffna之後,所以我哋選咗Galle附近o既Talpe嚟住,既有南部o既海灘,亦可以感受一下Galle o既殖民風情(留意下一篇blog就會多啲介紹咯~),而且亦少少順路咁去埋我哋最後一站o既Yala National Park,所以呢個地點都好滿意~

我哋住o既酒店叫Cantaloupe Aqua Beach Club Hotel,司機駕車時我哋都要望下眼,因為酒店太多,而且間間都係中小型酒店,所以職業司機都冇可能認得晒,而且我哋住嗰間酒店閘門深鎖呢,原來真係唔係太明顯,要搵啱門牌按門鈴至有人開閘~

http://cantaloupevillas.com/index.html

哇,入到去就好喜歡了~reception都好有渡假feel,而且有好多唔同o既遊客,白人、亞洲人、本地人(or印度人,我哋當然分唔到啦)都有~SONY DSC

我哋book o既房型叫Aqua Zen,特色係瞓係閣樓…所以即是有廳有房啦叫做~SONY DSC

多個分隔開o既生活空間,幾好~乾乾淨淨明明亮亮~SONY DSC

閣樓望番落去~

SONY DSC

係agoda.com預約酒店,房間描述同埋客人o既comment都係話房間好大,但浴室不合比例地細,大家都有啲失望咁,我對個浴室都特別好奇,結果?香港人o既角度係average size囉,咪好似屋企個浴室咁o既大細之嘛,冇問題冇問題~SONY DSC

房間行出去個露台就已經望到海啦~好近啊~夜裡開住窗都可以聴下海浪聲呢~SONY DSC

因為附近都唔多商店,所以我哋係番酒店餐廳用餐,環境係半露天,非常好,更加親近大自然,溫度涼風都啱啱好,又駛乜要冷氣呀~SONY DSC

我哋係度飲咗好多個椰子丫,因為又平又好味~佢哋切個椰子切到好似隻老鼠呢,好cute~SONY DSCSONY DSC令人驚喜o既係,餐牌中除咗有西餐同斯餐之外,呢度有唔少o既亞洲美食選擇,中菜就唔係好覺啦,但泰越o既菜式都唔少,正好轉轉口味~味道中規中矩啦,我記得口味調得比較重~係咪因為太肚餓?相機得呢兩張添~我哋有冇咗史官,可能要失傳了~:p

附近又冇乜夜間活動,酒店有得借dvd,房入面有機可以睇,我哋借咗「龍紋身的女孩」,其實我哋兩個都睇咗小說啦,都唔怕太恐怖瞓唔著覺,但返去play先發現連英文字幕都冇,哎吔吔,都係唔好浪費咗套戲,下次至睇啦~

其實去到斯里蘭卡都好想試下佢哋o既spa,其實佢哋唔叫spa,叫ayuveda,比起spa o既純relax享受嚟講,ayuveda講究治療,好似痛症或者其他疾病,Cantaloupe都有ayuveda服務,但問一問只有男o既治療師呢,咁我又唔係好想lu,所以就放棄咗啦~

待續

前往其他斯里蘭卡旅遊blog

Comments

comments

在《14-12-2012:斯里蘭卡day 7(part 3).Cantaloupe海灘酒店@Talpe》中有 6 則留言

  1. 剛去完遍地白茫茫寒冷的北海道東,再回看陽光海灘喝椰青的斯里蘭卡,心理上一時間很不平衡。

Rita 發表迴響 取消回覆

你的電子郵件位址並不會被公開。 必要欄位標記為 *