13-12-2012:斯里蘭卡day 6(part 1).自家農場、踏上搖晃火車之旅

嚟到Nuwara Eliya o既第三日,我哋要離開Nuwara Eliya,返去Colombo啦~打算搭中午o既火車,所以仲有一晝時間~我哋之前同Laki提起過巷子口o既士多啤梨園,原來Laki villa工作嗰位女士識得士多啤梨園個女主人o架,所以安排佢帶我哋過去參觀+買果醬~

又係一個美好o既早晨~我發覺每一日好似都有呢張咁上下o既相,大概每次見到呢個景色都忍唔住影吧~
家姐呢張簡直係樓盤廣告~聽Laki講原本想整全天候落地玻璃,即冇中間o既柱子,但技術上話唔可行,所以改成而家o既樣子,但我覺得咁樣仲好啦,如果全部係落地玻璃,咁同樓下個陽度望出去有咩分別?又係早餐時間﹗果然日日新鮮呢~

今日又係C餐~又係好啱胃口噃,係類似飯糰o既東東,配上醬料食用,但啲飯糰唔似日本嗰啲一個個揑出嚟,而係按壓一大餅之後切出嚟的~我睇到呢啲相先發覺原來我寫之前嗰日個blog搞錯了,鮮雜果沙津屬於今日o既菜單至真~

食食笑笑談談,人生一樂也~

呢度Laki show緊咩俾我哋睇呢?不過呢,我哋同佢提過,佢個網頁啲相同事實不乎,villa o既實物比相片靚得太多了,原來佢只係用部tab tab嚟影相放上網,難怪啲色同埋清晰度都唔夠啦~我哋話,不如我哋俾我哋影o既靚相你放上網啦~好啦,我地出發覺去士多啤梨園﹗其實只係步行幾間屋o既距離~

我哋就係俾呢個廣告牌吸引的了~garden picked fresh strawberries from the luscious meadows of misty hills,講起就新鮮~女主人好熱情,招呼咗我哋入佢個客廳,拎咗啲果醬出嚟賣,我哋都揀咗士多啤梨果醬,自用送禮佳宜~似乎佢都係為興趣至搞呢個小農場,事關閒談之中得知原來佢老公係做斯里蘭卡o既內陸水上飛機生意的,犀利咯~而佢o既英文亦係非一般o既好~佢親自帶我哋出去田地參觀、講解~

士多啤梨田呀~~~~~~~

而家唔係當造季節,所以冇新鮮士多啤梨食,但見到一株株o既士多啤梨已經開始開花結果~

粉紅褲子o既女士就係呢度o既女主人了~

我哋好驚訝咁話,第一次見到蔖筍生係田地上﹗佢話,唔係生係田地上咁生係邊度?我哋只能夠慚愧咁講,只係見到係市場裡…:p

呢種果子叫做gooseberry,佢哋都有做gooseberry jam呀~

打開薄薄o既外殼就見到青BB o既果子,雖然青青色,但係好清甜o架喎,一啲都唔酸~估佢唔到~

暢談一番~

拍照留念with戰利品~

當然唔少得離別前同Laki合影啦~又係尋日o既熱情司機載我哋去火車站~其實個站唔係位於Nuwara Eliya,所以都有啲啲距離~

其實去斯里蘭卡旅遊,睇好多網站都會建議由Kandy到Nuwara Eliya o既登山一段路要搭火車,最好就搭observation car,因為有大窗口可以觀景,而且因為係為遊客而設,車廂亦比較企理,當然啦,價錢亦會比起一般車廂貴~我哋發覺嚟Nuwara Eliya呢程啲火車班次o既時間唔太合適,如果真係要搭就好花時間,所以決定包車,而回程至搭就好似好啲,所以就有呢個火車行程了~

車站古老o既指示牌~

我哋係Colombo方向~講真,我都唔係好sure架火車抵達Colombo o既時間,但睇網上資料,好似係六個鐘左右,所以就一路都係咁打算…但…

anyway,未出發都係先興奮o既,我哋當然要係月台大大地拍照一番啦~我哋搭車o既站叫Nanuoya~Nuwara Eliya本身係冇火車站的,最近就係呢個站了~

我哋o既火車票每位Rs290,即是大約港幣$17,搭咁遠坐咁耐真係抵到爆炸~

天氣非常好~

排排坐等車到~我哋本來想買少少嘢食先上車,但發覺附近冇食肆呢,車站食堂又冇開門,點會有人唔做呢啲生意o架?

係Horton Plains曬傷了的皮膚,趁而家有時間,等我變成綠色人,好好保養一下先~

火車站月台的鴿子

有專為遊客而設o既洗手間﹗後來係Colombo o既博物館都有呢種設施,唔知最大有咩分別?事關我冇幫襯呢個廁所
呢~

車到了車到了﹗我哋快快搵我哋o既second class上車啦~

雖然second class已經係呢班列車最高級o既車卡(其實只有second class同third class),但係不設劃位的,所以啱啱上車時我哋都唔係人人有位坐,所以我坐住行李先啦,由家姐守護我~慢慢後來有人落車,我哋就人人有位坐,再有多啲人落車,我哋就可以坐埋一齊了~斯里蘭卡火車都有好耐歷史,但維持得麻麻地,亦冇隨住時代而改善系統,列車極度搖晃同埋好噪吵,唔扶住係會跌o既水平﹗車廂冇冷氣,但有大大o既窗口,吹起風嚟都好涼,甚至有啲凍添~不過,雖然列車好殘舊,但因為人民質素好,所以好乾淨,冇垃圾之餘,大家坐位子亦好禮讓~

搭火車重要係睇風景嘛,當然唔可以忽略窗外o既事物啦~

呢幾張相要鳴謝我爸啦,我初時坐o既環境太惡劣,都冇辦法影到相添~

瀑布呀﹗

當然唔少得高原o既標誌—-茶園啦~車一路向西邊行,海拔一路一路下降(車站月台有顯示海拔的﹗),景觀亦有所變化,茶園慢慢成叢林,又會多咗一個一個o既小鎮,山丘變成平地~

好似印度咁,啲人都會凸咗出嚟~

哇,有人叫賣嘢食呀,我哋都買嚟食先,係葱油包包,味道都唔錯喎,而且好抵食﹗可惜冇幫襯呢個叔叔買多幾款其他小食啦,後來再經過叫賣的好似賣得貴啲,有變成水魚之嫌,我哋寧願唔食了~後來咪jap jap jap香港帶嚟o既零食囉,我哋仲同坐係附近o既斯里蘭卡小妹share咗蒜蓉包餅仔同埋芒果乾添~佢哋好似鐘意香口嘢多啲bor~

路經的車站去到Kandy時我哋見有勁多人落車,我哋就開始怯了,哎吔吔,呢班火車係咪直達Colombo o架?會唔會要轉車o架?鼓起勇氣問下其他乘客,哦,唔駛郁~

車程真係好長…我都係介乎於睇小說,瞓覺,睇風景之間~

心裡面諗住六個鐘左右會去到,一路倒數,但一路擔心,點解仲未到o既?又冇路線圖,又唔知總共幾多個站,又冇GPS俾我哋知道身在o既位置~我哋缺水缺糧,只有少量零食,又唔敢飲咁多水怕要去廁所,雖然廁所好近,但停站時架車唔郁嗰陣都有啲啲廁所味飄過來,諗住個廁所真係可免則免…又有少少內疚,點解要叫大家搭火車呢…每一次見到光少少o既站,就期待,係咪就嚟到啦?去到又發現未…最後我哋好似搭咗七個半鐘,真係搭到人都散晒,因為架車太震了~

火車之旅好難忘,但不是太舒適,體驗係可以的,但建議大家唔好靠火車代步,除非你仲係學生,要節省少少,否則,都係包車吧~我哋話,好似Nuwara Eliya去Colombo呢啲咁長o既距離,真係應該就下水上飛機o既schedule,剛剛七個半鐘o既路程會變成少於一個鐘﹗﹗﹗

太好了,我哋終於抵達Colombo了,好肚餓呀~~~~~~~~~~~~~~~~~~~~~~

待續

前往其他斯里蘭卡旅遊blog

Comments

comments

在《13-12-2012:斯里蘭卡day 6(part 1).自家農場、踏上搖晃火車之旅》中有 2 則留言

  1. 在斯里蘭卡坐火車是一個很難忘的經歷,不過我不想再坐斯里蘭卡的火車了…
    [版主回覆05/30/2013 13:27:27]路軌太糟糕,資訊太少~

  2. 坐這班火車的,似乎中程客比較多,即使是遊客,像我們坐那麼久的不多見(起碼在我們那一卡車內)。
    [版主回覆05/31/2013 17:24:30]因為唔係一個好o既方法嚟travel呢個距離﹗﹗ XD

發表迴響

你的電子郵件位址並不會被公開。 必要欄位標記為 *