12-12-2012:斯里蘭卡day 5(part 3).Nuwara Eliya地道生活

經過彎彎曲曲o既山路,司機載番我哋落Nuwara Eliya o既市中心地區,我哋都肚餓仔了,要先搵個地方食啲嘢先~

Nuwara Eliya市區

隨處都好容易見到歐洲式建築物,不愧「小英倫」o既稱號~我哋隨便揀咗一間小食店入去,見光光猛猛就坐低咗,但坐低先發覺好多烏蠅~ >_<“我哋當年係印度揀食店o既原則就係驟眼望落冇烏蠅,但今次失手了~

由我同day勇敢出去同當地人溝通買嘢食﹗呢邊其實唔算旅遊區,雖然有英文餐牌(當然有啲傳統食品係用英文拼出,但睇出嚟唔知係咩~),但店員都唔識講,唯有指手劃腳~

雖然出嚟o既食物好似唔係完全係’我哋點o既嘢,總算叫咗啲嘢同埋食得飽啦~左上角o既炸物有三角形o既samosa,其實就係係印度時時食到o既薯仔咖喱角,而似春卷嗰款印象中係入面係魚,媽咪好似話腥得滯食唔到,右上o既係咖喱雞,右下o既係咖喱魚~食物味道基本上冇問題,係啲炸嘢唔熱囉~不過張羅餐具都有啲狼狽,事關當地人食呢堆嘢其實只會用手,但單單用右手o既手指最尾嗰節食我哋實在掌握唔到,所以向侍應要求刀叉,佢哋都好不容易先搵到咁多餐具俾我哋,而佢哋啲碟用膠袋包住,中間有啲水等佢黏住,感覺唔太衛生,但人人都係咁食,冇辦法啦,食炸嘢就俾啲報紙你包住嚟食~唔算好飽,但都唔追加食物了,我哋出去逛逛~

一楝一楝o既歐式建築物

我哋遇見雪糕tuk,平時見o既tuk tuk多數都係載人,原來有啲改裝嚟做生意,後來我哋又見過麵包tuk~

我做呢行,見到有診所醫院都會忍唔住停低望一望~

郵局呀~呢個係景點嚟o架,旅遊書有介紹~同埋最鍾意去外國o既郵局…因為,可以寄postcard返香港﹗

周圍都見到o既總統相,係街上時時都見到有佢嘜頭o既大banner~唔知仲以為係咩宗教精神領袖~

買好郵票,我哋個個好努力咁樣寫postcard~

漂亮的建築

郵筒依然有英國色彩,記起香港舊陣時o既郵筒呢~

呢啲tuk tuk陣就只有印度斯里蘭卡一帶可以見到了~

我哋參觀咗旅遊書有介紹o既Victoria Park~

各式各樣o既花花~

色彩繽紛

影呀影~

呢度o既入場費又係遊客貴一截,家姐話入得場唔好浪費,所以我哋要瞓一瞓佢個大草地,抵番先~

躺在草地的景觀~

荷花尚未盛放呢~

呢種紫花好特別我哋決定沿住賽馬場方向行返過去Gregory Lake,咁就可以行番去Villa Acacia了~

好多時係斯里蘭卡o既城鎮都會見到呢啲係大路旁o既佛廟,後來有次我哋搭長途車,個司機將車停靠係路旁叫我哋等一等,我哋以為佢要去買啲咩,原來係要落車拜一拜~

英國人喜歡賽馬,所以係Nuwara Eliya有賽馬場~

不過而家暫時荒廢了~聽Laki講有嚟自香港o既發展商(?)會嚟呢度重整馬場同埋起酒店,咁會唔會玷污咗呢個寧靜優美o既高原小鎮o架?多咗好多賭徒咁好似唔多好噃~

雖然冇賽馬,但都有得騎馬,而且馬同埋人都可以係呢個範圍自由出入~所以見到地上o既痕跡,又有車,又有馬,又有人~

又係嗰個問題,明明日日食自助餐,點解啲馬都咁瘦o架?啲草都生得幾茂盛丫﹗

又想同佢影,又怕佢突然發難~ :p我哋行呢段路要步步為營,事關土地非常肥沃,有好多馬便便丫~

見到草地o既另一邊有啲年輕人係度玩cricket,我哋有緣了,cricket係斯里蘭卡o既國民運動,好受歡迎,不過我哋唔係好熟悉,我哋觀察+後來上網check先大概知道個所以然來~返到我哋o既home sweet home — Villa Acacia了~又係等開飯o既時間~

上條斜路又見到路口o既士多啤梨果醬招牌,唔知Laki識唔識嗰家人,可唔可以安排帶我哋過去買呢?

再嚟大戰,今次o既戰場係落地玻璃前o既大客廳~又係令人期待o既晚飯時間~

喜孜孜o既Laki親自為我哋介紹晚餐~

左上角有清新o既沙律,估唔到呢啲類似娃娃菜o既可以生食喎~右上角o既係新鮮果露,甜甜的好清爽,正好開開胃~左下o既主菜係蔬菜咖喱,媽咪就開心了,既然係vegetarian就唔需要擔心有咩奇怪東東係裡面啦,而且咖喱味道好mild,我都可以唔飲水食到好多,綠色同橙色o既小堆醬料好似係加咗香料o既小米之類,因為都幾辣,我就麻麻地,反而薄餅就食咗好多~最尾係剝開咗肉o既水果配雪糕,呢個就搞笑了,Laki講咗嗰種水果o既英文名俾我哋知,當然我哋唔識係啲咩先至有一番討論啦,我哋真係討論咗勁耐究竟係咩東東,一小片一小片的,柔軟o既質感,奶白o既顏色,淡淡高雅o既甜味,我哋係香港常食o既水果就唔係o架喇,味道似以前係台東食過o既釋伽,叫釋伽係因為綠色o既水果o既一個個突突就好似佛祖o既頭髮咁樣,但根據Laki描述呢款水果未剝開之前個樣又同釋伽不乎喎,我哋結果好似有查到字典,但我而家已經唔記得咗原本個英文係咩,我相信史官有記載的,大家click過去我家姐個blog度睇睇答案吧~

今晚熱水爐整好了,個涼都沖得舒服好多~我哋玩玩board game就去休息啦~聽日要離開Nuwara Eliya lu~

待續

前往其他斯里蘭卡旅遊blog

Comments

comments

在《12-12-2012:斯里蘭卡day 5(part 3).Nuwara Eliya地道生活》中有 2 則留言

  1. 馬場雖然沒人打理,但也任由居民使用,有練跑,有打球,有騎馬或放馬的,或穿越其中(走捷徑)走回家,這比圍起來荒廢了好!
    [版主回覆05/31/2013 17:23:56]咁又係,大家各適其適~

發表迴響

你的電子郵件位址並不會被公開。 必要欄位標記為 *