11-12-2012：斯里蘭卡day 4(part 1)．佛牙廟

嚟到第四日o既行程，我今日就要離開Kandy了，不過早上仲有重要o既行程至走~既然要離開住咗兩晚o既Clove Villa，影幾張相留下念先~

Clove Villa o既大廳好舒服，陳設優雅，不過我哋係度坐o既時間唔多，咪就係第一日check in時同埋有時等下司機時咁囉~其實佢放咗好多書呀、雜誌呀係度，有時間都可以多啲了解下斯里蘭卡o既文化~

後面係一個小水池，再後面就係我哋呢幾日食早餐同埋晚餐o既地方喇~右邊樓梯上去房間，Clove Villa總共得7間房o架咋~

等我留低啲感言啦：「多謝你哋貼心又有誠意o既服務…」

雖然話Clove Villa o既地點唔算好便利，但真係住得幾舒服，反正落街馬上截到tuk tuk，我都推薦想去斯里蘭卡o既朋友們住呢度~ :D好啦好啦，車嚟啦，今日都係約咗Tiron，佢載咗我哋去Temple of the Tooth Relic(佛牙廟)參觀之後，就會載我哋「長征」—-另一長途車上山部城鎮Nurawa Eliya~

佛牙廟位於Kandy Lake旁邊，因此呢個湖亦係被視為非常神聖，所以你唔會見到有人係度釣魚、划小艇or觀光船之類~佛牙廟係Kandy最最最最最重要+最出名o既地方，事關自第四世紀以來，佛牙就係權力o既象徵，所以不斷被爭奪，爭到o既人又要逃亡，而家佛牙安放係Kandy佛牙廟，而家政治性唔再係古時咁，但就宗教上o既神聖意義嚟講依然對斯里蘭卡人好重要~每年係呢度都有大慶典，記得大象孤兒院o既象象嘛？佢哋會被借用作為祭祀時用得到o既動物o架~嗰啲時候大象就會披上華麗奪目o既衣衫喇~

因為要入廟，我同day著短褲都要圍上圍巾，為咗襯色起見，我o既花花圍巾借咗俾day，家姐o既紫色輕紗就借俾我~呢個圍布之後都有個故事~

係呢度我哋再遇上夾硬來o既local guide﹗﹗﹗話說我哋準備過去購票時佢已經非常friendly咁樣同我哋打招呼同埋寒暄寒暄，哎吔吔，已經深知不妙，又帶我哋去買入場券，結果當然老老實實咁拒絕佢啦，但呢個guide比起Sigiriya嗰個更過份，佢要我哋俾$$佢至肯走﹗因為我哋實在最初已經表明唔需要佢o既服務，所以不情不願咁樣俾咗US$1佢，佢收咗之後仲依依哦哦咁~大家去斯里蘭卡旅行如果唔打算請呢類local guide，記得係最最初時就要向佢表明，並快步離開，唔好俾機會佢哋死纏爛打~搞到心情都差晒~既然拒絕咗個guide，我哋借用咗audio guide，唔需要錢，但要放低passport，所以一定要保存好嗰set mp3機呀~不過礙於部機+個場地唔太user-friendly，即是顯示邊個位置係邊一條track唔係太清晰，所以之後聽時都唔係好知講緊啲乜~我建議大家入廟之前睇定旅遊書預習定會好啲，因為入面人頭湧湧，再睇書就會有啲困難了~

好啦，我哋入去啦~入去要經過安檢，男一條隊、女一條隊，因為要搜身，大家都好快速咁過咗安檢…除咗我之外﹗因為我入到去之後，女警見到我叫我要拉高啲件Tee，咦？咁認真要睇下我有冇藏有武器乎？我個樣都唔係好似壞人啫？﹗原來係佢見我條圍布包得太肉酸，所以忍唔住要大顯身手﹗唔知由布o既邊一個布位抓起，再左疊疊右疊疊，整好之後，嘩，果然靚好多喎，好有層次，仲有條皺褶邊係其中一邊添~