9-12-2012:斯里蘭卡day 2(part 1).Negombo at a glance

第二朝起身打開窗簾…哇,原來我哋間房係望到海o架~~~而且天氣好好呀~之前嗰晚嚟到已經黑麻麻,周圍係咩狀況都唔清楚,原來Blue Elephant對面就有一間教堂,旁邊有條村子,再對出就係海灘了~上一篇blog blog講過啦,遊客嚟Negombo主要係搭飛機,但其實Negombo都係一個海灘小鎮,如果遊客時間唔多,去唔到西岸or南岸o既出名o既海邊度假勝地,Negombo附近的海灘都近近地都可以過一過癮~可能香港o既朋友們唔知道,斯里蘭卡其實都係一個好適合喜歡陽光與海灘o既朋友,因為佢根本就係馬爾代夫o既水域附近,所以都係嗰個海,發展得唔多,所以海灘都仲好乾淨未受污染,不過好似馬爾代夫o既豪華resort就可能冇咁多了~好多斯里蘭卡o既旅館都包埋早餐,我哋呢間平平地都有~

餐廳o既佈置都好有風味~

簡單o既奄列、多士~之前咪講過我哋要「嚴格遵守預防肚疴守則」o既,點知第二朝就有挑戰,職員放低一杯杯用玻璃杯裝住o既冰凍o既不明果汁,我哋仲係度猶豫緊究竟安唔安全,但尋日都仲肚疴緊o既爹爹(由香港帶來的腸胃炎涼^__^”)諗都唔諗就飲咗,哎吔吔,我哋都豁出去,飲啦﹗反正睇落Blue Elephant都幾乾淨丫~原來係鮮榨o既木瓜香蕉汁嚟o架~yummy~tea or coffee我揀咗出名o既錫蘭紅茶,飲落又好似冇乜特別咋喎~趁約定司機o既時間未到,我哋決定出去附近行下,Negombo我哋唔會再返嚟o架啦~

經過條小村子出去海邊…

哇~~~~~~~~~~~好長好靚o既海灘丫~~~~~~~~~~~~~~~~天好藍~水好清~有個未嚟過印度洋o既人話要親手掂下印度洋o既海水…

先行過去測試下先–>伸手出去,掂唔到添–>行前啲啲+浪湧埋嚟…哇~~~~~~~

雖然親親印度洋了,達到目標了,但…牛仔褲都濕了﹗我冇呢位勇士咁英勇…:p

影一張嚟到斯里蘭卡第一張o既合照﹗有家姐o既wide angle相機,仲附設有正面睇到個screen o既功能,可以輕鬆影到五個人o既自拍照﹗

應該係一間天主教堂~唔知點解星期日都咁多學生著咗學校返來呢?呢度啲人入去間教堂個個都會除鞋o架~

Negombo街頭—-女學生的校服同香港好似喎~唔知係咪因為都同英國殖民地背景有啲關係呢?

另一樣斯里蘭卡名物—-tuk tuk~係印度我哋都有成日坐呢種三輪電單車o架,印度就叫做auto rickshaw,算係廉價的士,不過係斯里蘭卡要搵一架似私家車o既的士真係唔係咁容易搵到~不過搭tuk tuk都要費啲勁,事關好多tuk tuk都冇跳標,所以開車前就要同司機議價了,當又唔熟行情,要講價都唔知點講好,又唔甘心做水魚,又唔知回幾多錢至啱,真係要累積經驗至得~之後我會再講另一個tuk tuk跳標事件~開車lu,開車lu~我哋出發去第一站Pinnawala,睇大象孤兒院~司機話要一般要3個鐘車程?﹗好在今日係星期日,交通唔繁忙,所以大約兩個鐘頭就去到了~原來斯里蘭卡係冇公路的,雖然地方距離唔遠,全部開local路的話時速max都係40-50km/hr,花係交通o既時間都唔少~大致上馬路都係來往每邊得一條線,所以開車o既方式都係不斷爬前面架車o既頭﹗﹗唔習慣o既坐係車入面都會有啲緊張~


係斯里蘭卡坐車時兩旁o既風景典型嚟講都係咁上下,除咗係Colombo有好多好靚好高好新o既building,係其他地方大致上都係平房,樸素o既風格~好啦,下一篇同大家見面o既blog blog就去睇大象啦~
colombo negombo pinnawala
我哋架車就會由B點o既Negombo開往位於Pinnawala o既大象孤兒院啦~
待續

Comments

comments

在《9-12-2012:斯里蘭卡day 2(part 1).Negombo at a glance》中有 3 則留言

  1. 雖然條褲濕左,但係絕對無後悔做出親親印度洋的舉動~
    [版主回覆04/16/2013 14:37:23]結果我都冇乜點親親過,帶咗泳衣,後來去到南部o既海邊resort,近到聽住海浪聲入睡,結果都冇落到水~

  2. 在斯里蘭卡的小鎮遊玩,可以享受簡樸之美,例如教堂和小商鋪都各有特色。至於山和海,香港有不少其實也很美,但換了場景,感受又不一樣。
    [版主回覆04/16/2013 14:38:00]Negombo雖然只係大家落飛機之後落一落腳o既地方,但都有佢o既特色o既~

  3. 天很藍,沙灘又靚~
    [版主回覆04/18/2013 19:26:30]因為天氣好,所以海更靚吧,理論上應該之後我哋去南部的沙灘更靚,但嗰陣又天陰陰,睇落反而呢度靚啲~

Catherine 發表迴響 取消回覆

你的電子郵件位址並不會被公開。 必要欄位標記為 *