11-4-2012:首爾濟洲櫻花遊day 4(part 2).漫步濟州、海女博物館、Loveland

雖然只係啱啱食完lunch,但我哋見到呢間咁靚靚o既cafe…都係決定要入去坐坐﹗﹗反正都冇話一定要跑完幾多個景點,花多少少時間又如何?旅程最緊要enjoy~

韓國真係好多好有個性o既cafe,你可以見到每一個細節都有店主o既心機~小至一個插蘇﹗

清新o既設計,運用咗好多木木,感覺好舒服~

我叫咗橘子茶,day係咪飲咖啡?我都唔記得了~我吔仲share咗一個紅豆甜品~歎完個茶我哋要決定一下之後o既行程,發現之前過嚟日出峰呢邊o既沿路有一個海女博物館,我哋就去嗰度參觀啦~搭巴士同司機指手劃腳又指地圖,話佢知我哋要去邊,結果司機唔單止提我哋幾時落車,仲用好落力咁教我哋點樣行過去添,事關個博物館距離巴士站都有少少遠~

沿路經過菜田,哦,原來係大大條o既白蘿蔔~

仲有令我哋興奮o既濟州特產—-油菜花田~

雖然只係一小幅田地,但都夠我哋興奮+影相了~

到達—-海女博物館﹗

其實對於韓國海女唔係特別認識,但對海女本身就一啲都唔陌生,自小好鍾意睇「將太的壽司」漫畫,入面壽司師父新人大賽入面,將太o既對手下山鐵雄,佢媽媽就係一個海女,嗰幾回講咗好多海女o既辛酸,我哋(個「哋」係包括我家姐…:p雖然佢今次唔係一齊去,但講將太就唔能夠唔包括佢在內)就知道咗海女就係唔靠潛水用具,隻身潛入幾米深o既海入面,用手捕捉鮑魚呀、蝦呀呢啲海產~

博物館都做得幾吸引,用模型、蠟像、展示啲舊物品去講番海女o既工作同埋生活~最吸引o既部份就梗係講唔同年代o既海女制服啦~

除咗顧及資料性,個博物館亦有藝術性~

頂樓仲有個好開揚o既展望台,可以坐下休息下…

望下濟洲o既靚靚海~

我哋行完三層o既展區,諗住已經行完,先發現仲有另外一個分開o既兒童展區,有得睇仲有得玩﹗我哋唔細啦,都忍唔住逐樣拎上手試下影下相~

我哋行過去海邊睇下,好藍丫﹗之不過…呢度真係好大風~~~~~同埋好凍~~~~~~~~~~~~

行出去巴士站期間,見到呢個(叫咩名呢?椅?台?),非常有韓劇o既感覺呀﹗啲人通常會坐係度傾計,or啲大嬸會係度預備下飯菜,例如摘下豆角之類…

等巴士,見到一棵櫻花樹都幾燦爛啊~我記得呢度等巴士都有啲痛苦o既經歷…我哋係落車o既巴士站度等車,但等呀等,可能都有接近半個鐘,但一架巴士都冇﹗﹗我哋已經俾啲寒風吹到個人都僵晒~但又怕一行開就有車到喎,但等下等下都係唔對路,我哋甚至諗住有的士都會搭,但都係一架都冇…結果都係決定問下人﹗原來嗰度等係唔啱o架~好在咋~我哋凍到僵之際,我哋買咗一樽熱乎乎o既豆奶飲品,飲完暖得一陣又僵晒,最後都係要上咗車先暖得番~之前嗰日又淋雨,呢日又俾風吹,難怪之後會病啦~我哋晚上o既節目,係去參觀呢個以性愛為主題o既藝術品公園,咁樣形容貼唔貼切呢?

叫做Loveland,有室內+戶外展區,有大大小小o既雕塑,全部都係男歡女愛o既主題,有啲展示人o既線條美,有啲係諷刺性質,有啲係搞笑性質~除咗睇啲藝術品之外,睇啲遊人一樣過癮,見到啲大嬸們笑到咭咭咭聲…相我就唔放係度啦,話晒張張都係18禁,有興趣可以再問我啦~ :p

我哋去Loveland時沿路見到呢間大百貨公司,決定回程時要去逛一逛,果然食物衫褲鞋襪都有得賣﹗不過我哋好似淨係買咗少少護膚品同埋做手信o既嘢食~諗住係百貨公司附近搵餐廳食嘢,但好似行咗好耐都唔係好覺有餐廳…肚子餓又凍~

晚上o既櫻花一樣靚~

結果我哋都係番去酒店附近嗰條街度搵食,鋪頭多,但種類唔多,結果都係食番燒烤,呢間鋪頭令人印象最深刻o既係,有個講普通話o既小伙子,落單呀,上菜呀自然更親切啦~待續前往其他韓國旅遊blog

Comments

comments

3 關於 “11-4-2012:首爾濟洲櫻花遊day 4(part 2).漫步濟州、海女博物館、Loveland” 的評論

  1. 多謝你去到濟州都諗起我,我地都真係同海女幾熟下~哈哈~
    純睇相,好似兒童個部份好似最吸引咁~
    你講係LOVELAND見到笑到咭咭聲的大嬏,我諗起婆婆~
    [版主回覆01/10/2013 17:14:23]你去到應該都會諗起我啩?:p
    其實正式展覽嗰邊都好睇o架,因為好多實物展出,講得好生活化~
    除咗婆婆之外,仲有一眾阿姨都會咭咭聲…

  2. 韓國周圍都是好靚的咖啡店~ 好開心:)
    我都記得那天好凍…特別是等巴士同入夜的love land…
    [版主回覆01/13/2013 20:21:51]好想去下紳士的品格嗰間mango six,下次去韓國時search下位置~

  3. 去南韓自由行,的確要有冒險精神和講點運氣,講起天氣驟變,就不期然想起那次早上一家出行,乘車往南漢山城,下車後忽然遇上大雪的情景。
    [版主回覆04/16/2013 14:30:06]但嗰次遇著大雪大家都好興奮bor~

發表迴響

你的電子郵件位址並不會被公開。 必要欄位標記為 *