11-4-2012:首爾濟洲櫻花遊day 4(part 1).城山日出峰、海鮮鍋

之前嗰日成日都落雨,希望之後會好D天氣啦~見到咁o既格局就知道我哋之前嗰日濕o既地步有幾嚴重﹗﹗﹗我哋第四日o既行程由濟州市o既巴士總站開始~

因為去城山日出峰,所以要搭沿住海岸線向東駛o既巴士﹗好在巴士上面有電子顯示板,對於我哋身處o既位置都有所了解,加上重要o既大站廣播會有齊晒韓文、英文、日文同中文添~同巴士亦似乎有其他遊客都係去城山日出峰,留意住大家o既動靜先~

沿路風景都好好呀,沿住海岸線行,當然見到靚靚o既大海啦,又有田地、小鎮、農村、學校等等…終於到了﹗落車之後都要行多少少先搵得番入去景區o既路,我哋係咪落錯咗車?

自拍一個日出峰先~

當初我哋嚟o既時候,城山日出峰只係濟州島o既一個著名風景區,冇乜其他意義,但後來返來睇咗韓劇「仁顯皇后的男人」,男主角金封道係穿梭時空時就有係現代o既城山日出峰出現過啦~就係呢個標誌﹗yeah,又去多一個韓劇拍攝點﹗係入口附近勁多人,又立立亂,事關有好多小食檔,唔知係咪遊客太多,又嘈,地下又多垃圾﹗

好在入咗景區就好好多了~有自拍王﹗合照靚相無難度~

圖文並茂解釋日出峰o既形成,當然而家已經唔記得晒了~

我哋一路沿住上山o既小徑行,途中有好多奇石…

影奇石時…唔小心影咗充滿詩意o既小伙子﹗ XD

登高自然可以望遠,附近o既地勢都睇得清楚了,可惜天色依然陰陰暗暗呢~

我登上了日出峰頂lu﹗

好青春o既中學生﹗﹗﹗

落山o既另一條路見到有個小海灣,好似有得搭快艇出去兜下風咁~其實係日出峰對出有個牛島,有啲人都會去嗰邊踩單車遊覽,但我哋時間唔多呢,睇下下次有冇機會啦~

山下o既紀念品店﹗我哋嗰對cute版石像就係呢度買啦~而家放係電視機前面~ :)肚子餓了~

係一間舒舒服服o既小餐館坐低~呢頭附近o既餐廳比較多serve海產類食物,好在呢間明碼實價,我哋都唔怕食~

我哋叫咗海鮮鍋同埋煎帶魚,兩樣都好好味丫~海鮮鍋真係同圖畫一樣咁多餸,鮑魚、蝦、魷魚、蟹嗰啲都真係可以搵得到﹗個湯頭好鮮味~帶魚都係超鮮甜,就係呢一餐o既經驗,令我返到嚟香港之後勇敢地係街市買咗呢種對我哋講好陌生o既魚返嚟煮,希望可以搵得番呢種鮮味~不過香港買到o既帶魚冇呢條咁大條呢,冇得咁樣啖啖肉﹗大家嚟到韓國一定要試丫~

睇到我哋食到一乾二淨就知有幾美味了~heehee~
待續
前往其他韓國旅遊blog

Comments

comments

3 關於 “11-4-2012:首爾濟洲櫻花遊day 4(part 1).城山日出峰、海鮮鍋” 的評論

  1. 真係吃光光喎~個海鮮鍋唔辣咩?
    [版主回覆12/26/2012 10:40:31]佢係紅色咋,唔辣o架~好鮮味﹗

  2. 天陰陰才沒有曬燶!看山和海已夠靚
    帶魚真的好好食:)
    [版主回覆01/10/2013 17:17:18]咁又係,如果唔係就實燶,又要周圍搵地方買蘆薈gel~
    唔知點解係香港買唔到啲咁大條o既帶魚?

  3. 帶魚好似又叫牙帶,香港以前也有的,但現在真的甚少見。記得以前在街市的魚檔,是斬開一截截來賣的,一般的吃法是煎牙帶。
    [版主回覆04/16/2013 14:25:51]香港而家都有得賣呀,但新墟嗰啲細條好多,所以顯得好多骨,係濟州食到呢啲好大條,所以好厚肉,更好味~

發表迴響

你的電子郵件位址並不會被公開。 必要欄位標記為 *