10-4-2012:首爾濟洲櫻花遊day 3(part 2).西歸浦、天地淵瀑布

逛完嗰三個博物館都係時仲搵個地方食午餐了,哎吔吔,點解周圍都好似冇食嘢o既地方?好不容易見到唯一o既一間食肆,但入到去o既感覺完全係旅行團o既團餐feel,anyway,睇番個餐牌,食物o既選擇同埋價錢都係正常餐廳咁,就係度食啦~係韓國,當然先嚟幾碟小菜啦,細個時唔鍾意最basic o既大白菜泡菜,但而家就覺得佢最有韓國特色,而且味道好多時都唔錯,當然我都鍾意嗰啲唔辣o既小菜,仲有係香港o既韓國餐廳比較少有o既魚乾仔~我哋叫咗石鍋飯同埋牛骨湯,味道都算正常,牛骨啲肉少dd囉~行到出去,勁大雨,發現唔對路,只擔遮都一定全身濕晒﹗我哋決定買件雨褸~

連間便利店都好有傳統味道喎~

果然買雨褸係正確的﹗﹗﹗紅色嗰個就係我了~雨雖然好大,但行程要繼續~我哋係番落車嗰個巴士站搭巴士去咗西歸浦,嗰度2002日韓世界杯時o既大大大球場~

入到室內,解除武裝,鬆一口氣﹗

有你熟悉o既球員嗎?heehee,我哋就唔係好識了~ :p

有個展覽廳,都好大,講o既主要係當年世界杯南韓隊o既威水史﹗當然有展示下佢哋啲球員呀、波衫呀嗰啲啦~後來睇Running Man,有一集o既地點又係世界杯o既場館,不過嗰度係水原市,好似個展覽廳仲靚~

Be the Reds!!!

可以容納42256人o既場館~

座位排列出「Seogwipo (西歸浦)」字樣~

而家場館o既室內建築物係迷你電影院,不過好似冷冷清清咁呢~

呢種濟洲o既吉祥物石頭爺爺周圍都有見到o架~我哋買咗一對cute版o既番嚟做紀念品添~我哋嗰對仲要抱住咗濟洲名物,柑桔、油菜花同埋黑豚豬﹗

我哋依然為櫻花瘋狂~緃然濟洲o既櫻花已經過咗佢最靚o既時期,開始長咗葉子出嚟,但對於我哋第一次見到櫻花嚟講都好感動了~

雨中櫻花~我哋再上番巴士,天地淵瀑布比較靠近西歸浦市~落車見到,哇~~~~~~~~~~~~~~~~

係李民浩(或譯李敏鎬)代言o既Trugen﹗﹗﹗有好多佢o既相相丫~係香港時已經見過佢影o既電子版catalogue,今次見到真鋪頭~好高興啊~但原來睇啲衫o既實物好似冇著係佢身上咁時尚…:p而且都幾貴下﹗﹗係凍冰冰o既下雨天,最適合o既係…

食熱乎乎o既小食﹗呢款紅豆餡餅,問個姐姐幾多錢,佢指一指張1000 won紙幣…1000 won,ok丫,點知原來係三件o既價錢﹗超抵呀~又熱,又美味,唔會太甜,肚子暖晒~我哋沿住指示牌行落去天地淵瀑布,哇,原來要行落勁斜o既斜路,似乎上番來我哋應該冇咁o既體力…><

嚟到天地淵瀑布,如果唔係落雨,應該係個鳥語花香o既舒服環境,但而家感覺有小狼狽~

櫻花櫻花~

我哋睇到o既瀑布叫做不過不失啦,返到嚟香港,我有個大學同學,佢哋夫婦兩人係我哋o既一星期後去韓國,同係有濟洲,有首爾,係facebook見到佢哋啲相,羨慕到不得了,因為天氣好吧,濟洲o既風景更迷人,首爾o既櫻花又開到正好…嗚嗚,係咪有遺憾先有下次再去o既理由呢?之後我哋坐咗的士去搭巴士o既總站,嗰度係一間酒店,趁巴士未開,入去酒店lobby取取暖先…雖然巴士o既總站係機場,但路過濟洲市貌似熱鬧o既地方,我哋決定提早落車~

又幾啱喎,有條步行街,好多商店,好多食肆,好多年輕人~我哋見之前嗰晚先食完烤肉,不如試下其他食物啦~入咗間位於地窖o既fusion(?)菜館~好在餐牌有圖畫﹗﹗﹗當時我哋仲好天真咁諗,件事一定好順利~

哎吔吔,結果一啲都唔順利~上咗免費贈送o既小菜—-今次係烚雞蛋同埋辣年糕,同埋我哋有order o既八爪魚蔬菜撈烏冬之後,waiter上錯咗個辛辣公仔麵~我哋示意話我哋冇叫到啦,佢似乎完全唔識講英文,亦好懼怕去理解我哋o既body language,後來搵咗另一個同事嚟,佢都係唔識英文,但願意嘗試去了解發生咩事~餐廳有wifi,我哋用少量簡單o既英文+body language+google translate去處理呢件事,佢哋好似竟然叫我哋將就啲改食個辛辣麵?﹗nonono~我哋已經食個烏冬食到辣到跳舞,而且呢個烏冬澱粉質都好夠,再嚟個辛辣麵真係搞唔掂,佢話我哋叫個魷魚都係辣的…但我想食魷魚嘛~

最後都食到我哋想食o既菜式,哎吔吔,講唔掂真係有啲累人~

係呢邊再次見到Trugen o既分店,我厚住面皮問店員拎咗本catalogue﹗好嘢~好嘢~印刷勁精美呢,有好好o既紀念品lu~(
可能啲catalogue都係俾啲女fans拎晒instead of真係會買啲買裝o既成功男士~ :p)待續前往其他韓國旅遊blog

Comments

comments

2 關於 “10-4-2012:首爾濟洲櫻花遊day 3(part 2).西歸浦、天地淵瀑布” 的評論

  1. 在言語不通的地方,才會留下難忘的回憶。一切順利,就像平常事一般,反而開心過後,很快就忘記了。
    [版主回覆12/26/2012 10:36:28]所以事隔半年都仲記得呢個細節﹗

  2. 整支球隊,最熟悉的就是站在側邊那兩位。
    [版主回覆04/16/2013 14:24:40]我件衫啲色仲好配合添~

發表迴響

你的電子郵件位址並不會被公開。 必要欄位標記為 *