9-4-2012:首爾濟州櫻花遊day 2(part 2).狎鷗亭.濟州黑豚

係首爾大學搭番巴士出嚟已經餓得不得了,其實係首爾大學都有經過學生飯堂,佢哋好早就有人食飯啦,setting令我諗起韓版「惡作劇之吻」…不過當時都冇諗過係嗰度食喎,一來太早,二來見到啲人食o既嘢個樣好辣,三來都唔知點樣落order~我哋出番去地鐵站附近就搵嘢食﹗其實呢度冇影相,我哋落車我見到有銀行我就話不如換錢先,事關係香港時朋友都叫我係香港換少少好喇,去到換個rate好好多,又真喎~每一港元換到137won左右,去到有成147won咁上下,都值得咁做﹗銀行啱啱lunch time,得好少staff做緊嘢,都等咗一段時間,好在啲椅幾舒服~到我哋了,香港啲一千蚊咁多種圖樣,搞到人暈陀陀,佢要上電腦查reference對番我哋啲銀紙真假,仲有個高級少少o既職員一齊對,咁又係o既,應該比較少遊客係呢間分行換錢吧,可能明洞、東大門嗰啲找換店or銀行會熟手啲~嗰頭好多食肆丫﹗我哋揀咗呢間~

好似係食啲fusion鐵板燒的~我哋揭個menu有圖畫,好似都有英文,本來選咗一份雞肉一份炒飯,我哋好簡單咁同個小伙子waiter講「one this, one this」,但佢居然好大反應咁表達出嚟話唔得喎,好用力咁指住雞、伸兩隻手指,又好用力咁指住炒飯、伸兩隻手指,當時我哋都唔係好明…?﹗但佢咁激動,咁我哋改做兩份雞啦…佢就ok了,後來至明點解~

原來同枱食飯o既朋友一定要食同一款嘢﹗因為係用中間個大鍋一齊炒,所以兩人份o既雞or兩人份o既炒飯都ok,但每樣一份會搞唔掂﹗首先放啲生o既蔬菜係上面煮,落辣汁,煮到差不多時再放啲事先烤好o既肉落去,全部熟晒就可以食了~好辣﹗﹗﹗但都好好味~要將多餘o既汁汁刮走,同埋有啲特別吸味o既菜係特別辣的,就真係有啲辛苦了~好在,有無限量甜甜的泡菜可以中和到啲辣,有一款仲要係薄薄一片的蘿蔔,fit晒條脷o既形狀﹗我哋食飽就出發去下一個目的地了,因為夜晚要搭內陸機去濟州,所以我哋選擇比較近酒店o既地方行下,方面去拎番啲行李嘛~我哋見狎鷗亭只係距離我哋酒店幾個地鐵站,又話有好多特色小店,靚靚鋪頭,不如去行下啦~

個地鐵站果然有啲「鷗」喎,靚~

狎鷗亭附近另外一個特色就係好多整容診所醫院…

所以整容廣告都特多﹗我哋落車先發覺原來旅遊書講o既嗰個區距離地鐵站都要行一輪,天氣又熱…又渴…時間又一分一秒過去…仲未搵到…嗚~~~啲街都冇嘢睇﹗又話有特色小店…嗚~太辛苦了,要充充電~

首爾真係好多cafe﹗我哋飲咗呢間Machebette Cafe~環境好舒服丫~飲個凍cappuccino,涼快下,又醒神下~

好似首爾咁樣啲cafe咁多競爭,就唔會好似香港咁得starbucks同pacific coffee啦(其他高一個價位o既唔計入去講)~

抬頭見到有個招牌好吸引我注意…「incurable disease clinic」?﹗咁好?﹗我第一樣諗起o既係可以醫咩病?就係「蠢」,哈哈,人蠢冇藥醫嘛…唔知呢?

一路都係行呢啲小街咁,其實都唔sure最後有冇行到去Rodeo街…偶爾有一兩間靚o既鋪頭囉,但都熱到冇乜心機…

呢間好多盾牌做裝飾,成間城堡咁o既,原來係間飾物店,但我哋冇入去睇呀~後來我追埋「檢察官公主」嗰幾集,原來女主角馬惠理有嚟呢間買過條手鍊俾男主角徐律師﹗我哋到咗韓劇拍攝點了,yeah~嗰本跟著韓劇遊首爾都冇將呢個納入景點~無啦啦嚟到~因為時間關係,我哋都無法confirm有冇真正遊覽過狎鷗亭,我哋要返去酒店拎行李去機場了~其實呢個過程都有少少艱辛,因為我哋行到唔知去咗邊,唔知地鐵站係邊,於是搵咗架巴士跳咗上去,問司機去唔去地鐵站,跟住我哋又要對住啲巴士站名,好不容易先轉到地鐵,好累丫~其實去機場都好遙遠,去金浦機場差唔多有20個站﹗﹗﹗

去到check in後要拿拿林買啲嘢食,因為去到都好夜啦~我哋試咗韓國第一o既快餐店Lotteria,有少少失望添,個包好細丫、薯條好細丫﹗雞翼好似唔記得落調味咁,要沾茄汁食~

係候機室狼吞虎嚥後就上飛機了﹗

其實機程只係50分鐘左右,時間好快就過了,揭揭航機shopping catalogue,居然有得賣韓牛?﹗好誇張丫~我哋住濟洲機場附近o既Ramada Plaza Hotel,冇公共交通去呀,搭的士4000won鬆啲去到啦~入住後出去搵嘢食(又)﹗

濟州出名o既柑丫﹗貴得驚人呢~酒店對面一列都係餐廳,都唔知揀邊間好~旅遊書話濟州有幾樣嘢一定要食,一個係海鮮鍋,一個就係黑豚肉﹗雖然未有心理準備,但我哋第一晚就試咗黑豚肉了,因為招呼的大嬸盛意拳拳囉~

其實已經冇乜客人,但大嬸都為我哋開咗個壇~呢間o既燒烤係用炭火o黎烤o架~啲肉,哇,勁大件﹗我覺得有少少煮過咗龍,其實比較瘦o既位置係有啲硬,而且肉味都冇話特別濃,唔,唔算特特特別好食,總算試過啦~


酒店都好舒服丫~係傳統式的酒店,同首爾住o既兩間boutique hotel唔一樣~個浴缸好重要,因為之後幾日o既行程太累了,要靠佢幫手消除疲勞丫~
待續
前往其他韓國旅遊blog

Comments

comments

在《9-4-2012:首爾濟州櫻花遊day 2(part 2).狎鷗亭.濟州黑豚》中有 2 則留言

  1. 點解唔係機場換錢?
    最後個黑豚肉是你們自己燒的?那就是你們煮過龍了?
    [版主回覆10/15/2012 20:12:40]人哋話市區抵丫嘛~其實我哋都係香港換咗啲錢~
    唔係呀,個阿姐幫我哋煮的…一心諗住,好o既肉係唔會煮壞的﹗:p

  2. 大熱天要飲凍咖啡解熱,大冷天又要飲熱咖啡取暖(上次一起去首爾不是到處找熱咖啡喝麼?),怪不得首爾咖啡店林立啦!就好像整容店,也是因為需求大,所以首爾到處都是!
    [版主回覆10/15/2012 20:13:48]首爾的cafe真的好多好靚又有個性,唔似得香港咁俾啲大集團cafe壟斷,之後我哋仲會去其他cafe的~仲買咗隻杯返來添~

Patsy 發表迴響 取消回覆

你的電子郵件位址並不會被公開。 必要欄位標記為 *