9-4-2012:首爾濟州櫻花遊day 2(part 1).漫步首爾大學

好早就起咗身了,我哋賴住床,睇住Nox Boutique Hotel嗰個55吋大電視,男人嘛,最鍾意就係拎住個遙控按按按,無論係我爸爸又係,我老公又係﹗是但啦~我哋睇一陣棒球比賽,睇一陣新聞,睇一陣卡通片,居然吸引我哋睇得比較耐o既係呢個節目:

無錯﹗就係教育電視﹗唔知係真係上堂時睇o架丫,定係俾啲學生隨時需要學習就睇o既呢?入面教o既係小學數學,雖然唔識聽韓文,但講緊o既係距離、時速、時間嗰啲o既文字題,又有圖又列式,覺得教得幾好喎~另外一個台就教英文o既,個老師讀完一次句英文之後會「um…um…um…」同埋頭拎拎,意思係expect學生跟住嚟讀咁,都幾搞鬼,兩個台我哋都睇咗一陣﹗哈哈~我忍唔住影低數學堂落嚟…直至肚子餓了,我哋去食早餐+出發玩~

今次我哋會住o既三間酒店之中,得第一間酒店有早餐咋,都唔錯喎,飲品除咗有咖啡茶朱古力之外,果汁同牛奶都有,除咗眼見o既香蕉、烚蛋,仲有多士、乳酪、粟米片,樣樣都幾好咁~我哋馬上要返房收拾行李跟住check out先,因為晚上我哋就飛濟州lu~寄存行李到酒店櫃枱後,我哋出發去今日o既第一個目的地—-首爾大學。 其實今個trip我哋都玩得比較率性,之前基本上冇乜plan到行程,只係買咗啲旅遊書,book咗機票酒店就出發了,我哋都係逐日plan逐日o既行程~不過嘛,今次叫做我第三次去韓國了,第一次係小學時代同爸媽跟團去,第二次係2005年聖誕同爸媽姐自由行,今次係第三次,但今個trip我哋去o既地方,同之前去過o既一啲都冇重覆﹗而且我都感覺好滿意添~ 因為晚上要搭飛機,所以今日去o既地方要比較近同埋交通要比較可靠﹗<新假期>之前有一期出咗日本韓國賞櫻特集,我哋都買咗嚟睇,嗰陣見到佢個櫻花預測都有少少驚o架,好似係睇咗我先決定去埋濟州添…入面有講除咗common o既首爾賞花點汝矣島之外,都列咗少少其他o既賞櫻地點,其中一個就係首爾大學,我哋即管去睇下有冇啦,冇的話,逛逛大學,睇下一個城市o既文化氣息都好好~

由我哋住o既Nox Boutique Hotel行去驛三站只需要10分鐘左右~我哋目的地係9個站左右距離o既首爾大學~

果然係韓國﹗一落到地鐵站,最大嗰幅廣告就係…整容廣告﹗

我哋先買咗「T-money」,即是韓版八達通,我哋2005年時去嗰次都冇買呢,唔知係未有定點樣,我都唔記得lu~令我驚訝o既係,原來全國通行﹗去到濟州都一樣用得到﹗去到首爾大學站… 點解附近街道圖搵唔到大學o既蹤影o既?﹗原來要再轉巴士﹗

好在搭巴士都好順利,我哋認住個站名(in韓文),再睇住路線圖+電子顥示板…成功落到車﹗落車嗰度有一班似係學生o既年紀,另外一班係大叔大嬸,佢哋全副武裝,原來附近有遠足路線﹗不過我最近扭傷腳又未好得番,加上我哋全無裝備,都係唔好亂咁跟住佢哋上山了﹗

係落車o既巴士站見到車身廣告,我哋認得係東方神起﹗話說我哋本身都唔係好識佢哋,但係之前偶然係J2睇咗啲咩亞洲音樂節之類的節目,見到佢哋表演,我哋好奇怪,模糊印象之中明明東方神起好似有幾個人o架喎,點解嚟嚟去去得兩個係度跳o既?﹗我哋仲專登search咗wikipedia睇下,哦,原來有幾個退出咗…得番兩個人好似好寂寞咁…因為我哋對於首爾大學手頭上o既資料係零,所以我哋要睇地圖,而只有一個目標希望達到,就係睇下見唔見到櫻花,其餘嘛,隨便逛逛睇下嘢咩都ok啦~

大學正門左邊已經係呢個好搶眼o既玻璃箱building,去睇下係咩…

原來係大學o既美術館﹗不過星期一休館呢,唯有係外面留個影啦~

首爾大學靠山而建,地方好大,感覺有少少似中大,但係更大咁﹗環境好舒服,覺得係度讀書一定好暢快呢~
SONY DSC
我哋參觀咗大學博物館,不過展出o既唔係關於大學o既東東,係啲人文發展、藝術書畫的東東,雖然好多嘢同中國好相似,但都有唔同o既地方o既~我哋走時順道問下個管理員啲櫻花係度…但係佢一啲啲英文都唔識添…

我哋指手畫腳,佢叫我哋行上大叔指我哋o既方向,見到池塘…但冇櫻花o既???睇落個景觀好似新假期櫻花書仔show出嚟嗰度咁喎,但係一丁點櫻花跡象都冇喎~會唔會唔係呢度o架?如果首爾呢一刻o既櫻花樹連花蕾都未有咪si kel kel?

我地好仔細咁行一圈,慢慢睇啲樹,嗰陣都唔知道係咩樹,但後來見多啲櫻花,我敢講呢啲係櫻花o既花蕾嚟的﹗加上我哋後來係合作社見啲post-card,有新假期嗰個view,問佢哋位置係邊,正正就係呢度﹗所以真係未開咋,開咗時一定好靚﹗

校園真係好大…我哋行到去一個學生活動中心,有好幾層樓的,感覺真係好似大學丫﹗有少少懷緬青春時o既感覺咁~

汽水機﹗poster﹗書店﹗soc房﹗大學書店除咗啲學習o既書之外都有唔少小說同埋旅遊書喎~我哋係大學o既合作社買咗一個file同埋單行簿做souvenir~

SONY DSC 呢個似乎都係大學o既landmark,因為有唔少souvenir都有呢個圖形﹗

牆上o既塗鴉都係韓文乎?

各種校園內o既植物~差唔多要走了﹗

原來呢個大門口都係landmark喎,我哋買o左o既file同單行簿就係呢個景做封面了﹗當然要補番影啦~好不容易搵番個巴士站搭番車出去地鐵站嗰邊~繼續行程﹗
待續
前往其他韓國旅遊blog

Comments

comments

在《9-4-2012:首爾濟州櫻花遊day 2(part 1).漫步首爾大學》中有 3 則留言

  1. 首爾大學的建築物及地標設計都很現代化,是她的歷史不太悠久,還是變身成功?
    [版主回覆04/19/2012 20:06:07]確實我哋又冇乜點留意過首爾大學o既歷史喎…
    http://www.useoul.edu/history
    睇咗呢個網頁,原來間學校有百幾年歷史,但幾過南北韓戰爭,校園曾經搬過去釡山,而家o既校園係1975年開始建立的,唔知係咪啲building都係嗰時起呢?or又幾時翻身過?咁又唔知了~

  2. 韓國的電視真的好睇過香港好多…~ 台又多, 節目又多元化!! 補習的教得幾好!
    學校的環境很舒適!~ 沒咩緊張的氣氛! 🙂
    [版主回覆04/23/2012 19:22:23]好適合你按按按個遙控﹗因為有好多台~
    是丫﹗學校好舒服~但住宿舍遲咗起身要趕去上堂要跑好遠,因為地方太大﹗

  3. 很喜歡這樣隨心的去玩…
    [版主回覆04/23/2012 19:22:55]如果一早fix晒行程跟唔到就會好沮喪~我哋隨心咁玩反而有啲特別o既經歷﹗

David 發表迴響 取消回覆

你的電子郵件位址並不會被公開。 必要欄位標記為 *