17-11-2011:斐濟蜜月day 11(part 2).Sigatoka小鎮四處走

完成咗Sigatoka River Safari之後就解散啦,原本個tour可以包載我哋返酒店,但我哋既然出到嚟,不如就係呢個Sigatoka小鎮度行下啦~睇番啲資料,雖然Sigatoka連接好多旅遊景點同埋Coral Coast resort,原來係Sigatoka本身一間酒店都冇噃,而且啲商店都好local,正好俾我哋認識下當地人嘅生活﹗DSC02238

呢個熱愛rugby嘅國家,連垃圾筒設計都係rugby乎?DSC02244

呢間Tappoo好靚,賣嘅係精品同紀念品,你睇我滿載而歸+喜孜孜嘅表情~DSC02246

去到老本行嘅門口,職業病發作,要睇下人哋clinic嘅設計,又睇下啲poster~DSC03891

雖然畫得個樣唔係太似⋯有名標簽咗係隔離大家都知佢係邊個了﹗果然世界上有中國電影嘅地方就有Jacky Chan﹗我記得以前去印度旅行,啲印度人,通常係小朋友啦,見到我哋呢啲黃皮膚面孔,首先會大叫「Konichiwa﹗」(日文->你好﹗),我哋輕輕搖頭,佢哋就會轉channel,大叫「Jacky Chan﹗」似乎係佢哋心目中,中國人=Jacky Chan了﹗成龍真係好威啊~

肚子餓了,搵地方食嘢先,見到呢間Fijian Kitchen,試下啦﹗lunch

其實食物就只有3款,大家見到餐牌有得揀Sui、Toa、或者Ika,我哋當然唔知係乜東東啦,店員帶我去玻璃櫃度睇,原來係牛骨湯、雞肉湯或者魚湯~lunch2

我哋叫咗雞同埋魚,主食又係佢--cassava﹗今次我會小心食了﹗兩款湯汁都好味啊~雞嘅湯底比較似一般嘅清雞湯,魚就鮮甜啲,兩款都加咗椰汁落去,好香濃,加上蔬菜,營養更均衡了﹗今次記得放棄太粗嘅cassava,冇食到喉嚨損啦﹗我哋兩個對呢個味道都印象深刻,返到香港仲整咗一次俾爹媽家姐佢哋食添,當然個整法係我想像出嚟啦,我都冇買到Fiji食譜,我記得我用咗烏頭,因為質感同呢個魚比較似,而啲軟軟腍腍嘅葉子我就用咗菠菜,椰汁就走唔甩㗎啦,雖然唔係同呢個咁嘅味,但都幾好食㗎~呵呵~DSC02252

非常好的超大signage「No Smoking」﹗﹗DSC02254

一場去到市集,逛逛菜市場,哈,又會堆到啲蕃茄咁高嘅?

我哋之後就搭巴士返酒店了,反正都係一條路,冇咁易迷路,只要上啱方向就ok了﹗路上冇好明確嘅巴士站,反正都係經過一條條村子,大家要上就上要落就落,感覺同斯里蘭卡Galle好似呢~(請參閱:15-12-2012:斯里蘭卡day 8(part 1).海龜大本營.Galle市區走走看)

下午我哋就留番係resort休息休息~DSC03905

例如睇下書⋯

仲有瞓下晏覺(相就唔好post了)、用我哋嘅private outdoor shower浸下泡泡浴(相就更加唔好post了),享受下悠閒嘅時刻~:)DSC03913

晚上留番係resort食Lovo自助餐﹗之前已經用文字介紹過乜嘢係Lovo,呢幅圖畫就更生動說明啦~DSC03914

有Lovo魚食﹗DSC03912當然主食又係各式各樣嘅根莖類啦~所以話,雖然Fiji嘅環境、氣候都好舒服,但我睇我都唔適合係度長住了,我要食白飯呀﹗﹗

待續

前往其他斐濟旅遊blog

Comments

comments

發表迴響

你的電子郵件位址並不會被公開。 必要欄位標記為 *