14-9-2010:台北宜蘭trip day 3(part 2).藏酒酒莊美食.礁溪@雅閣溫泉行館

完成我哋o既小蕃茄DIY作品之後,係時候食真正o既午餐了﹗

藏酒酒莊餐廳o既環境真係好正~樓底高,陳設雅緻,食物品主要係西餐,另外有火鍋系列~食物都唔貴,一個set有齊湯、沙律、主菜、飲品、甜品都係台幣350至450左右咋~係香港邊度搵到﹗

爹爹食個火鍋餐,即是上面中間嗰張相,大大份﹗除咗肥牛之外,仲有大蝦呀、豬紅呀咁~我同媽就食西餐,兩個都係用酒嚟調味,媽咪o既牛扒要求十成熟都好軟好嫰,我o既係紅麴雞扒,酒味好濃郁﹗除咗主菜之外,沙律、餐湯、甜品、飲品都一應俱全~啱晒我鍾意「有湯、有飯、有嘢飲」o既要求﹗

食飽飽之後我哋去紀念品+bar度品酒,阿輝幫我哋試齊每一種藏酒酒莊o既出品,分別係紅葡萄酒、白葡萄酒、梅酒、金棗酒、五粮液同埋米酒~我都係鍾意啲酒精成份低啲、甜啲o既酒,五粮液嗰啲真係頂唔順呀,又唔好味~呷一小啖就要俾晒成杯爹爹﹗結果我哋買咗幾支酒,有啲送咗俾台灣朋友,有一支帶咗番嚟香港,我哋而家都未開嚟飲呢~

ooooooooooooo~~~~~~~~~~~~~~要離開農場lu~

返過去農場嗰邊拎齊行李,仲有我哋o既「戰利品」,農場o既工作人員小姐送番我哋出去火車站~

頭城車站o既building雖然都只係細細楝,但都算係呢邊較重要o既一個站啦,起碼快車自強號會停呢個站~由頭城去礁溪o既車都好密呀,所以基本上我哋買完飛都衝過去月台了~

睇到張飛,就知道頭城同礁溪有幾近了﹗只需要台幣15﹗

只係6-7分鐘車程就到lu~我哋book咗一間溫泉旅館,佢哋安排咗車出嚟火車站接我哋~

呢度就係我哋住兩晚o既雅閣溫泉行館了﹗其實係宜蘭民宿網「http://house.ilantravel.com.tw/」逐間click click click入去睇,見到呢間就好啱心水了﹗其實礁溪係一個天然溫泉o既地方,啲書話,火車站附近1.2公里全部都係溫泉區,所以每一間旅館打開個熱水都係溫泉﹗雅閣會被我揀中,因為佢有啲房型叫做villa,每間房係有私人o既溫泉池係個小花園度o架~佢都有大浴場,不過要假日先開放囉~

呢個就係雅閣o既網頁﹗
http://yage.elandbnb.tw/

入到去都好大呀,間villa直接由室外開門入去,經過小花園再入屋,大大間房有雙人床、梳化之後仲有大大撻空地﹗浴室都好大,有雙人浴缸,即使唔係花園個池浸都可以係室內浸,浴室有個玻璃天窗,可以天然採光,日頭唔駛開燈﹗加上全館都有寬頻上網,lobby就有wifi,所以都好good~

我哋夜晚至浸溫泉﹗趁未天黑出去行下先~先去附近o既遊客中心~

遊客中心係一個小公園入面,有counter可以問嘢,又有啲展覽講下溫泉o既資料、附近o既景點﹗外面有個免費o既浸腳溫泉,不過好似唔係幾夠熱咁添~

行下行下經過旅遊書上面都有介紹o既玉石澡堂,呢個澡堂係免費o既公共澡堂,
入面非常簡陋,聽講只有一格格放衫o既位置,一日廿四個鐘有廿三個鐘係男湯,只有晚間八點至九點開放俾女士用,大家唔好入錯時間啊~如果唔係,就會見到啲光脫脫男係入面了﹗

典型o既礁溪街景﹗抬頭一望,所有所有building都係溫泉旅館﹗每一條街都係﹗多到好誇張o架~要脫穎而出真係唔容易呢~我哋行下行下時經過有啲大大間o既溫泉旅館,佢哋有類似水上樂園咁o既大溫泉area,唔住入去都可以俾錢去浸,我哋都有諗過不如第二晚去試下,另一種體驗,結果都係攰得滯…冇去到呢~

逛逛街,肚子餓,經過一間飯店,好大間﹗諗住入去試下囉~

有少少浪費一餐o既quota添,呢度似乎係旅行團食團餐o既地方,我哋都叫咗一份餐,份量都好足,但話好食又唔係特別好食,又唔係難食o既,不過冇乜特色囉~

返去浸溫泉﹗

呢度就係我哋間villa o既入口了~

一打開熱水就聞到陣陣o既溫泉水味了~個池都幾好﹗又有彩色閃燈、又有水柱功能,而且個池都ok大,幾個人浸都唔擠迫~

之後嗰日仲有礁溪、羅東o既行程呀,大家密切留意~

待續

前往其他台灣旅遊blog

Comments

comments

在《14-9-2010:台北宜蘭trip day 3(part 2).藏酒酒莊美食.礁溪@雅閣溫泉行館》中有 7 則留言

  1. 照片沒拍出那房問和溫泉的大小,房間寬敞,浸溫泉的水池也頗稱心,值得推介,我第一次住台灣民宿,沒想到比住酒店的還要好呢!
    [版主回覆10/03/2010 12:34:00]replied

  2. Re爹爹: 房間太闊,鏡頭唔夠「廣角」,影唔晒添~ 其實今次o既「民宿」比較接近旅館嗰type吧~不過以前住過的民宿都好靚,但陳設就接近可愛方向多啲,較適合女孩子or年輕情侶之類~

  3. 我們在花園個大浴池連浸兩晚,可以說值回票價。
    [版主回覆10/08/2010 19:47:00]replied

  4. Re媽:
    佢o既賣點就係呢度嘛~不過我覺得即使第二晚出咗去浸又係另一番經驗o既~
    上次我同day去白濱都浸咗三個地方﹗民宿o既浴池、另外兩個外面o既溫泉﹗

  5. Re游魚: 我哋都係打電話去訂o架咋~冇辦法啦,咁樣可能對店主方便啲吧?唔駛一日check幾次~不過打電話去訂都好casual o既,又唔駛落訂住,又唔駛俾太多個人資料佢﹗可能因為我哋去時唔係旺季吧,啲房間都唔緊張~ 你諗住幾時去宜蘭?

  6. Re拖羅媽咪Mrs Chu: 歡迎你到訪我個blog呀﹗ 我哋book雅閣溫泉就咁打過去就ok了,同佢哋講我哋係香港人,都唔駛俾錢先,去到先俾就ok啦~嗰度都唔錯﹗房間都有好多選擇呢,如果係假日,大浴池會開埋添~

  7. Hello, how to book 雅閣溫泉行館 in Hong Kong?
    [小肥肥回覆04/16/2013 16:31:48]Thank you very much for the information.
    [版主回覆04/16/2013 14:22:50]Re小肥肥:
    歡迎你到訪我個blog~
    我們那時候打長途電話過去,說明住宿日期,要咩類型o既房,幾多人,聯絡方法之類,佢都唔需要我哋俾咗訂先,當時就冇網上訂房的,而家有冇我就唔知u~

小肥肥 發表迴響 取消回覆

你的電子郵件位址並不會被公開。 必要欄位標記為 *