住係Just Sleep旅館o既晚上，好好瞓呀~因為床好舒服﹗

oh，一大早起身，打開窗，就見到好開揚o既中華路景觀了~讚呀﹗如果係度起一楝住宅，每個單位真係唔知賣幾多錢呢~

五樓係食早餐o既地方，又有電腦俾大家上網~早餐質素都好好呀﹗中式、西式都有，食物都企企理理的~不過呀，好多香港人﹗周圍都係廣東話~~~~~~~~~~~~~~係咁o架啦，因為旅行社package有得揀嘛~

食飽飽我哋就執齊行李出發去宜蘭了~去宜蘭可以搭火車或者長途巴士，聽講起好咗雪山隧道之後，來往台北同宜蘭就方便得多了~我哋選擇咗火車，始終都容易啲掌握吧，班次呀、上落車地點呀、車程時間呀，樣樣都有保證啲咁~後來去到宜蘭，都覺得火車應該好啲，因為落車o既地點方便啲吧~

台灣o既鐵路有唔同速度o既車，分別在於停o既站數唔同，我哋選搭車程最快o既自強號，去到頭城站只需要一個鐘頭十五分鐘左右~

到lu到lu~一出到站就見到著住醒目粉紅色制服o既女生嚟接我哋啦~我哋會留係頭城農場兩日一夜，參加佢哋o既酒鄉之旅活動﹗

前往農場途中，見到好藍好藍o既天同埋海，天氣好好呢~同香港好唔同﹗香港呢排都落雨呢~遠處嗰個島就係宜蘭o既landmark龜山島了﹗我哋第五日會坐船出海去遊龜山島同埋睇海豚呢~

我哋join o既農場兩日一夜行程，每位台幣2800，包三餐一宿同埋行程入面o既所有活動，即農場o既焢窰、釣魚、燒烤、放天燈、第二日o既大自然知性之旅、參觀酒莊、酒莊DIY，都好豐富o架~我都覺得幾抵玩呢﹗值得推介~

行程由下晝三點鐘開始，但我哋早上十點幾就嚟到農場lu，加咗台幣200，食埋個lunch，多出嚟o既時間我哋就周圍逛逛先，享受一下農場o既悠閒感覺~

頭城農場係全台灣面積最大o既私人農場，成個山頭都係佢哋o既地方，不過，我哋活動o既範圍都比較集中o既~農場o既中心有一楝大樓，reception、飯堂、住宿都係呢邊，其他戶外體驗就要行遠少少咯~

套裝行程已經包咗三餐一宿，但農場仲預備咗無限量供應o既小食俾大家享用﹗有煮米粉、甜品冰品好似綠豆沙呀、湯圓呀咁，仲有各式各樣o既花茶~

咦，有啲人參加緊DIY活動呢，原來佢哋做緊竹玩具，除咗呢個，仲有另一啲時段做葉拓T-shirt~

hea~~~~~~~~~~~~~啲鴨鴨都好悠閒呢~我哋係樹蔭下坐下都好涼快舒適~

農場午餐採取自助形式，菜色都好有鄉土風味，味道樣樣都好~又有好大煲湯喎~heehee~好似入camp咁呢，食完之後要將啲碗盤分番類收拾好o架，不過就唔駛自己洗碗o既~

食飽飽就差唔多可以check-in了~

估唔到啲房都好靚喎~乾淨、舒適、企理﹗又有獨立浴室~景觀仲一片綠油油添~

我哋o既行程大致上都同呢個「豐富之旅」差不多o既，第一日就完全一樣，第二日知性之旅之後，我哋就過去附近o既藏酒酒莊活動了~

行程第一項活動就係焢窰，我哋一聽個名都唔係好明係做啲咩~

去到焢窰場~原來焢窰就係指係野外起個火，然後係裡面煨食物，好似蕃薯呀、雞呀咁~

先有老師教我哋一似個步驟，首先要掘鬆泥土，之後測試風向，跟住就要疊起啲石塊啦，整一個拱橋，再半圓形咁一層一層疊上去，最後封咗個頂，再挖深少少個洞，擺放竹枝入去，用報紙起火，當燒著咗啲竹之後，就可以放木頭入去，咁個窰就完成啦﹗

我哋一步一步跟住做，最最最最最難就係最初個拱橋呢，我哋整嚟整去都整唔到，結果都係要老師出馬，之後各個steps就好順利啦~

成功了﹗我哋個火幾靚~

雖然如此，但老師話，宵夜o既煨蕃薯都係用番佢哋o既大窰去整呢，可能想集中處理吧~

整到對手同塊面污糟都在所不惜﹗

焢窰場有幅好靚o既馬塞克畫呢~

之後仲有豐富o既活動呀~

待續

前往其他台灣旅遊blog

Comments

comments