16-5-2010:東京埼玉trip day 2(part 1).踏足埼玉縣之川越小江戶

第二日我哋都好早就起身lu,因為要搭早啲o既火車出發﹗川越小江戶嗰邊應該都好多嘢行呢,而且黃昏時份仲要趕過去位於長瀞o既溫泉旅館喎,時間都係預鬆少少好啲~

我哋間酒店唔包早餐呢,所以提早出發去食早餐~見到呢間cafe樓下o既牌寫住,買任何飲品+百幾yen就可以有一份早餐,咁抵?好啦,就食呢間啦﹗

中咗計添,原來每杯飲品要六百幾yen呀﹗oh no no~我都未食過要六七十蚊港幣o既早餐丫﹗好在味道都好好~我哋叫咗兩款三文治,仲附上yoghurt同埋洋葱湯添~我此愛上咗抹茶鮮奶﹗環境都幾舒服…不過最遺憾o既係,唔好睇我哋好似好悠閒咁影相,其實,啲食物一到,我哋就狼吞虎嚥係咁塞入口了,因為要趕火車呀~

我哋搭o既火車,就係呢班特急小江戶,中間都冇乜停幾多個站,唔駛一個鐘就去到川越小江戶了~

呀,by the way,介紹一下,我戴住嗰條圍巾係先一晚係東京買o架,因為低估咗呢段時間係關東地區o既清涼程度呢,只帶咗件薄薄長袖外套,夜晚唔夠暖添,所以買咗呢條圍巾,除咗保暖之外,襯下衫都好丫~

係預備今次個trip時先發現呢件事呢~

話說同爸媽追劇集,睇過一套叫做「夫婦道」o既日劇,入面講一個家庭,佢哋開個茶園,賣手搓茶,有三個女一個仔,故事講呢一家人o既生活﹗佢哋就係賣狹山茶了,果然係狹山市附近,真係見到同劇集入面一樣o既茶田呢~原來夫婦道o既背景就係埼玉o既狹山市﹗所以二家姐八夜子可以每日去東京返工呢,都唔係太遠~

落車﹗

川越市係一個悠閒、寧靜o既小鎮呢~好乾淨、好清新~

街道都好舒服﹗因為地方唔大,雖然有旅遊巴士路線,但我哋都決定用一對腳﹗走向目的地之餘都觀賞賣沿途o既風景嘛~

上晝先去仙波東照宮同埋喜多院~因為唔熟悉日本歷史吧,所以背後o既故事都唔太理解,總之同德川家康嗰啲人有關o既地方啦~係入面住過乎?唔記得了~:p

對我哋嚟講呢度就係一個充滿住古老日式建築o既地方,都好有風味o既~

許願~

呢度有祈福o既地方,呢班大叔大嬸興致勃勃地敲響個鐘呢~

可以入裡面參觀,但裡面又唔准影相喎~所以…

哈,佢哋做咗狗仔隊﹗

入面仲有五百羅漢~各有各o既神態﹗右上角嗰個笑咪咪的,左下角嗰個:「吓?我唔知喎~」

試下食呢個大名燒~最初以為係蕃薯餡料…因為有個圖畫嘛,但個老闆嘰呢咕嚕問我
嘢,唔識答嘛,結果俾我哋嗰個係custard味呢,都好味o既,不過蕃薯係川越o既特產囉~

係招牌影番張相先﹗

我哋行出去川越o既「小江戶」嗰邊o既一番街~川越小江戶最出名o既係,嗰度充滿住江戶時期o既建築物~

連郵政局(右上)都係古代建築嚟o架~因為係遊客景點,所以有好多特產,美味o既小食,靚靚精品~人力車仲增加古舊feel呢~

鐘樓係川越小江戶o既landmark~呢張相係自拍王嚟o架~

我哋係呢間鋪頭食lunch~

冷烏冬同埋冷麵﹗好清涼呀~而且勁大份﹗食到肚滿腸肥﹗:p

逛逛菓子屋橫丁,呢度成條街都係賣糖果糕點餅乾零食o架~

其中有勁大碌o既黑糖棒棒﹗不過好似冇影到添~右下角o既可愛小妹係專登影俾day的~

最後參觀埋講祭典museum~

除咗展示祭典時要用o既巨型花車之外,仲有現場表演呢,似乎呢啲唔係專門嚟表演o既工作人員,而係真正o既村民﹗有音樂啦,又有著住戲服o既演出﹗不過啲音樂比較單調,環境又暗暗地,我哋又攰攰地…所以嘛…

打算逛多一陣~咦~

似乎有特別o既活動喎,promote川越小江戶o既function乎?有得平價試下地道美食,又有得玩,又有得影相喎~好熱鬧﹗我哋「唔識字」,冇走去排隊呀~

兩個人都累累地,我哋決定出發過去旅館lu~拿拿聲跳上一部巴士,返火車站去也~

待續~

Comments

comments

在《16-5-2010:東京埼玉trip day 2(part 1).踏足埼玉縣之川越小江戶》中有 8 則留言

  1. 日本小鎮,寧靜清幽,附近若有古蹟名勝,或者旅遊設施,即使不是著名景點,也值得小住一兩天,勾留閒逛。
    [版主回覆08/06/2010 20:18:00]replied

  2. 因為日本人好識推廣旅遊吧,又識得保育自己o既歷史文化古蹟、大自然美景,所以好似度度都值得去咁﹗都好有自己o既特色﹗

  3. 你買回來的狹山茶都幾好飲,不知道是不是手搓的?
    [版主回覆08/07/2010 23:13:00]replied

  4. 日本人素來重視文化遺產,不像大陸視之為文化財產。前者的心態是:不管收入如何,或要付出多少,都竭力保護;而後者的心態則是:因為可以賺錢,甚至成為搖錢樹,所以要花錢維修,甚或集資「加建」、「創建」,久已失傳湮滅的,也可以憑藉一點點資料,使遺跡「復活」。
    [版主回覆08/07/2010 23:14:00]replied

  5. Re媽: 應該唔係吧?如果唔係冇咁平(雖然都唔係太平~)﹗:p 不過要快啲飲,因為好似都會過期~

  6. Re爹爹: 無論動機係咩,會保護就好,但我唔鍾意啲地方係度整色整水,加le加lo,搞到唔似原本個樣咁就唔好~

  7. Hi Rita……..唔好意思呀,因為我plan緊去呢個小江戶呀,我想問呢,如果好似你咁靠自己行晒呢度,大概要spend幾多時間?
    [版主回覆09/09/2010 01:02:00]replied

  8. Re小白兔: 哈囉~歡迎你嚟我個blog blog~ 我哋去小江戶都係一個full day咋,旅遊書o既主要景點都行過了,而且都係步行距離,不過嘛,如果有啲art museum呀嗰啲你想逛埋就可能要多少少時間囉~ 我哋嗰朝早上係東京出發,傍晚就過去長瀞o既旅館,中間大概花咗六七個鐘玩吧?

chi hung 發表迴響 取消回覆

你的電子郵件位址並不會被公開。 必要欄位標記為 *