24-2-2010:海洋神話號day 5.再訪海南島三亞.郵輪say goodbye

又可以以一個旁觀者o既角度去影番海洋神話號,意思即是我哋個人又離開隻船了~我哋嚟到上岸最後一個port,係舊年有嚟過o既海南島三亞~我同爹媽就嚟玩過四日,不過家姐姐夫婆婆菊姨大姨佢哋就未嚟過~我哋其實一早就係船上book好上岸o既tour,打算去我哋三個都未去過o既南山佛教景區逛逛,呢個係國家5A級景點嚟o架,上次o既4A大小洞天都唔錯lu喎,南山應該更有看頭,又有海邊宏偉o既超大觀音象呢~

不過好可惜嘛,都唔知搞乜鬼,過關啲procedure搞得勁慢,比起原定上岸o既時間遲咗好多﹗郵輪職員話,南山tour去唔切了,大家可以選擇退部份$$改去三亞city tour,或者退晒全部$$乜都唔參加都可以~我哋見city tour不太吸引,而我哋又對呢個地方「熟熟地」,所以決定唔跟了~

我哋沿住郵輪碼頭o既堤壩行番入去再截的士,原來的士唔准駛入碼頭兜客呢~結果我哋分開兩部車,去我哋o既目的地﹗我哋介紹咗佢哋去…

鹿回頭公園﹗事關呢個公園就係市區內啦,車程十分鐘左右就去到,而且可以飽覽成個城市喎,都不失為一個只有少時間就去行下o既好地方~

又有可愛o既鹿鹿可以餵下佢哋呢~

究竟係咪我同爹媽同鹿回頭公園時辰八字唔夾呢,點解去咗兩次,兩次都落雨?﹗玩到咁上下,居然又下起傾盆大雨喎﹗絕對唔係淋少少唔怕o既程度…我哋又要搭番車番去郵輪碼頭,但的士又好似唔係好易截到咁喎…

我哋遇到好心人﹗話說郵輪有辦好多唔同o既tour,其中有啲tour都有去鹿回頭公園﹗佢哋o既local guide好好心呀,見到我哋係郵輪o既搭客,居然叫埋我哋上旅遊巴呀﹗不過嘛,我哋就要跟埋佢哋去剩低落嚟o既景點先至番上船囉~

當中去咗絲綢廠﹗

哈,婆婆仲參加埋一齊拉絲綢被添~

返上船,去Romeo and Juliet餐廳食lunch~

唔記得係咪呢日呢?除咗order appetizer、main course、dessert之外,lunch hour中間有個salad bar,大家可以出去揀喜愛o既材料整成沙律o架,但見到樣樣材料都咁吸引,即使叫咗師傅呢個只要少少,嗰樣只要少少,堆下堆下都搞到好大碟﹗:p

下午o既時間又叫做「at sea」啦,我哋決定參加下船上o既興趣班﹗我同家姐去咗玩towel art~地點係中庭,老師係台上示範,我哋係台下跟住做,都有少少難跟o架,我冇乜藝術天份吧?好在,結果都整咗好幾種動物,我記得有馬騮、大笨象、狗狗…仲有冇呢?

我同家姐挽住o既就係馬騮了﹗

玩完towel art再去游水,今次只游咗室內泳池咋,然後有係甲板曬曬太陽,天氣暖暖的曬下都幾舒服~

菊姨請我哋tea一tea~我叫咗呢杯mocktail,香蕉味,充滿熱帶風情,yummy~食物呢,就麻煩晒姐夫了,因為我哋個個都「衣衫不整」,唔可以入去餐廳,我哋靠晒佢運啲曲奇呀、糕餅呀、雞翼呀出嚟俾我哋食﹗

海~海~海~差唔多返香港lu,感受多一陣呢個無邊無際o既海先~

甲板、室外泳池﹗如果天氣更熱,就可以享用多幾次了~

船上最後一個晚餐,亦比較隆重~

因為waiter們要同大家告別呢~

佢哋揮下餐巾,浩浩蕩蕩咁出嚟﹗媽咪又揮揮手作回應呢~所有waiter waitress們排列係樓梯上面,為大家演唱歌曲~

我哋同我哋o既waiter印尼人Asep同埋內地姑娘晶晶影相~

大合照﹗

照慣例,食完dinner之後,去The Entertainment睇show,我覺得今晚o既演出,係咁多晚之中最精彩的﹗有木偶戲同埋魔術師表演呢,又精彩又爆笑~

完場有兩位娛樂大家o既阿頭Bobby同埋Fang出嚟同大家道別~

我同南韓籍o既職員影相﹗佢就係攀石教練啦,又係乒乓波比賽o既主持人,同我哋都有多次encounter呢~

捉得住Bobby同Fang影張相~

之後o既時間,我哋享受一下海風,坐坐,吱喳下,飲下茶~

聽日就返到香港lu,呢個郵輪旅程就嚟到呢度啦~

待續

前往其他遊輪旅遊blog

Comments

comments

在《24-2-2010:海洋神話號day 5.再訪海南島三亞.郵輪say goodbye》中有 2 則留言

  1. 有些人覺得坐郵輪,被困在船上幾天好悶,看,我們的郵輪之旅活動多麼豐富!一天之內,玩的、吃的都講也講不完,還有很多沒試過呢。至少電影院精彩的電影只看了二十分鐘,要返香港買碟來看完它!
    [版主回覆08/17/2010 17:32:00]replied

  2. Re媽: 係囉,只要好好安排,郵輪假期嘛,要悠閒有悠閒,要精彩有精彩﹗仲有好多未玩過添呀~

發表迴響

你的電子郵件位址並不會被公開。 必要欄位標記為 *