22-2-2010:海洋神話號day 3.下龍市內越南生活

落咗遊覽船之後仲有好多時間先要返去海洋神話號,我哋都要好好安排一下下晝o既行程呀,好在遊覽船o既導遊俾咗少少idea我哋~佢提議我哋過去大橋o既另一邊,嗰邊係下龍市比較熱鬧o既區,有啲market呀咁,可以逛逛~

偏偏又俾我哋遇到一架大的士,可以坐晒我哋八個人喎,咁就一口氣過去對岸咯~

市內氣氛都比較寧靜,人同車都唔太多,建築物都比較矮,市容有少少似樟木頭o既感覺,不過樓宇就比較色彩繽紛,而且好瘦好長呢~之前爹媽去過胡志明市呢啲大城市,感覺真係完全唔一樣﹗而家嘛…就連…搵間餐廳食lunch都有少少難添~

好不容易搵到一間食「pho」(牛肉河粉)o既鋪頭~

呢碗pho真係得來不易呀﹗因為冇中英文餐牌啦,又冇圖畫啦,又唔知間餐廳有咩食啦,我哋要order真係極度困難﹗我哋指住隔離枱o既顧客o既食物,再加埋動作呀,先成功order到,佢又有牛肉、雞肉兩款,我哋好似玩大電視咁呀~(其實個樣好傻瓜…:p)

經過一番掙扎,食到美味o既pho,爹爹同餐廳老闆影張合照先~

之後我哋都係隨便係街上逛逛~

賣法國麵包o既流動小販~

市場又有忙於作業o既女子剝蠔殼,因為臨海吧,好多活跳跳o既海鮮呢~

我哋一心要搵導遊介紹我哋食o既墨魚餅﹗

搵到lu~炸得香噴噴o既墨魚餅~

點算呀,全部都係越南文,唔知點order,究竟一個unit o既墨魚餅係咩?一公斤?一磅?一打?一個?好在我哋遇到一個會中文o既太太,佢哋幫我哋做翻譯,出路遇貴人呀,令我哋成功試到呢啲美味o既墨魚餅﹗咬落去啲充滿墨魚鮮味o既汁湧晒出嚟呀,超正﹗

要體驗越南,當然唔少得越南咖啡啦~

我哋揀咗一間路邊小攤o既咖啡店~

一人一份咖啡~要等啲咖啡慢慢一滴一滴滴落嚟呢~

加埋煉奶就可以飲咯~風情就好夠喇,不過味道我就一般般合我口味啦,因為太濃了,簡直好似汁一樣,太苦了~我都係鍾意港式or西式o既咖啡多啲﹗

仲有時間,我哋繼續逛逛先~

呢個就係下龍market,入面主要賣乾貨,貨品吸引力就麻麻地喇,感覺就好懷舊囉~

例如有呢啲錄音帶賣﹗

我哋見差不多時間就搭車返過埋碼頭嗰邊lu,要返去海洋神話號繼續上路咯~

見到嘛?海洋神話號﹗

我哋搭番接駁船返去遊輪﹗今次坐甲板~而家天氣好,可以望下風景~

好鍾意呢張﹗向世界出發﹗多謝姐夫挑選咗用嚟做facebook o既profile pic﹗

返到船上當然去Romeo and Juliet餐廳享用豐富o既晚餐啦~雖然已過充實o既一日,但活動仲未結束喎~

我哋打咗mini golf啦~

我贏咗呀﹗你睇,我+1呀~呵呵~

夜晚有媽媽好期待o既50’s 60’s party,演出好多經典o既跳舞金曲,佢哋都有出去舞池跳舞呀,可惜我冇partner呢~

不過活動都唔係淨係啱couple,因為之後o既遊戲時間仲精彩﹗有娛樂總監bobby同小方出場,點會冇熾熱o既氣氛呢~佢哋搞咗扭腰舞比賽,又有呼拉圈比賽,唔駛落場參加玩呀,睇o既都好興奮,我哋都熱烈為香港o既代表打氣呢,估唔到前面有一夥鬼佬都係「香港人」,佢哋都為香港打氣﹗

party後我都同家姐姐夫去試下遊輪頂樓o既pub,飲品都唔貴,我哋揀咗靚靚的cocktail,坐下吱喳下又跳下舞囉~

待續

前往其他遊輪旅遊blog

Comments

comments

在《22-2-2010:海洋神話號day 3.下龍市內越南生活》中有 2 則留言

  1. 到越南自由行,人生路不熟,剛抵步就要搵食,的確幾麻煩。到中山那次,在鬧市找吃的地方也不容易。香港四圍都係食肆,外遊人士來到就方便得多了。
    [版主回覆08/06/2010 20:30:00]replied

Rita 發表迴響 取消回覆

你的電子郵件位址並不會被公開。 必要欄位標記為 *