20-2-2010:海洋神話號day 1.上船囉~

雖然事隔呢個trip已有成兩個月,但都打番blog blog啦,之前去咁多個trip都有打喎,留番個記念都好o既~不過事隔咁耐,可能有好多detail唔記得﹗:p下一個trip又嚟緊,所以都要清番啲「功課」﹗

今次o既「遊船河」行程總共六日五夜,坐o既係Royal Caribbean公司o既「Legend of the Seas」由香港出發,停越南o既下龍灣、峴港,同埋海南島o既三亞總共三個港口,可以上岸玩,而其餘o既時間就可以留係船上面享受各式各樣o既美食、設施,就好似一個巨型o既會所咁﹗

第一日我哋一早就去到尖沙咀o既海港城,要上船咯~

去到天星碼頭呢邊,見到我哋將要搭o既船,未出發,先興奮﹗size比起上次爹媽坐o既「Serenade of the Seas」,海洋神話號細少少,但比起一般香港人所熟悉o既雙魚星號嗰啲大得多咯~

我哋交咗行李俾工作人員之後就開始登船手續喇,呢個排隊等得耐咗少少,有待改進,打蛇餅等咗好耐,好在我哋吱吱喳喳,傾計o既話時間過得快少少~因為船公司辦登船手續辦得慢,成為rate limiting factor,所以之後過入境處就幾乎唔駛等了~

上船前影張紀念照先,係船上時不時都會有專人同你影相,你o既相會展示係gallery度,歡迎選購,因為爹媽姐恒比起我同大姨早上船,我遙距地幫佢哋影咗張登船紀念照呢﹗用大sony zoom過去影都影得好清楚﹗

上船之後大家都肚子餓lu,所以即刻去windjammer cafe食嘢先,windjammer呢度一日任何時間都有嘢食o架~不過之後節目太豐富,都冇乜機會再係度食lunch lu,早餐就有係呢度食~

介紹下我哋o既間房先,船上面有好多唔同品種o既房,我哋呢種係海景房,比我哋勁o既有露台房呀甚麼的,比我哋經濟o既有內艙房,以經常都係外面玩嚟講,呢種普通海景房都好足夠咯﹗又有獨立洗手間浴室,仲有張小沙發,都算好寛敞舒適喇﹗

辦登船手續時領取屬於自己o既sea pass card,sea pass就好似船上o既身份證,既係你o既房咭,上岸上船又係你o既passport,亦同你o既信用咭有連繫,船上消費都靠佢~而上面亦寫咗晚上用餐o既枱號~咦,點解我哋一行12人(8+4)食晚餐要分開幾張枱坐o既?﹗莫非全部都係細枱?﹗我哋去「Romeo and Juliet」餐廳了解情況,唔係喎,好多大枱喎,點解咁o架?﹗用船o既staff了解情形,佢哋都答應唔到我哋點樣處理,淨係叫我哋晚餐時間去到餐廳,話到時幫我哋解決喎,會唔會太遲o架?﹗搞一輪都得個桔,都有少少擔心~因為未來五日都同啲三唔識七o既人一齊食晚餐,咁咪好可惜囉~難得一家人出嚟旅行…

商討不果,唯有乖乖等晚餐時間啦…

係船上周圍參觀下,上咗甲板,維港景色真係靚~可惜天色唔夠好呢,如果配埋藍天白雲就影得更靚了~

甲板上面有呢種game,當時都唔知點玩呢,後來跟住貼係旁邊o既說明書,跟住嚟試下玩下,睇人哋都係上咗年紀人士玩,原來都唔易o架,要大大力用支桿推個「餅」出去都要ok大力先得~

去到Romeo and Juliet餐廳,我哋嗰區個chief waiter Leslie果然有power,同佢講一講我哋o既難處,三兩下就搞掂好了,分咗一張八人枱一張四人枱俾我哋,我同婆爸媽大姨菊姨家姐恒一張枱,另外蘇太佢哋一行四人就坐另外一張~

每次晚餐都有唔同o既餐牌,可以自己揀你所喜愛o既前菜、主菜、甜品,而且基本上係自助餐,因為所有菜式你都可以無限點﹗咁當然,我哋都係仔細咁試最啱心水o既一兩款o既啫,唔好浪費丫嘛~

每晚serve我哋o既waiter,有嚟自印尼o既Asep同埋中國o既晶晶,之後就有佢哋o既相可以睇啦~

前菜我揀咗三文魚醬配蒜蓉包~

主菜就揀咗呢款意大利雲吞,甜品我要咗果子露~餐飲可以揀咖啡或茶,而揀茶的話佢會有一大盒各式各樣o既茶包,有一般o既紅茶,有時我會揀洋甘菊茶,亦有中國茶好似綠茶呀、普洱呀任君選擇﹗

晚餐有「頭場」同「尾場」,我哋食o既係六點o既頭場,每晚係「The Entertainment」劇場都有唔同o既節目上演,所以我哋睇o既節目就係「尾場」,食飽飽到節目開始前都有少少時間,我哋按住每日o既船上時間表搵節目~

B9Gmbrja5BEKQZw8bnymIg

 

第一日我哋去咗「Anchor Aweigh Lounge」參加中國女生婷婷教o既排排舞,都出一身汗o架~

之後欣賞咗嚟自阿根廷o既牛仔表演,即是一女兩男o既舞蹈+雜技表演,佢哋打鼓跳舞啦,又有皮鞭o既演出,都睇到人心驚肉跳o架~

爹媽佢哋都去休息了,我同家姐恒仔玩多陣先瞓~

kILGeemkMQz30n.tpo_fQg

mini golf都算係我哋享用得最多o既其中一項設施﹗玩o既時候都幾搞鬼,因為有時會打咗去石頭邊,要用好liu lung o既姿勢先可以打番出嚟~

vkV.HQ0332q1PZOdhbLJmw

我哋再去船尾坐咗陣,吹吹海風先休息~

podecApk4qOcyrQpXUAEww

呢個就係日頭嗰個遊戲,似唔似「全城清潔運動」?﹗

待續

前往其他遊輪旅遊blog

Comments

comments

在《20-2-2010:海洋神話號day 1.上船囉~》中有 6 則留言

  1. 可以重温一次海洋神話號的旅程,真好!
    [版主回覆06/02/2010 16:53:00]replied

  2. Re生老病死:
    我都好想寫埋佢呢,因為下一個trip已經去完,再下一個trip又嚟緊啦﹗

  3. 有些人嫌坐郵輪悶,整天困在船上。不過,要輕輕鬆鬆的渡假和適度的遊覽,郵輪卻是上佳的選擇。有吃有喝,質素頗高;有動有靜,任君選擇;有斯文有刺激,隨你喜歡。上岸觀光,豐儉由人,去與不去皆可。選擇多得很,要真正享受遊旅之樂,要全程「放鬆」心情,在郵輪度假真的不錯,而且這趟旅程價錢不貴呢!
    [版主回覆06/10/2010 16:58:00]replied

  4. Re爹爹:
    只要唔諗住「目標要睇幾多幾多嘢要行幾多幾多嘢」,遊輪假期其實幾ok,試問有幾多香港人可以真正停落哋放假丫,明明放工,但偏偏返到屋企仲要對住部電腦打打打,困係船上嘛,你可以切切實實咁放下假﹗我都覺得我哋未夠hea呀~

發表迴響

你的電子郵件位址並不會被公開。 必要欄位標記為 *