23-4-2009:醫生漫畫巡禮

識我o既朋友都知,o黎過我屋企o既朋友更加知,其實我係好鍾意睇漫畫o既﹗不嬲漫畫嘛,家姐買乜我咪睇乜o羅,呵呵,所以屋企有大量o既美食漫畫同埋偵探漫畫,當然都有舊陣時媽媽買俾我o地睇o既叮噹,我小學時代喜愛o既美少女戰士,仲有林林總總其他o架啦~

不過其實近年我真係越來越鍾意睇醫生漫畫﹗本行嘛~好有共鳴﹗唔講大家唔知,其實好多醫生漫畫我都覺得佢畫得ok專業o架~D內容都真真地(當然有D係比較誇張啦),以下係一D我睇過o既醫生漫畫﹗

[1] 怪醫秦博士

經典醫生漫畫首屈一指﹗我諗好多人都有接觸過啦,屋企o既所有「怪醫秦博士」都係day借俾我+寄存我家的(其實係我唔還俾佢,哈哈﹗)~手塚治虫自己本身都係一個醫生o黎o架~怪醫秦博士比較神怪、離奇誇張啦,佩佩係由畸胎瘤變出o黎…真係冇可能~呢本好有怪俠精神﹗劫富濟貧﹗

[2] 孤島診療所

「孤島診療所」係我自己發掘出o黎睇o既醫生漫畫,講本身係大學醫院唔如意o既五島健助,去o左孤島(係沖繩o既其中一個小島o黎o架﹗)擔任島上唯一o既醫生,雖然島上資源不足,但佢醫術精湛﹗本身村民對佢好抗拒,但最終都建立深厚、互信o既關係﹗

係日本都有拍成電視劇o架~我o地一家人都有買碟o黎睇﹗

主角Dr.孤島(其實係五島醫生﹗)~劇集入面選角真係同漫畫勁似﹗除o左兩個主角之外…特別係內婆婆同埋和田先生﹗

[3] 天生妙手

「天生妙手」都算係我最愛o既醫生漫畫了﹗真東輝係一個好熱血、好上進o既外科醫生,平時傻乎乎,但對於每一條生命都絕對唔放棄﹗係佢手上o既病人全部都唔會死o架~佢爸爸係天才名醫﹗佢亦向住爸爸o既身影逐步邁進~佢唔係天才o個type,但係好努力好努力o羅~而且同醫院入面每一個人都關係好好~因為佢o既熱情個性嘛~

當然都唔少得同護士綾乃o既愛情故事啦~

[4] Wild Life

呢排先至開始睇o既「wild life」,今次唔係醫人了,鐵生係一個獸醫,原本讀高中時一無事處,但唯獨有絕對音感o既天賦才能,可以唔同聽診器就聽到動物o既呼吸、心跳,從而作出正確o既診斷,雖然熱血,但知識係零,亦因為知識o既貧乏,可以排除舊有觀念,大膽推敲、大膽開創新穎o既治療方法﹗佢亦有感染他人o既力量,令失去熱情o既醫生重拾鬥志﹗

睇到第十一集咋,因為今日借唔到書,所以開始o左睇以下o既兩套漫畫﹗

[5] 最佳命醫

頭先食晚飯前先第一次睇﹗哈,最初係報紙檔見到時,已經同day講,不如我儲呢套咯,佢叫我去漫畫鋪睇過先講,今日終於借o左頭兩期番o黎,good呀﹗

主角西條命又係充滿熱血o既天才外科醫生,致力改變日本o既小兒外科﹗似乎作為漫畫題材o黎講,冇熱血,冇天才都講唔到個故事落去呢~暫時睇落都好好睇﹗不過因為而家仍然出緊,所以冇得睇住lu~要等到頸都長﹗

[6] 無敵怪醫

因為「最上命醫」只有兩期,所以就借多一套了,呢套睇落D公仔似格鬥漫畫,D肌肉男呀、恐怖o既眼神呀咁…day話覺得我應該冇咁鍾意睇喎…唔緊要啦,拭目以待~

Comments

comments

在《23-4-2009:醫生漫畫巡禮》中有 8 則留言

  1. 相信妳看過這麼多熱血醫生的漫畫故事後,行醫時也能充滿熱血,珍惜每一條生命吧。
    [版主回覆04/26/2009 20:13:00]replied

  2. 看過多熱血醫生的漫畫故事後, 仍很怕CALL!  加油啦~
    [版主回覆04/26/2009 20:16:00]replied

  3. Re媽:
    唔唔﹗有時睇o左漫畫入面o既情節,對於日常面對o既東東都會有反省o架~

  4. Re家姐:
    你就係特別喜歡「孤島診療所」﹗其實其他都好好睇o架~你都睇下啦~day都鍾意睇「天生妙手」,即是唔係醫生o既人都o岩睇o架﹗

  5. Re day:
    hee,我都話咯,最驚驚就係就快要call又未開始call o個陣嘛,好似去主題公園排隊玩機動遊戲咁,最興奮緊張就係就快排到隊o個陣…其實call起上o黎時又唔諗咁多o野lu~我都ok o架﹗係一個負責任o既熱血候士文﹗

  6. 《最佳命醫》首兩冊我也看了,情節頗吸引,主要還是理想與現實的矛盾。裡面有不少外科手術技巧的解說,三兩幅畫面就解說得清清楚楚,日本漫畫很有專業精神,於此可見一斑。
    [版主回覆04/28/2009 10:17:00]replied

  7. Re爹爹:
    係呀,好多漫畫製作、資料蒐集都好認真,好專業﹗好多人睇唔起所謂o既「公仔書」,其實唔係o架,係漫畫入面,有D故事好勵志,我又係漫畫入面學到好多日本傳統文化,幾好o架~
    期待「最佳命醫」之後o既劇情發展﹗

Catherine 發表迴響 取消回覆

你的電子郵件位址並不會被公開。 必要欄位標記為 *