之前o個晚番到房都超級累啦﹗沖完涼冇幾耐就倒下了~

我o地o既酒店位於知本，知本係出名o既浸溫泉勝地﹗其實o岩o岩check-in時都覺得怪怪地啦，一開水喉洗手就一陣臭蛋味，原來洗手間o既自來水都係溫泉水﹗難怪啦~沖涼時個身都滑滑的，都唔知沖幾耐D沐浴露先沖走晒，沖o黎沖去都滑o既？﹗

由我同大姨間房o既窗戶望出去就係呢D山lu~其實仲望到溫泉池，不過生得太矮小，影唔到添~

本身諗住兵分兩路，我、媽同大姨都好想浸溫泉，所以我o地會先浸，有時間剩低先出去逛，而爸同陳叔叔夫婦就想去行行山﹗姐同恒就想瞓晏少少先再算~我o地食完早餐之後，諗住去溫泉池o個度查探下要帶D咩、有咩設施之類，點知，哇呀~~~~晴天霹靂﹗原來溫泉池朝早係唔開放o架﹗嗚呀~~~~~~~~~~~~~~~~

冇辦法啦…喊都冇用…

唯有我o地都出去逛逛啦~反正約好大川叔叔佢o地中午左右先o黎接我o地~酒店門口就有指示牌話有個林道瀑布，不如就去o個度行下、影下相啦﹗

哇，靚得不得了o既簕杜鵑﹗究竟係人比花嬌定花比人嬌呢？呵呵~

仲有好多唔同o既顏色﹗

沿路上見到呢D好似荒廢o左o既地方…民宿乎？﹗覺得似曾相識？好似係周國賢個blog度見過？有一次話去台灣拍MV，有D古古怪怪，圓形o既建築物…o岩o岩click番過去求證過了，原來唔係呢度…

我o地一直都唔知自己行得o岩唔o岩o架，沿住條路一直向山上行，雖然搵唔到瀑布，但上到咁高，景色都唔錯丫，可以望到卑南溪，同埋台東一帶o既地方，最遠遠o個邊仲係太平洋o黎o既添~不過呢條路嘛，對於媽咪同大姨o黎講挑戰就大D咯，因為…有好多向我o地吠o既狗狗﹗佢o地兩個都好怕怕~不過經過大家o既重新演繹之後，我o地想像佢o地係向我o地指示點樣行﹗哈哈，好搞笑~

大家估下野狗惡D定係家狗惡D？陳阿姨後來同我o地講，原來家狗係惡過野狗o架~因為野狗係被遺棄o既狗，唔多唔少，心裡面都有種自卑感，但家狗嘛，背後有主人撐腰，所以特別惡﹗哈，唔講都唔知喎~有趣有趣﹗

行o左咁耐，一直都見唔到瀑布o既蹤影…連人影、車影都冇﹗我o地有冇行錯路？﹗後來終於遇到一架車，司機同我o地講，應該係「知本林道」o個個路口行入去﹗吓？﹗咁咪即係好早之前已經miss o左o既路口？﹗

行到入去，仲要有好多好多分支路，每一次都要勇敢地挑選一下行邊條路…終於，我o地聽到流水潺潺o既聲音…

oops﹗原來流水o既聲音o既來源係呢度﹗

又遇到另外一個途人，佢話瀑布係呢D天時乾旱了，我o地最終都係無緣見到林道瀑布，算數啦，緣份呢D o野真係好難講…

我o地話沿路好多分叉路就係咁o既意思喇，真係唔知點揀…

我o地結果見唔到瀑布，唯有折返番去酒店啦~呢個早上，總算有一個精彩又舒服、relaxing o既morning walk﹗

我o地入住o既亞灣溫泉飯店~

雖然冇得落去大浴池浸溫泉，但房間o既水都係溫泉水o黎o既，我o地結果係房度浸，雖然時間唔長，但都叫做過下癮啦﹗浸完溫泉真係成個人鬆晒呀﹗

陳阿姨佢o地係附近散步時，買o左D台東名產，一種叫做「釋迦」o既水果請我o地食﹗哇，好蜜味好蜜味呀~喜歡得不得了﹗謝~

點解叫釋迦？我o地估咋，可能因為佢o既外型好似佛祖o既髮型？

會合大川叔叔，佢車番我o地出去台東市區，帶我o地去食一間一流o既餐廳做lunch，之後爹爹同埋陳叔叔夫婦就差不多時間要搭火車番高雄lu~

叫做「卑南豬血湯」，係專門食豬紅湯同埋其他豬肉臟菜色o架~門口已經大排長龍﹗結果大川叔叔同爸先落車去排隊，我o地就去o左呢晚入住o既民宿放低行李先~

豬內臟就唔係好o岩我喇，不過聽番家姐佢o地講，的確好有水準﹗豬大腸o個D一D都唔臭喎~

出名o既豬紅湯~

我好鍾意呢個木魚片涼拌韮菜呀，好好味~

食完o野之後仲有少少時間，反正我o地o既民宿又同台東火車站好近，所以大家就去民宿o個度坐坐，順道參觀參觀，先再去搭火車o羅~

「火車頭民宿」o既大廳﹗媽咪最自豪咁講，成間民宿得我o地一組客人，簡直就好似我o地住晒成間屋﹗係個客廳度都好free~我o地係度分享水果﹗有陳太太一早預備好o既蘋果、梨，又有大嫂買o既新鮮棗子~

我從來都冇想像過可以食到新鮮o既棗，原來都幾清甜、爽口﹗平時遇到o既棗都係乾o既紅棗、蜜棗之嘛~我諗起裘千尺，哇，如果佢每發射一粒棗核釘都要食一個棗，咁咪好飽？﹗都幾大個喎~

其實係卑南豬血湯旁邊有另一間超長龍鋪頭，賣中國包o架~超級熱情o既嫂嫂去o左排隊，買o左一大堆俾我o地食呀﹗

雖然D包包好美味，有筍豬肉包同埋黑糖提子包，但係大家正苦惱，有咁多包包點算呢？﹗

爹爹同埋陳叔叔夫婦先番去高雄啦，餘下o既行程就剩低我o地lu~(其實我都係留多一日，媽大姨姐恒就留多三日~)

待續

前往其他台灣旅遊blog

Comments

comments