14-6-2008:盛裝上陣.m08 graduation dinner

畢業囉﹗畢業囉﹗畢業囉﹗畢業囉﹗畢業囉﹗

雖然期待著上畢業袍,但更加期待著上掛著「醫生」稱號o既名牌﹗(我o地不嬲掛起o既名牌都好似幼稚園生o個D嘛,得中英文名係上面﹗)而畢業晚宴(graduation dinner)亦係記載畢業呢件盛事o既一個重要部份﹗

二零零八年六月十四號—-就係呢個日子喇﹗

變成大人,梗係要用心打扮啦,我o既裙裙係爹媽之前去新加坡旅行買俾我o既手信,而頸鍊同埋高踭鞋都係家姐結婚時著o既,所以真正要準備o既主要都係頭髮同埋化妝~

反正都係時候剪頭髮,下晝就出去髮型屋剪髮+吹頭啦,唔該晒呀,後生仔髮型師﹗番屋企都要拿拿聲化妝換衫lu~好喜歡新買o既estee lauder粉底,又貼面、顏色又自然,我呢D深色皮膚o既人買粉底係難D o架啦~化妝品專櫃果然服務都專業D﹗

今次graduation dinner o既地點,係位於灣仔o既萬麗海景酒店(renaissance harbour view hotel),係lobby就見到我o地個function o既指示啦~

點都要係呢個「充滿紀念價值」o既backdrop度影張相啦~

女生們﹗

我o既specialty clerkship組mates~

當然唔少得同老師們影下相啦﹗相中係我好喜歡o既婦產科tutor Dr Hon~

dinner以自助餐形式進行,食物味道唔錯,不過款式就少o左D~但都唔重要了,最重要都係吱喳、吱喳、怒影相、怒影相﹗大會俾我o地食o野o既時間都係一個鐘頭咋,之後有緊湊o既programme﹗有同學表演啦、又有遊戲啦(估BB相o既環節,陳文彬好快就估到我了﹗多謝晒~)、仲有好勁o既抽獎環節﹗抽D獎犀利咯,不但人人有份,而且D大獎真係好勁﹗最初抽枱獎時我得到starbucks $100現金券都已經好開心啦,點知後來o個D大獎仲勁呀~又有NDS、又有i pod touch喎﹗

最後大家影相影到十一點幾先走呀~已經好累了~但我o地組一齊去唱K(其實我都有少少估到事情會發展到咁)﹗即是話…玩玩玩到第二朝六點鐘﹗今次唱通宵K我都算唱得多歌了,佢o地有D人唱得唔多o既又玩下啤牌、又玩下骰盅,又有D出o左去打機﹗唱到啞o左…

Comments

comments

在《14-6-2008:盛裝上陣.m08 graduation dinner》中有 13 則留言

  1. 係依度D相先睇真你條靚靚裙呢…
    [版主回覆07/05/2008 00:49:00]replied

  2. 靚!~ RE 完!!!~ 哈哈 看番D 相都不見有很多老師出現呢~
    [版主回覆07/05/2008 00:51:00]replied

  3. 你個 look 好得呀  睇得出你好花心思去打扮. 不過點解好似咁少人咁既?? 其實有幾多人參加既呢?? 好羨慕你有一個咁難忘既大學graduation dinner呀, 我大學同 master 畢業都冇, 可能英國唔興掛. 考完試所有同學就各散東西 lu………. 真係可惜!!
    你既畢業典禮幾時舉行架?? 我既畢業典禮起今年11月舉行呀, 足足遲左成年先舉行呢
    [版主回覆07/05/2008 00:52:00]replied

  4. 年年都參加中五、中七學生的畢業聚餐,看見同學盛裝出席,大家都很雀躍,這種興奮之情使人感到學生長大了,成熟了,滿懷自信可以出去闖天下了。重看大學畢業時聚餐與老師和同學的合照,也依稀可以回想當年的盛況。在晚宴上,每個同學都是主角,這幾年每人都有一個值得回味的故事,心情很複雜,真是另有一番滋味在心頭。
    [版主回覆07/05/2008 00:55:00]replied

  5. 我今年F7 GRAD DIN又係食完去唱K=.=" 累到傻=.=~ ANYWAY 恭喜哂
    [版主回覆07/05/2008 00:56:00]replied

  6. Re day:
    都唔知係咪真心講o既~講真﹗係咪為o左要re先re?﹗定係真係靚先?﹗(<–其實都冇得選擇答案,呵呵~)
    雖然有好多老師有出席,但都冇機會捉住佢o地每一個影相呢,我連黎龍都冇影呀~同埋呢,一個唔留神佢o地就走o左啦~

  7. Re uHnsUi:
    thanks thanks~我條裙係爸媽去旅行時買俾我o架~而化妝品就真係有部份係特登買,因為平時好少化妝嘛~
    其實好多人o架,我幾乎o地全班一百四十幾人都有出席,坐o左十幾廿圍,每圍都有十二人,每圍十個同學、兩個老師o羅~
    我o地情況其實比較似中學,所以先易D搞呢D「咁有規模」o既grad din o羅~百幾個同學一齊讀書五年喎~感情點都深D喇~
    我o既畢業禮都係年底舉行呀~o個一日就會全香港少咁一半實習醫生﹗得番CU同學仔做o野﹗

  8. Re爹爹:
    大家打扮到靚靚的參加grad din,感覺上真係有少少「變成大人」呢~(事實上晨早已經18歲~)
    呀,你提一提起,我真係應該e-mail番D相俾教授們喎~

  9. Re2323:
    雖然累到傻,但都應該開心到傻丫,係咪?我o地o個日就係諗,咁o既機會以後都冇,所以去盡佢﹗冇錯,以後時時都有機會通頂,但就唔係咁樣一回事了,而係…工作工作工作更多工作(<–最尾呢句係唱的﹗知唔知係咩歌?)﹗

發表迴響

你的電子郵件位址並不會被公開。 必要欄位標記為 *