21-5-2008:落雨濕濕遊德里

最後一日係delhi lu~我o地今日遊舊德里,去jama masjid(清真寺)、red fort(紅堡)同埋raj ghat(甘地紀念碑)~

出門口時落好大雨呀~一人一把遮都濕﹗係印度落雨就會好污糟好污糟﹗因為地下會變成一遍泥濘,佢o地又冇去水渠喎,地面又凹凸不平,地下一個個水?,好難行~如果想像得遠D就會覺得好核突﹗成個城市都好多動物家嘛,牛、馬、雀,佢o地排放出o黎o既xx,加上雨水、混和,你踩上去,發生咩事呢?oh no no~所以一個城市o既基礎建設真係好重要﹗另外嘛,一落雨天氣就超涼了,平時太陽最曬時有四十度左右,一落雨得番二十度鬆D,行出街即刻起雞皮呀,之後去jama masjid要除鞋,踩埋D凍凍o既水?就打晒冷震了~

我o地再次搭metro(地鐵),今次搭兩個站去chandni chowk~umum,我覺得都好浪費咁好o既公共交通系統o架,車廂咁大咁靚,但配套唔夠o羅~居然係人手賣單程飛﹗咁咪好慢?雖然都有智能卡車飛,但呢度D人o既教育水平參差,而且,唔係人人俾得起smart card o既deposit…另外,而家保安嚴密嘛,我o地等搜身、搜行李排隊排o左好耐,好在有的是時間﹗唔,一入車廂就非常舒服了~

落車之後都要行一段路先到jama masjid呀~一早就知道入去要除鞋,相機要收費,但o黎到印度仲會日日都不斷發生令人激氣o既事o羅~佢話喎,「擁有」部相機就要收錢,而且相機費已由Rs150提高到Rs200,唔買相機門票俾人搜到要罰Rs500,??﹗有冇搞錯?﹗我o地本身諗住買一張票,只用一部相機o黎影相,但連「擁有」都唔得?咁麻煩o既?究竟呢間係寺廟丫,定係商店呢?死都唔肯俾佢賺呢D錢,原本諗住買一張o既而家都唔買了,我o地輪流入去參觀﹗除鞋又要指定係邊個位除,又要搬我o地D鞋喎,太可惡了﹗好在入面都唔係太多想影相o既地方o者~唔,入面最特別o既,應該係有好多好多好多白鴿了﹗中庭有一個黃色框框,入面充滿住雀粟﹗幾百隻白鴿呀﹗好壯觀(+少少恐怖﹗)~

清真寺外觀

清真寺o既塔

下一站去睇red fort~

red fort外面有個公園,個名叫做…吓?「八月十五公園」?中國人就笑死了~原來,因為印度係呢一日由英國人手中獨立過來o架~

red fort外觀

好擠逼呀,咁多把遮﹗

其實之前行o左好多個fort,對於呢個又冇咩特別o既期望,今次我o地請o左個導遊,都好informative呀,不過佢o既pace快o左D o羅,冇得俾我o地慢慢行、慢慢影相,咁又係o既,佢完成o左一group先可以開始另一group,咁先可以搵多D錢家嘛~不過同學們有D覺得佢D口音難聽D o羅,我自己就覺得ok~哈,我o地對住mughal’s o既歷史、印度皇宮城堡o既設計越來越熟悉了~

因為落雨,好多地方都水浸呀~

去o左好多個fort,見到有D咁o既樣o既建築物,一定係皇帝接見重要貴賓o既「私人大廳」喇﹗

red fort其實都好靚呀,不過俾英國人攻佔時被破壞o左好多,需要D時間修復o羅~我係red fort買到了一個東東俾day,heehee,希望佢鍾意啦~

行完都一點幾鐘,要食飯先lu~方圓一公里好似冇乜餐廳…除o左有間麥當奴﹗好肚餓呀,食o左兩個包包,除o左香港都有o既麥香雞之外,我仲食o左印度先有o既McAloo Tikki,即是炸薯餅包,我覺得香港都應該增設呢個包呀,有市場﹗我o地五個人都叫o左呢個包呢~

去埋最後一個行程就完成啦,由麥當勞去raj ghat都唔太近,我o地決定搭車,平時o既auto rickshaw?不如,近近地,試下人力車啦~其實價錢都應該差唔多,不過o黎到印度咁耐都未試過,點都值得o既~我o地三個女孩子一架車﹗人力車o既結構其實係一部三輪單車,後面有兩個位,第三個人坐邊?面向車尾,有一條橫木可以坐,我就係坐呢個位喇﹗哇,好恐怖呀﹗架車好似好單薄咁~尤其行過D唔平o既地時就更加驚~加上又同D大車、auto行埋同一條馬路喎~其實個司機都好辛苦o架,一個人載三個人喎,好在冇上斜~唔,都不失為一個特別o既經歷o既,但下次唔坐了﹗

我坐人力車就係咁驚險啦~

原來raj ghat位於一個大大o既公園裡面,入面鳥語花香,有大大大草地,又有好多小動物(可愛唔可愛o既都有~),係入面行都好舒服~

點解印度o既國鳥係孔雀而唔係烏鴉呢?哈﹗周圍都係烏鴉,而且佢o地都幾可愛丫(都)~

甘地紀念碑

只係凍o左少少o羅,真係想像唔到,去到印度居然會係冇冷氣o既地方覺得想著外套﹗去到甘地紀念碑要除鞋,哈,有兩邊俾人放鞋,一邊收錢,一邊唔收錢,平時我o地咪好討厭D「幫人看管鞋」o既人o既~但人係奇怪o既動物,有得俾我o地選擇時,我o地居然揀o左要俾錢o個邊,可能因為唔收錢o個邊寫住「at your own risk」,我o地俾佢嚇到啦~哈,咁樣俾錢法又唔會好似平時咁嬲喎~古怪﹗古怪﹗

放鞋o既地方

趕番去酒店,拎行李就去火車站啦~地面濕濕,行李又重,都幾辛苦~好在「訓練有素」,之前咁多站都係咁搬啦~今晚火車終於有得舒服D了,第一次坐有冷氣o既?覺車廂,我同connie、kelvin一組,坐AC 3-tiers,即是三層床,但有冷氣,擠逼度同平時差唔多啦,但因為車廂唔入塵,所以好乾淨~放行李時同其他乘客有少少火花o羅~好在最後都搞得掂o既~

開車先令人高興﹗勁勁車果然唔同D﹗平時坐過夜o個D車,五個人總共Rs1300-1500,今次,一個人坐AC 3-tiers已經要Rs1200,stanley同angela坐AC 2-tiers更加要每人Rs1600添﹗真誇張﹗原來今次又係有「火車餐」o架~開車冇耐就派發下午茶,有三文治、samosa(立體咖喱角)、一小件餅、果汁同埋奶茶,仲有兩粒糖添~好高興啊﹗唔知其他乘客見我o地係度熱烈地影相會點諗呢?呵呵~期待陣間o既晚餐~

待續

前往其他印度旅遊blog

Comments

comments

在《21-5-2008:落雨濕濕遊德里》中有 4 則留言

  1. 聽你咁講…落雨既德里真係好恐怖呢﹗
    可以臨尾總結下印度麥當奴有咩特別包包嗎?
    人力車坐咁多人駛唔駛加錢?
    [版主回覆06/02/2008 11:54:00]replied

  2. 擁有相機都唔得?? 虧d印度人咁都諗得出, 仲狼死過大陸人, 返到大陸影張相都要收錢我都覺得有d過份, 但都唔夠印度人咁勁, 佢地真係禁住黎搶喎
    [版主回覆06/02/2008 11:55:00]replied

  3. Re家姐:
    恐怖又未至於o既,不過好麻煩o羅~好在我o地拖住舊行李去火車站時冇落雨咋~lucky﹗
    好呀~遲D一次過介紹~可惜我冇影低相呢~等我上去印度麥當奴個網網睇下有冇相先~
    又唔駛o架喎,兩架車一樣價錢﹗我o地三個女孩子o既重量總和都係比兩個男生o個架重少少之嘛~

  4. Re uHnsUi:
    就係咁先激氣丫嘛﹗所以我o地決定唔俾佢賺﹗其他地方都收相機錢o架,但冇咁狼死o羅~我o地話只用一部,就只收一部o既錢,咁都reasonable D丫~

發表迴響

你的電子郵件位址並不會被公開。 必要欄位標記為 *