o黎到jaipur o既第二日，繼續參觀其他景點~因為唔想下下都食酒店o既早餐嘛，不如出去睇下有咩食啦，反正去到舊城區應該有好多選擇o既~

點知…搵間小餐室都唔太容易，結果又問人又搞一大輪，去o左一間veg餐廳~冇「早餐」呀，我叫o左個alu paratha(薯仔薄餅)o羅，用o黎做早餐都ok可以接受o既~另外叫一杯奶茶﹗餐牌上面除o左有普通o既chai之外，仲有rajasthani chai喎，試下先﹗結果嘛，味道好似差不多o者，但個杯就好似花盆咁，先聲奪人﹗

普通chai同埋rajasthani chai

去參觀啦~行過去city palace其間見到好多牛，我諗好多人都聽過，印度人覺得牛好神聖，所以由得D牛周街行，冇錯，周街都係牛﹗好多牛o既結果就係，路面上面會…o羅~

牛牛們

去到city palace門口見到香港旅行團o既旅遊巴呀~勁興奮﹗o黎印度咁耐，終於有機會見下其他香港人啦﹗可唔可以同佢o地吱喳下呢？(D人一定覺得我o地好古怪，梗係啦，佢o地離開香港幾日之嘛~)

香港旅行團

jaipur o既city palace都幾好睇，museum都好多珍貴o既收藏，加上我o地請o左一個政府認可o既導遊同我o地解釋，雖然未至於udaipur o個次o個個咁令人賓至如歸，但都講解得好清楚，俾o左好多資訊我o地~

jaipur city palace

jaipur city palace，見到後面有兩支旗嘛？上面細o個支如果都豎起的話，即是jaipur國王而家正係jaipur城入面﹗(係呀，而家仲有好多國王o架，不過對於統治就冇權勢o羅~)

跳舞班

我o地係city palace入面見到有D小女孩係度跳舞，原來皇室請o左D專業o既導師，係暑假期間，免費教D小朋友唔同o既課外活動o架，而家見到o既係跳舞班o羅~

peacock gate

好喜歡呢個廣場，有四道大門，分別係四季o既主題，代表雨季(monsoon)o既係rajasthan o既動物孔雀~另外仲有代表春天o既?綠色、代表夏天o既蓮花，同埋代表冬天o既紅玫瑰o羅~

行完city palace，出去食個午飯，繼續下晝o既行程~其實jaipur第二日行程唔多，我o地又唔打算入去天文台咯，所以時間都好鬆動~我o地沿住舊城o既大街行，進發去jaipur
o既地標—-風之宮殿~

風之宮殿

風之宮殿，係咪好宏偉呢？

所謂「風之宮殿」，係因為D窗戶好通風，企係入面時會感受到D風吹埋o黎~

呢D就係風之宮殿o既一格格窗戶喇，以前D妃嬪、公主唔可以見外面D人家嘛，佢o地要觀賞節慶時，只可以係呢D小窗戶度望出去o架咋，真係幾慘呢~而家D女人幸福得多了~

粉紅城市

上到風之宮殿o既頂，可以見到粉紅城市o既一片粉紅呢，以前有個皇后好鍾意呢種粉紅色，於是個國王就下令要髹到成個城市都係粉紅色喇，成為一個特色，佢o地一直keep住補顏色，所以而家仲係一個pink city o羅~rajasthan幾個城市都有主題顏色o架，之前去o既udaipur照理係白色，我就覺得唔太白o羅，但jodhpur o既藍色就真係好藍喇(呢一刻其實我仲未去jodhpur…)﹗

bazaar

離開jaipur o既火車好夜，我o地見有咁多時間，打算去睇場戲，舊城區就有一間戲院了，中間有D時間，不如就逛逛市集，睇下有冇咩好買啦？不過係度睇o野真係好麻煩呢，鋪頭D人太熱烈了，令人難以自由自在咁挑選…結果冇乜人有收獲呢，不過stanley就買到了真正o既pashmina(太多假貨了，死都唔肯減價o既先係真貨﹗)~

我o地睇o左「tashan」呢套戲呀，其實戲院有三套戲上緊畫，其中另一套「jimmy」係巴士見過廣告，angela同埋connie誓死唔肯睇，話劇情太老套喎~我提議睇tashan，因為我之前係mumbai買o左sound track呢，個店員話係而家最hit o既戲喎~

「tashan」算係動作片吧？講下報復、對付壞人之類，個故事冇上次o既「sirf」咁易明呀，不過呢，淨係睇畫面、聽音樂都係好享受o既~兩個男主角、個女主角都樣靚身材正，睇起o黎都賞心悅目，又有好多又唱又跳o既場面，好colourful，視覺上、聽覺上都好豐富，D音樂節拍強烈，令人留下深刻印象~所以故事唔明晒都ok~

睇完都九點鐘lu~我o地截車番酒店，食dinner、拎行李，就要行過去火車站啦~雖然火車12點先開，但太夜就唔好啦~我o地去到火車站都坐好耐呢~後來火車仲要delay成個幾鐘添…好累啊﹗

待續

前往其他印度旅遊blog

Comments

comments