30-3-2008:蛻變中的海洋公園

假期o既第二日,點都要有D真正o既玩樂啦﹗我相約day一齊去海洋公園﹗由屯門一齊出發,沿途吱吱喳喳,轉車去到海洋公園大概十點幾啦~

點都要係大門口影張相o既~(不過…遊人甲o既攝影…似乎佢唔了解我o地想要D咩添…)

一入到去大樹灣o個邊就即刻發現新o野玩﹗原來而家有個「高清動物月」,有一系列o既新鮮活動呀,我o地本身都唔知,所以都算係驚喜呢~

有靚靚o既沙雕展覽~

之後有得同海洋動物近距離接觸﹗不過水好深,所以都冇辦法可以掂到D海星、海參呢~

公園重點推薦項目,鯆魚,亦即是魔鬼魚,我o地都可以摸摸佢o地個頭o架~對於我o黎講唔算係新鮮o既事幹,因為兩年前去美國探康熊貓時,佢帶我去monterey o既aquarium都有得摸摸魔鬼魚~不過一向興致勃勃o既我一樣咁高興﹗

有得免費畫面畫手呀~我本身都排o左入條隊度啦,但太多人了,結果都係放棄o左呢…可惜﹗

有個扭波波show,本身諗住只係扭波波,應該冇得特別,點知吸引到我o地睇完場喎,事關呢兩個鬼佬主持得好生鬼,令人不住的哈哈大笑,所以好好睇o羅~其中經典一幕…佢o地扭o左大大朵花,送o左俾一個美女,哎吔吔,呃o左人o地一個錫錫呀~慘~

太平洋海岸睇海獅~

之後都肚子餓lu~我o地買o左D快餐o黎食~

所有座位都滿滿的,Hong Kong is full of people﹗我o地結果坐係路邊食,而o個個位正正係大平洋海岸o既入口,勁多人經過~

我o地叫o左兩個餐,每份都有薯條、巨腸同埋汽水,分別在於個主菜,我o地揀o左一款金沙骨,另一款雞扒,都唔知點解D o野食咁巨?﹗因為我o地坐係當眼處jap jap jap,路過o既人,100%都會望實我o地+評論﹗好誇張呀~間鋪頭應該俾番廣告費我o地呀~

睇埋水母館就過去山o既另一邊lu~對於兩年前我o地同埋我o既家人一齊去海洋公園睇水母,依然記憶猶新呢~

坐纜車真係好舒服呀﹗又可以親親大自然,又可以剩低我o地兩人有寧靜o既時間~

對面又有新展館呀﹗係專睇各式各樣o既青蛙o既「蛙蛙館」﹗

之後day大概影o左30-40張青蛙o既相﹗哈~有D青蛙真係幾核突呢…

蛙蛙館o既大門口~

熱氣球其實都開放o左一段時間啦,但開o左之後我都係第一次去咋~坐上去都昇得幾高,感覺幾好丫~等咁耐都值得﹗下面D人幾細粒﹗

落到去時間o岩o岩好﹗有雜技團o既精彩演出﹗表演者都好年輕咋~但身手好勁﹗成個演出既驚險又有趣味性~好睇﹗好熱鬧﹗

我排隊等熱氣球時見到呢個「至威笨豬跳」已經好想玩了~其實係有彈彈繩縛住個身o既跳彈床,唔係刺激o個type,但好開心,可以跳得好高~你睇我笑到幾開心就知~

睇熊貓館﹗其實o黎探望盈盈同樂樂都係主要行程之一o黎o架,但呢兩隻小豆丁就懶洋洋的,企係度睇幾分鐘郁都唔郁下,反而老伯伯安安同埋老婆婆佳佳就好活躍~你睇佳佳坐得幾舒服~安安就周圍行o黎行去o羅~

過番山o既另一邊去睇海洋劇場~

見到,咦,個劇場新裝修o左喎~唔通有新節目?果然形式上有唔同o左,但換湯不換藥,骨子裏都係o個D演出,只係框架o既故事唔同o左o羅~咁咪有現場觀眾參與o既,其中一個女生係以前陳瑞芝o既師姐o黎o架﹗排隊玩熱氣球時已經見到佢同佢男友了(兩個都係陳記舊生,高我o地一屆o既,兩個我o地都認得…話時話…忽然諗起,好似o個個男生都係HKU medic o架喎…即是而家做緊houseman?係咪呢?)~

我o地去玩多少少機動遊戲都走lu,六點鐘左右開始走啦,一來又超攰啦,二來都想番屋企食飯~好攰好攰好攰好攰好攰好攰好攰~我而家去瞓啦~

Comments

comments

19 關於 “30-3-2008:蛻變中的海洋公園” 的評論

  1. 嘩﹗我又要睇沙雕…
    我餵過魔鬼魚添喇…你記得嗎?
    金沙骨真的很大…我上次在海洋公園吃的焗豬扒飯份量很細呢…
    青蛙還是卡通造型較可愛…
    我也想玩至威笨豬跳…
    上次睇熊貓跟你今次相反…安安佳佳懶洋洋…盈盈樂樂非常活躍呢﹗
     
    [版主回覆03/31/2008 23:56:00]replied

  2. 「脫變」應是「蛻變」。「蛻」,粵音「退」。有謂蟬蛻,此處可引伸為面貌上的轉變。 此處用「蛻變」一詞很恰當,因為海洋公園要來個大變身嘛!
    看上圖,除了在鏡頭外的人在圍觀外,好像那隻熊貓也在懶洋洋地看著你在「笨猪跳」呢!
    [版主回覆04/01/2008 00:07:00]replied

  3. (沿途吱吱喳喳) …究竟係妳沿途吱吱喳喳…定係妳地一齊沿途吱吱喳喳呢 ….塊金沙骨真係好大塊呀…上次我地去個食果個焗豬扒飯真係細到離譜呀
    [版主回覆04/01/2008 00:09:00]replied

  4. 我都有三年冇去過海洋公園lu~ 果然多咗好多新野咁~ 過多幾年應該更加唔同呢!
    [版主回覆04/01/2008 00:11:00]replied

  5. RITA~你有冇同學當年係莊啟程嫁??
    我想知多唔多莊啟程既人入醫科呀~^^
    因為我會考後都應該轉過去呀!!
    [版主回覆04/01/2008 00:13:00]replied

  6. 我都唔記得我有沒有吱吱喳喳BOR~.. 應有吧!!~ 哈!~ 扭波的SHOW 是幾好看啦~ 不過途人不太懂反應… 他們都少少辛苦!!~ 另外很好奇D 波在那裡買…D質量很好!! 因為D 蛙真的很核突… 所以要影!!~  你做咩唔POST 隻雞扒蛙出來丫!!?! 熊貓在說: 放假應像我一PAT 才對!!!~ 笨豬才會彈彈彈!!~
    [版主回覆04/01/2008 00:17:00]replied

  7. Re家姐:
    噢,但呢D恐怕唔會放好耐呢,要去就要呢排去啦~但你又就快要去迪士尼呢~
    當然記得啦,你想講o既都係我俾條魔鬼魚嚇到跌係地上面o者~o個次o個條勁大丫嘛~係monterey同埋海洋公園o既都細條得多~又冇對住我張開口喎,所以冇咁驚~
    hee,你又唔係我,連你同恒仔都咁講,一定勁細﹗
    卡通青蛙較可愛,我都係咁話…
    好玩呀~呢個應該唔會走~
    係呀?睇o黎我遲D又要再去探佢o地先得lu~

  8. Re爹爹:
    唔睇你o既re re,我都冇察覺自己用o左別字添~哎吔吔,丟o左你架添~改正了﹗yeah~
    哈哈,又係喎,佢抬起頭望住我彈彈跳﹗

  9. Re姐夫:
    哈哈,當然係我吱喳得比較多啦,但佢都要貢獻o既,否則會無以為繼…hee,得我自己一個人係度講都悶啦~所以,冇搞錯o架啦,day都一定有份吱喳﹗
    哈,我都話啦,你又話細,家姐又話細,咁一定真係好細﹗咁你覺唔覺得佢罪無可恕呢?

  10. Re墨西:
    係呀~改動得好多﹗過多三幾年,等佢完全改建o左之後你就真係一定要去下啦﹗會俾你一個全新面貌﹗你平時鍾唔鍾意去主題公園o架?我好鍾意好鍾意好鍾意去o架~唔一定要玩好多機動遊戲,但最愛主題公園o既歡樂氣氛~

  11. Re泡泡龍:
    其實之前都收到你o既e-mail,不過一直忙忙忙,我都係早三日前先考完試咋,所以都未得閒回覆你~
    我知道我有同學係讀莊啟程然後升上o黎o既,不過我本身對呢間學校唔了解,所以都俾唔到咩意見你~不過呢,係邊度讀都好,最緊要自己有決心,夠勤力﹗加油~

  12. Re day:
    哈哈哈~睇你個re re時睇到我笑o左出聲﹗好在我係屋企,而唔係咩公眾場所o者,如果唔係失禮了就一定要怪罪於你啦~
    你梗係有少少吱喳啦,如果唔係我邊度講到落去喎,起碼都要講下「後來怎樣?」啦~
    始終佢o地講英文,有D語言障礙吧~可惜﹗表演喎,D波波梗係要高質素啦,扭兩扭扭爆o左或者吹呀吹都吹唔脹咪好弱酸?
    應你o既要求,我係下一篇blog post o左「雞扒蛙」啦~
    邊度係喎~彈彈彈都不知幾好玩~

  13. 我鍾意去主題公園架~ 而且勁鍾意刺激嘅機動遊戲,所以去旅行時多數都會去玩吓架~ 不過香港嘅迪迪尼就到依家都未去過~ 因為知道自己實會同美國的比較,怕失望麻!
    [版主回覆04/07/2008 21:10:00]replied

  14. 我都好耐無去過海洋公園啦, 都好想去丫, 不過又搵ng到人得閒陪我去, 唉 !
    [版主回覆04/07/2008 21:11:00]replied

  15. 海洋公園又真係幾多花臣喎, 我年頭先去過都冇咁多新野玩. 唔怪得海洋公園咁耐都咁受歡迎啦
    [版主回覆04/07/2008 21:13:00]replied

  16. Re墨西:
    哦~遇到同好﹗
    雖然我都去過美國兩個迪士尼,但去香港o個個兩次依然好enjoy,無論點,都係心情最緊要~heehee,而家唔去住,第時等咩咩o左之後再去o羅~實有機會﹗

  17. Re cindy:
    你可以趁而家得閒去啊﹗約埋D一樣咁得閒o既M08同學仔一齊去﹗唔係幾好咩?

發表迴響

你的電子郵件位址並不會被公開。 必要欄位標記為 *