16-8-2007:沖繩2007第一天@首里城、玉陵、國際通、鄉土料理

DAY 1 @ OKINAWA

出發lu﹗出發lu﹗期待已久o既旅行﹗因為之前實在太耐太耐冇休息過啦,好想出去玩下輕鬆一下﹗

今次只去四日,所以發覺自己駕車去機場比起call車更化算,另一方面又快D又坐得舒服D啦,仲可以聽自己o既CD﹗哈哈,我逼o左佢o地聽新買o既五月天CD~

早機去,晚機返,所以去到先食早餐﹗check-in過關後仲可以悠閒的食個大家樂早餐,可惜今次冇得食我最愛o既「家鄉銀針粉」呢~

今次坐o既航空公司係hong kong express,恐怕係間細o既航空公司,都未坐過,登機要搭巴士去停機坪,雖然有D唔方便,但咁樣先可以影到飛機o既超近鏡呢~

直航去沖繩只需要兩個幾鐘咋,係暑假期間o既加班機先有直航,平時一般要係台北轉機~所以今次全班機都係香港人﹗係飛機上時間好易過,睇下景、睇下書、食個(頗難食o既)飛機餐,咁就到達沖繩那霸空港了﹗

我o地住o既酒店位於那霸市(Naha),由機場去只需要坐一程單軌火車就到了,都幾方便﹗番到去酒店拎o左房,洗個面就出發去玩咯~第一日時間唔多,主要去那霸附近o既首里城同埋玉陵

我o地間酒店最近o既單軌火車站叫「美榮橋」~

要去o既首里城同玉陵都可以坐單軌火車去到呢~所以都幾方便﹗

認住獅子﹗呢D獅子(or我o地時時叫佢o地做瑞獸)係沖繩o既其中一個標誌,係佢o地守護獸,家家戶戶都有一對獅子放係門口o架~呢個呢…heehee,只係cute版o者~

落車後行過去玉陵途中見到有雪糕店﹗呢隻雪糕牌子「blue seal」我o地睇「飲食男女」時有介紹過o架﹗有好多特別味道,一定要試下﹗爸食o左苦瓜味、媽同我食o左黑糖味、家姐食o左菠蘿味﹗呢幾款東東都係沖繩特產﹗好多紀念品都係用佢o地做主題o架~我呢個黑糖味雪糕都好好味,而且黑糖o既風味好有特色﹗

玉陵

其實玉陵都係順道去o既o者,主要都係去首里城,玉陵聽個名都知道係陵墓之類啦,係呀,呢個係古代o既皇室o既陵墓,但我o地冇得入去o架,只可以係墓門外面望下咁o羅~不過100 yen入場費就差不多啦~另外仲有個歷史資料館,介紹一下o個陣D集俗,同埋玉陵葬o左邊個邊個等等~

首里城

沖繩有好多城池,其中首里城算係一個比較大規模o既,有好多城池係戰爭時都炸爛晒啦,得番遺址or少少城牆,但首里城有保持不斷修葺,而損壞o左o既都有重建,所以應該同原貌差不多~呢個大概係入口附近啦,係個山上面,都幾有氣勢o架~

除o左有城牆、城門之外,仲有其他景點,好似呢個「活潑潑地」,hee,我o地貪個名可愛可以要可愛一番咁影張相

日本好興係D景點度「蓋印仔」,我諗一方面俾人留個紀念,另一方面可以保持住D小朋友o既趣味吧﹗首里城o既印仔好完備,入場拎o個張單張已經設計到俾你點樣蓋,你跟住佢suggest o既路線o黎行就可以蓋滿晒啦,家姐非常熱烈的蓋蓋蓋,哈~

難得o既四人合照﹗

其實首里城有好大範圍都唔收費o架,係入到去廣場同埋幾個大殿先收入場費o者,特別o既係,入D大殿要脫鞋﹗hee,我仲鍾意啦,舒服D~

出到o黎有一段小插曲,首里城外圍仲有D池塘、花園、寺廟之類,咁係其中一個池塘我o地見到有鴨媽媽同埋一隻小鴨,鴨媽媽快快的跳上岸,丟低小鴨係後面,由池塘上陸地都有一小截斜路,對小鴨o黎講好困難,但鴨媽媽冇等佢喎,我o地都非常憤怒,有冇搞錯?﹗後來見到,原來岸上面有一大群小鴨﹗哇,呢隻鴨媽媽唔係丟低o個隻小鴨唔理,而係特登番去搵佢呀~唔知係小鴨論盡跟唔上,定係佢唔乖唔跟實,總之成班兄弟姊妹鴨鴨都上晒o黎喇,得佢一隻未上,咪要鴨媽媽番去搵佢o羅~相入面就係佢o地一家人了﹗

搭番車出去市區,我o地夜晚去逛逛國際通同埋去食飯~

國際通係那霸入面最旺o既一條街,好多食肆、好多舖頭,特別係專賣紀念品o既舖頭﹗我o地好快就揀定一間餐廳入去了,太好了,第一日就食到沖繩o既「家鄉料理」﹗

當然唔少得特產海葡萄啦,呢D唔係魚子,係海藻o黎o既,一粒一粒咁,質感真係有D似三文魚籽﹗點D汁o黎食味道都ok o既~爸就好鍾意喇﹗

除o左海葡萄之外,我o地仲叫o左苦瓜炒飯(記得嗎,苦瓜係沖繩特產o黎o架﹗)、三枚肉soba(呢款都係好typical o既食品,度度都食到﹗soba即是沖繩湯麵,比較粗o既麵~)、墨魚汁麵(typical﹗)、紅芋天婦羅(紅芋,即是紅色o既蕃薯,都係沖繩特產﹗),差不多係咁啦~間餐廳氣氛都好好,一路播住琉球o既傳統音樂,而裝修佈置都好有風味﹗係香港用相同o既價錢真係必定必定食唔到﹗

食完墨魚汁麵D牙會變成咁…呵呵~

食完飯,再逛多陣都番酒店lu,第一日o既行程就係咁啦,好累好累啊~

呀,講多一樣啦,雖然我o地住o既酒店係西式o既酒店(in contrast當然有和式酒店啦,以前去九州時就有住過~),但都有日本人所喜愛o既大浴場,有個人工溫泉,我o地晚晚都有去浸呀,不過日本o既浴場係男女分開,要光脫脫的,不過去九州時已經試過,習慣了,所以都唔會尷尬o既~而且遇到o既都係日本人,佢o地都唔尷尬咯,我o地有咩好尷尬o既呢~浸一浸浴,一日o既疲勞盡消

Comments

comments

在《16-8-2007:沖繩2007第一天@首里城、玉陵、國際通、鄉土料理》中有 20 則留言

  1. d 相影得好靚呀  尤其是 '活潑潑地' 0個張, 個構圖好靚呀. 本來係一個平凡既景點, 加左你兩姐妹上去即刻活潑好多. 講開又講, 真係唔知點解日本人咁鍾意蓋印仔喎, 我之前去東京, 每個火車站 (定係地鐵站呢? 唔記得左喇 ) 都有得蓋印仔架, 不過話時話d印仔又幾靚架喎 你地係咪自由行架? 定係跟團架?? 點解會諗到去沖繩既??

  2. Hong Kong Express? 是否新的 airline?? 我父母剛剛來探我們, 他們乘 oasis, 服務不錯, 價錢比Cathay 平 .

  3. 難得可以一家人去旅行,真係好開心呢! 尋日睇到華航的新聞,就諗起你,不過都知你應該返嚟,都冇咁驚! 但係今日睇你嘅blog就特別親切,因為那霸機場同香港快運都已經係新聞中聽聞過了! 我去日本渡蜜月時,都係一停咁印印印,啲單張總係預好晒位置,真係好方便呢! 你張墨魚汁牙相好搞笑呢!  

  4. Re uHnsUi: 多謝你o既讚賞啊﹗heehee,我o地廿幾歲人仲係度扮可愛呢~ 我都唔知點解會開始有咁o既「傳統」喎~不過睇o黎都幾受歡迎﹗ 我o地自由行o架~只係買o左機票+酒店o既package,咁樣free好多嘛,可以自己決定行程,每一個景點行幾耐都得﹗又唔駛俾人逼去買o野~點解去沖繩呀?其實本身都冇乜特別諗法o架,不過家姐假期唔多,所以只可以去四、五日,諗住搵個近o既地方去,逛街睇下D旅行社,咦,點解我o地一直都冇諗過去沖繩o既?好似好吸引咁喎~於是o個日我o地即刻買o左旅遊書﹗之後就再揀package了﹗都冇乜特別原因o架~不過第時我都好想再去﹗東京飛過去好近,一個鐘左右,或者下次係東京搭沖繩了?﹗

  5. Re慧峰大夫: 好高興見到你o既留言﹗你好耐冇o黎啦嘛~ 係呀係呀,一家人一齊去旅行真係好難得﹗ 我都唔知係咪新航空公司喎~搭起上o黎都冇乜特別好定差o羅,不過細節方面,以我對食o黎講好易滿足o既我,個飛機餐都…um…乜oasis幾好搭o架?因為初初開張時名聲麻麻地嘛,去london o既飛機delay o左好多個鐘,後來我都冇乜聽聞oasis o既消息了~

  6. Re墨西: 真的好高興啊~ 番到o黎第二朝起身睇到新聞都真係嚇死我﹗o岩o岩由那霸番o黎,o個頭就有意外了﹗太恐怖啦~我同家姐都話,如果唔係暑假有直航加班機,o個部出事o既飛機一定會有香港人﹗ 係喎,o個陣手信就收o左喇,但我都唔知你去o左日本邊D地方呢~講o黎聽聽丫~ hee,我一打完呢邊diary,家姐就指住個mon話,乜你咁犧牲色相呀?﹗我又唔覺得醜樣喎,唔係惹笑成份多D咩~

  7. 哈哈!D墨魚汁麵食到好可怕呀! 好有心機呀!把每天的行程記錄下來,日後睇返都會好開心 個鴨仔團都好可愛,咁都比你影到 好彩不是坐華航,否則嚇親

  8. Re小姑娘: 但係我o地食o個碟o野時係食得最開心o架﹗你笑下我個肉酸樣,我又笑下你咁﹗ 我自己見到打好o既blog blog都覺得好滿意,hee,又有靚相喎~有你o地欣賞就好了﹗ D鴨鴨唔知點解又唔怕人喎,所以可以企得好近﹗o個陣係我o地幾部相機一齊追住佢o地影o架﹗ 華航以後都真係咪搞﹗

  9. Re lor: 多謝你o既介紹~大家去o既地方果然都好相近呢~去得四、五日一般o黎講都係咁o既安排的了~

  10. 你們是扮隻牙定是條脷呢?!~ 我對那海葡萄都好有興趣bor! 你唔一齊"cup"印?! 開心d麻!!! 最尾那張有小小恐怖!!

  11. Re day: 我o地係獵物﹗垂死中… 但係香港好難有機會食到呢~聽講太古城有一間頗正宗o既沖繩料理,搵次可以去找找有冇得賣~(都係o個句,day專鍾意埋D古怪o野…令我懷疑自己係咪古怪…) 哦,有一份copy咪得o羅~如果我又蓋蓋蓋,行o既進度就會更慢了~ 唔係小搞笑咩?﹗

  12. 請問你住果間酒店全名係咩呀?  我月中出發, 本來book 左p ort hotel, 不過今日收到通知無房, 要轉其他hotel~ thank you~

  13. Re pat pat:
    沖繩的確係一個旅行好地方﹗近近地而家又有直航,而且遊玩o既東東大人細路都鍾意﹗又有好多地道美食喎~good﹗

nana 發表迴響 取消回覆

你的電子郵件位址並不會被公開。 必要欄位標記為 *