1-5-2007:香港行山.香港仔水塘道至黃泥涌峽

公眾假期,實在太令人高興了

﹗o岩o岩開block得閒少少,難得可以同day出去玩成日﹗今日節目豐富~

約o左day 9:30am係中環集合,我o地朝早去行山,早o左DD出門口之餘車程又順利,去到仲可以食個早餐先添~我o地首先搭巴士去行山o既起點~今日o既路線係:

香港仔水塘道–>金夫人馳馬徑–>布力徑–>黃泥涌峽

行山書話路程6.5公里,需要2.5小時完成,不過我o地大概兩個鐘就行完啦~

係起點留個影先~其實今日條路最辛苦得兩個位,一個就係係香港仔落o左巴士之後行上去起點o個條大斜,另一個位就係布力徑o個條長長直直o既樓梯了,其他路程大都好輕鬆~

遇到非常nice o既行山客﹗幫我o地影o左張合照﹗

為o左證明我o地行o既係南區,你睇﹗路o既中段見到海洋公園o架~好想去啊﹗

行到布力徑o個條長長o既石級,好辛苦呀,要中途休息好多次﹗去到呢個位,影下相,飲啖水,抖一抖o者~

大概十二點幾行完啦,離開布力徑時經過好多有錢人o既大豪宅,D大閘真係好誇張o架,都叫做見識一下啦~搭番巴士出去中環,我o地要去下一站﹗

行緊過去天星碼頭搭船時,見到拍戲﹗哇,有陶大宇同埋滕麗明﹗我發覺自己o既反應只係「等我過去八下先~」,而唔係見到明星好興奮o個種感覺o羅,可能因為佢o地唔係咩超級巨星or靚仔吧?何況,陶大宇個樣真係同電視一模一樣~唔似得上次見到sun boy’z個william時o既反應:「哇,原來佢真人咁高咁有型o架﹗」

搭船過去紅磡,其實我都好鍾意搭天星小輪o架,可以吹住海風,又有得睇下景,特別鍾意來往中環同紅磡o個條線,因為搭得耐D,同埋隻船係「打橫」行過維港,可以睇得D景清楚D~

行完山,出一身汗,飲下我最愛o既寶礦力就最好喇﹗

影o左兩張冇o黎正經o既自拍之後,終於有張正常少少~(o個兩張就唔好放上o黎喇,費事笑親大家~)

肚子餓,食o左飯先﹗原本想去上次食過o個間好抵食o既日本o野o架,點知超多人搵唔到位添,試下另一間,呢間係以健康為主題o既餐廳,叫做「菓一道」?﹗餐牌o既每一個菜式都有卡路里係隔離,全部都四百幾卡路里,咁著數?﹗我叫o左呢個白汁莧菜雜菌意粉,都幾好味丫,但同我想像中唔係好同,我估唔到仲有咁多其他蔬菜﹗雖然係素菜,又得四百幾卡路里,但食完都ok飽o架~不過…唔…四點幾時就餓了﹗

今日點解要去黃埔?因為去睇睇呢個活動﹗乜原來我鍾意Linkin Park o既咩?no no no~睇下張poster o既右下角,哈哈,有zarahn做嘉賓,我收到華納唱片o既newsletter,得知呢個消息,咪諗住去睇下o羅~

但原來,呢個活動,係一個

大騙局

活動3:00pm開始,我o地2:00pm就到了,可以企到一個有利位置,當時仲係度沾沾~

2:30pm左右就開始俾人入去lu,幾多人﹗後來正式開始時企得仲滿呀~

今日o既司儀係森美,所以森美o既fans都有o黎o架~所以有三夥fans,Linkin Park o既fans、zarahn o既fans同埋森美o既fans﹗

未開show前四個晒冷仔出o黎亮亮相先,俾D記者朋友影影相~

仲有做下訪問,可惜我唔識讀唇語,唔知道佢o地講乜~

正式開show lu~o個一刻我先知一個震憾o既消息,原來今日o既活動Linkin Park o既成員係唔會出席o架﹗咁都得?﹗我估D fans應該本身知啩,如果唔係,一定會暴動﹗但咁又奇喇,佢o地唔會出席,咁fans有乜好o黎呢?著數只係免費可以得到一張single,但佢o地就快出碟,到時反正都會買大碟o架啦,呢隻免費o既single又有咩用呢?收藏價值?我都唔知lu~

但我覺得呢個活動只有森美o既fans會覺得值回票價o羅,淨係睇佢係台上面搞下笑就夠好了~

zarahn係會出場,但原來,但原來,佢o地係唔會唱歌o架咋,佢o地出o黎只係同觀眾玩遊戲,同埋講下點解鍾意Linkin Park咁,我發覺我被騙了

後來有隊本地band演出幾首Linkin Park o既歌曲,我o地睇o左一陣就去行街了,哎吔吔,企係度霸o左個靚位成個鐘,點知原來zarahn一首歌都唔唱~嗚嗚~

臨走時見到zarahn接受無線收費電視o既訪問,我冇機會睇lu~

之後逛o左陣街,食o左個小小下午茶就番屋企lu~

路線決定行原路,搭番船過中環再轉巴士,係碼頭等上船時我已經呼呼大睡,上o左船又再呼呼大睡,連夢都發埋﹗好累呀~今日全日鼻水流呀流,用晒我同day o個兩包紙巾,係呢個時候先停一停咋,好辛苦﹗而家手上面仲係拎住一條手巾仔

聽日又番學lu~又要六點幾起身啦~

Comments

comments

在《1-5-2007:香港行山.香港仔水塘道至黃泥涌峽》中有 13 則留言

  1. 假日行山遠足,的確是樂事 ,又可鍛鍊身体。有沒有參加過毅行者?

  2. 太開心啦~ 放假可以約到出來行山… 有冇興趣下次約出來一齊行南丫島呢?(同南區一様都係有個南字呀~!) 順便去試下果度的"阿婆豆腐花"呀~! 好正嫁~!

  3. 今次行出沒咩景~ 不過親親大自然都是好的!!!:) 真的是花家大騙案!! um… 都唔明點解咁多人~ 好的是可以黏下ta gweg!~:)

  4. Re慧峰大夫: 係呀,我好鍾意去行下山,如果o個日時間多D,仲會特登睇定行山書,試下行D新路線﹗有D新鮮感,有D挑戰性丫嘛~ 毅行者就冇參加過,但去過綠色力量o既環島行o羅,參加過一次,因為o個次係第一次參加,所以參加o左25km咋~但要籌唔少錢,所以都唔容易再去參加~

  5. Re殭屍(湯告魯斯): 要珍惜而家o既機會呢,第時出o黎做o野,我又忙,大衛仔(跟你媽媽叫﹗哈~)又忙,難D就得o岩時間lu~好呀﹗下次睇下可唔可以約到一齊去﹗但點解特別要係南丫島o既?你好鍾意去南丫島o架?

  6. Re day: 我都覺得有少少失望呢,好大段路都係引水道,超平坦o既悶悶路,而且都沒甚景色,都係西貢的景色比較靚﹗親親大自然都係好﹗起碼,聞下D草呀、樹呀o既清新味道,人都開心D﹗ 真係激死我﹗ 辛苦day了~又要陪我去運吉~

  7. Re小姑娘: 所以我尋晚十一點幾就瞓o左lu,唔知係因為出去成日好累,定係夜晚食o左少少藥…

  8. Re YY: 都唯有咁諗~我覺得zarahn o既fans都算好了,如果係Linkin Park o既fans唔知道佢o地唔會出席,而專登o黎捧場,會仲傷心…

Rita 發表迴響 取消回覆

你的電子郵件位址並不會被公開。 必要欄位標記為 *