首爾平昌冰雪世界之旅 – Day 3 – 既忙亂又興奮的滑雪體驗

二零二二年十二月二十八日(星期三)

今天是滑雪日,要記錄今天的經歷,首先要由一天前說起。

妹妹比我們早兩天到達平昌,本來打算昨天去滑雪,昨早到滑雪場查詢詳情,才被告知滑雪場的滑雪課堂已經爆滿至12月31日,不過職員提供了私人滑雪教練的聯絡電話並協助聯絡,雖然價錢比較貴,但一場來到滑雪場點都要去滑一次雪,而且有專人安排埋租借滑雪工具同埋SKI PASS,對於一竅不通的我們來說比較方便,所以睇餸食飯,決定節儉一點只為三個小朋友安排1對3的教練課堂,我們大人從旁協助時順便學習就好,於是就約好了今天9:00AM-11:00AM學滑雪,滑雪公司會安排車子在8:30AM到酒店PICK UP。

因為8:30AM PICK UP,我們約好了7:15AM就要出門吃早餐。

今天是在酒店3/F的餐廳吃自助早餐,落地玻璃對出就係滑雪場景觀,好靚。

難得來到韓國,梗係要食韓式早餐喇,好懷念當年住韓屋古韻堂那美味的傳統早餐

無論係邊度食自助早餐,逸逸碟食物都無乜分別。

食完早餐就在酒店大堂等滑雪公司來PICK UP。

走到外面,嘩﹗落雪喇~因為睇天氣報告話我地成個旅行的日子都係天晴,雖然其實唔細心留意都察覺唔到落緊雪,不過已經好興奮。

坐車去滑雪公司

首先就揀衫同埋褲

都無理乜嘢配色,合身就好,依家就咁睇配色好似有點奇怪,不過後來發現原來咁COLOURFUL的撞色係雪地上面特別吸睛。

跟住就係分配滑雪板,滑雪板要根據高度揀選,再要按腳的大小調節,如果我地自己去租借工具真係唔識處理。試埋硬到飛起的滑雪靴同埋戴好頭盔,加埋我地預先淘寶的滑雪手套,小朋友裝備就完成了。

係小朋友試裝期間,妹妹也與店員討論我們的PACKAGE。店員說三個小朋友太細,一定要一對一先搞得掂,最後佢推銷我們要三個教練,分別是一個1 VS 1、一個1 VS 2同埋一個1 VS 4,可以教晒我們七個人,一開始先一對一教小朋友,小朋友休息時就教大人,好喇就咁決定。另外,店員說可以幫我們安排半日或全日的SKI PASS,我們也擔心小朋友的體力,所以最後選擇了半日SKI PASS,最後發覺真係夠晒皮。

就這樣,我們七個人在這兒就花了過百萬完韓WON。

這時大人還未換裝,沒想到竟然因為時間的關係,教練就先行帶走了三個小朋友去滑雪場學滑雪,連妹妹也制止不來。不過好彩當中有可靠的曉曉,情況應該唔會太糟糕。

我地都換好衫,可以出發喇~

我們來到鳳凰滑雪場了

鳳凰滑雪場擁有17條各具特色的滑雪道,按不同難度分為BEGINNER、INTERMDIATE、ADVANCE以及EXPERT,讓滑雪者按自己的能力去挑戰。滑雪場並設有9款不同的索道供滑雪者使用,我們這些只留在入口處的VERY VERY BEGINNER,這些索道就當然與我們無關了。

我們一入到滑雪場就已經看見三個小朋友和三個教練,幸好小朋友都沒有因為被強行帶走而哭,只是呆呆滯滯,應該與教練與小朋友不太溝通到有關,只能單靠身體語言教與學。小朋友的英語能力有限公司,教練們的英語亦未見得很靈光,所以看到爸爸媽媽們到來,教練和小朋友都鬆一口氣。後來聽曉曉講原來教練也曾嘗試用GOOGLE TRANSLATE與她溝通,不過翻譯出來的卻不是中文字而是一些一些彎彎曲曲的文字,唔知教練誤以為我們是什麼國藉的人呢?

穿上滑雪裝備好有型,唔打得都睇得。

果然滑雪公司的職員說得沒錯,他們三個小朋友其實唔單止需要1對1的教學,而是2對1,教練+父母 VS 小朋友先搞得掂。

初學滑雪主要教兩樣嘢,第一樣就係A字腳滑落嚟,第二樣就係好似蟹咁打橫一步一步行返上斜坡上面。

(按上圖觀看影片)

逸逸要掌握A字腳滑落嚟都好快上手,無幾耐已經開始有啲似模似樣~不過行返上斜就完全唔肯用力,每次都係勉強行咗幾步就由教練連人帶板抱佢上去,所以做小朋友教練的錢唔易賺。

曉曉就學得唔錯

詩詩太細個就比較困難,根本唔太夠力去操控滑雪板。

期間我和恆仔輪流滑雪同照顧逸逸,雖然話係輪流,不過其實恆仔俾咗好多時間我去玩。

今次係我第二次滑雪,第一次已經係二十年前,當時跟團去哈爾濱有一天去滑雪場的行程,記憶已經很模糊,只記得A字腳同埋有一下收唔住掣撞咗埋個軟身圍網個度。,

拎埋滑雪末杖好似好有型咁~不過其實真正滑的時候我無拎住滑雪杖,因為兼顧唔到咁多嘢。

開頭其實我都唔係太做到打橫行上斜坡,成日都上一呎就滑返落半呎,經教練指點之後,就上得好好多,不過上斜坡仍然都係滑雪入面最疲累的部份。後期教練走晒之後就開始偷雞,除咗滑雪板先行上斜坡,雖然搬板都好重,點都舒服過著住滑雪板行上去。

不過另外一樣教練教的技巧就學唔識,就係跌低自己爬返起身。唔知係唔係CORE太弱,側埋一邊坐低的時候點樣都用唔到力推自己起身,要等人救,反而有一次向後坐用多幾次力叫做勉強起到身。最弊既係滑雪會成日跌到大蕃薯,但都唔係向下滑期間跌,而係到咗平地時俾人撞跌,又或者自己單腳除緊滑雪板企唔穩時跌,好彩件滑雪外衣同褲夠厚,跌低都唔痛。不過跌其實都未係最慘,最慘係滑落嚟時A字腳做得唔好,慢慢變成H字再變V字,打開隻腳又跌唔低膝頭位真係超級痛。

我們滑雪期間其實都幾大雪,不過因為要著住滑雪板打橫行上斜坡實在太辛苦了,所以我唔單止無覺得凍,仲流晒汗添﹗

恆仔的滑雪英姿

學到無力就坐低休息一下,教練同逸逸玩雪。

嘩﹗落大雪~

曉曉又過來休息,學教練咁玩人造雪。

但係佢地唔識控制份量,結果入晒頸,凍到飛起。

因為玩雪搞到好凍,加上滑雪手套唔太啱身就更加凍,學咗一輪滑雪又已經好累,逸逸開始控制唔到自己猛咁係度喊,不停大叫好凍同埋好累,於是我話咁唔好再滑雪我陪佢坐埋一邊休息,佢又繼續喊住話要再去滑雪。

既然坐又喊玩又喊,梗係唔好浪費時間,所以選擇咗喊住玩,結果逸逸一邊喊一邊行上山坡,滑完落嚟又繼續喊,好糾結,不過滑下滑下越來越有成功感就唔再喊了。

睇下逸逸幾有成功感﹗

(按上圖觀看影片)

我其實控制唔到方向,明明話跟住曉曉去,結果滑咗去相反的方向,所以滑雪時我最驚就係撞到人,始終我地附近全部都係BEGINNER,我控制唔到自己,其實其他人都唔見得控制到自己,撞埋一齊就弊傢伙,好彩最後都有驚無險。

唔好睇平日曉曉最文靜,今次滑雪曉曉係三個小朋友入面最勇猛的,可以自己除滑雪板,自己拎上山坡,自己著返滑雪板,自己滑落嚟,仲要控制到方向,滑得叻過我。阿妹要照顧詩詩時,曉曉都肯跟住我繼續玩,好明顯非常ENJOY。

詩詩雖然係斜坡搞唔掂,又不停流鼻水,啲鼻水仲要結埋冰好唔舒服,佢最終都搵到自己既步調 – 係平地滑雪。其實點樣玩唔緊要,最緊要自得其樂。

後來問返三個小朋友韓國乜嘢最好玩,曉曉答係滑雪一點也不出奇,估唔到連一邊喊一邊滑的逸逸以及只在平地滑的詩詩都話滑雪最好玩,不過她們多番強調唔要再自己跟教練先出發,要跟爸爸媽媽一起去。

最後我地玩到1PM先離開滑雪場,可能我們比滑雪公司的職員預想的時間較為晚,所以有點混亂。他們要先接我們回舖頭交還裝備,行去上車的時候因為拎太多嘢雪地又滑行得好慢,職員看不過眼一手就抱起逸逸上車,結果逸逸又再次大哭,最後要阿妹攬住又見我上埋車先冷靜返落嚟;接我們的司機竟然將我們送到另一間分店,好彩我們覺得唔對路同佢講,先至再送返我們去正確的門市;接送的車子坐唔晒七個人+裝備,留低兩個爸爸係滑雪場等下一轉車,點知等咗好耐都未見有車返嚟,連陪佢地等的職員都唔知點算好;最後,終於搞掂晒換好晒衫,滑雪公司送我們返酒店,返到去已經大約1:45PM了。

玩咗一個早上大家已經非常疲累,決定簡單一點去便利店買材料煮麵食當午餐。

每個房間只有一個爐頭,妹妹負責淥麵,我就回我們的房間翻熱牛骨湯包俾小朋友做湯底,之後就可以開餐喇~

我地今天的午餐是最有風味的韓國餐 – 韓國人的COMFORT FOOD – 拉麵。

腸仔、雞蛋、泡菜、加埋拉麵的靈魂辣辣味精粉,今日的午餐真係好好味。

食飽飽就返去午睡休息了。

Comments

comments

4 則迴響於《首爾平昌冰雪世界之旅 – Day 3 – 既忙亂又興奮的滑雪體驗

  1. 描寫得好細致,尤其A字變H,又變V,經驗之談,真的是滑雪板控制了我們。以前我們跟團去韓國旅行也試過滑雪,沒有專門教練,有時跌倒真的就站不起來,很大挫敗感。你們這次,大人既要照顧小朋友,又要自己學,能夠拍個美照已是不錯的收穫!

  2. 一邊睇時睇到笑咗出聲,特別係三個小朋友都話韓國滑雪最好玩嗰部份~
    曉幾時都好留心聽老師講嘢,又比另外嗰兩隻大個少少,可以控制到自己嘅身體,所以學得好啲,不過佢平時細膽,我都估唔到佢pick up得咁快~

發表迴響

你的電子郵件位址並不會被公開。 必要欄位標記為 *